مينيستر ساپار شەڭبەرىندە II «باقىتتى جاھاندىق ديالوگ» اتتى جۇمىس كەزدەسۋىنە قاتىستى. ءىس-شارا بارىسىندا ازاماتتارعا ساپالى مەملەكەتتىك جانە الەۋمەتتىك قىزمەت كورسەتۋ ماسەلەلەرى تالقىلاندى. جيىنعا قاتىسۋشىلار بۇۇ-نىڭ «تۇتاستىق كوزقاراس» باعىتىنا قول جەتكىزۋ ءۇشىن الەمدىك ىنتىماقتاستىقتى كۇشەيتۋ قاجەتتىگىنە توقتالدى. سونداي-اق بىرلەسكەن كۇش-جىگەردىڭ ماڭىزدىلىعى دا اتالىپ ءوتتى.
فورۋمنان كەيىنگى كەزدەسۋلەردە جاساندى ينتەللەكت پەن جاھاندىق تسيفرلاندىرۋعا قاتىستى تۇيتكىلدەر تالقىلاندى. جيىن قورىتىندىسى بويىنشا كوستا-ريكا, پورتۋگاليا, سلوۆەنيا, قازاقستان, بىرىككەن اراب امىرلىكتەرى جانە مەكسيكا مەملەكەتتەرىنىڭ بىرىككەن «باقىتتىڭ كواليتسياسىن» قۇرۋ تۋرالى مەموراندۋمعا قول قويىلدى.
بۇدان بولەك, د.اباەۆ ءباا-ءنىڭ باقىت جانە وركەندەۋ ماسەلەلەرى جونىندەگى مينيسترىمەن ەكىجاقتى كەزدەسۋ وتكىزدى. تاراپتار اقپاراتتىق-كوممۋنيكاتسيالىق تەحنولوگيالار مەن تسيفرلى قىزمەتتەر سالاسىنداعى بىرلەسكەن جوبالاردى ىلگەرىلەتۋ تۋرالى كەلىسىمگە قول جەتكىزدى. سونىمەن قاتار مەملەكەتتىك قىزمەت سالاسىندا ىنتىماقتاستىق ورناتۋ ماسەلەلەرى تالقىلاندى.
دۋبايدا ءوتىپ جاتقان بيىلعى الەمدىك ۇكىمەت ءسامميتى «كەلەشەكتەگى ۇكىمەتتەردى وزگەرتۋ» ۇرانىن ۇستانادى. سامميت بۇكىل الەمدە بولاشاق ۇكىمەتتى قالىپتاستىرۋعا ارنالعان جاھاندىق تۇعىرناما سانالادى. جيىن بارىسىندا جىل سايىن ادامزات الدىندا تۇرعان پروبلەمالاردى شەشۋ ءۇشىن يننوۆاتسيالار مەن تەحنولوگيالاردى قالاي پايدالانۋ كەرەك ەكەنىنە باسا نازار اۋدارا وتىرىپ, ۇكىمەتتىڭ كەلەسى تولقىنىنا وزەكتى مىندەتتەر قويىلادى.
سونداي-اق مەملەكەتتىك قىزمەت, باسقارۋ جانە يننوۆاتسيا سالاسىنداعى بولاشاق ۇردىستەر تالقىلانادى. جىل سايىن سامميتكە 130-دان استام ەلدىڭ مەملەكەت باسشىلارى, ساياساتكەرلەر, عالىمدار مەن حالىقارالىق ۇيىمدار وكىلدەرى قاتىسادى. سامميتتە تاجىريبە الىسىپ, يننوۆاتسيالىق جاڭالىقتاردى بولىسۋگە, تۇراقتى بايلانىستار ورناتۋعا مۇمكىندىك مول.
اباي اسانكەلدى ۇلى,
«ەگەمەن قازاقستان»
