بيىلعى وليمپيادانىڭ اشىلۋ سالتاناتىنا ازداعان وزگەرىستەر ەنگەن. مىسالى, سپورتشىلاردىڭ ءداستۇرلى شەرۋىندە دەلەگاتسيالار ادەتتەگىدەي گرەك الىپبيىمەن ەمەس, كورەي ءالىپبيىنىڭ رەتىمەن شىقتى. سونىمەن قاتار وليمپيادا تاريحىندا وڭتۇستىك پەن سولتۇستىك كورەيا ەلىنىڭ سپورتشىلارى تۇڭعىش رەت ءبىر تۋدىڭ استىنا بىرىگىپ, اشىلۋ سالتاناتىندا بىرگە ساپ تۇزەپ ءجۇرىپ ءوتتى. ال دوپينگ داۋىنا ىلىگىپ, ەرەجەلەرىن بۇزعان رەسەي قۇراماسى بيىلعى باسەكەدە حالىقارالىق وليمپيادا كوميتەتىنىڭ تۋى استىندا شىقتى. ەندى رەسەيدىڭ ۇلتتىق وليمپيادا قۇراماسى «رەسەيلىك وليمپيادا سپورتشىلارى» دەگەن توپ رەتىندە وليمپيادا جۇلدەسىنە تالاسادى.
وليمپيادانىڭ اشىلۋ جانە جابىلۋ سالتاناتتى شاراسىنىڭ شىعارماشىلىق ديرەكتورى سون سىن حۆاننىڭ ايتۋىنشا, وليمپيادانىڭ اشىلۋ سالتاناتىنا 65 ميلليون اقش دوللارى جۇمسالعان. بۇل تۋرالى ول شارا اياسىندا ۇيىمداستىرىلعان ءباسپاسوز ءماسليحاتىندا ايتقان. سوچيدە وتكەن قىسقى وليمپيادامەن سالىستىرعاندا بۇل اجەپتاۋىر تومەن كورسەتكىش.
كەيدە مەنى قىزىعى كوپ قىسقى سپورتتىڭ تورەسى – اق وليمپيا ويىندارىنىڭ نەلىكتەن اۋا رايى سۋىق, كليماتى قولايسىز ايماقتاردا ەمەس, كەرىسىنشە جاپ-جاسىل, جىلى جەردە وتەتىنى تاڭعالدىرادى. ماسەلەن, تۋريندە دە, سوچيدە دە اۋا رايى جيىرما گرادۋسقا دەيىنگى جىلىلىقتى كورسەتىپ, جارىستى ۇيىمداستىرۋشىلارعا دا, سپورتشىلارعا دا قولايسىزدىق تۋعىزعان ەدى. ەندى, مىنە ءدال سول جاعداي پحەنچحاندا دا قايتالاندى. بۇدان ەكى-ءۇش كۇن فريستايل, شاڭعى, سنوۋبورد جارىستارى وتەتىن بيىك تاۋ بەتكەيىندە كۇن سۋىتىپ, وليمپيادانى ۇيىمداستىرۋشىلاردى الاڭداتقانى راس. ەكى-ءۇش كۇننەن بەرى كۇن جىلىندى. تابيعاتى تاماشا, جاسىل اعاشتارى جايقالىپ تۇرعان كورەيادا جازعى وليمپيا ويىندارى ءوتىپ جاتىر دەگەن ويدا قالدىق. قار مۇلدەم جوق. الايدا فريستايل ءوتىپ جاتقان «فەنيكس سنوۋ پاركتە» قار جۇقا بولسا دا بار. كۇن جىلىپ كەتكەن سوڭ تايعاناققا اينالعان.
پحەنچحان مەن كاننىن قالالارىنىڭ اراسى الپىس شاقىرىمداي. استانا مەن الماتىدان, ەلىمىزدىڭ باسقا وبلىستارىنان كەلگەن تۋريستەردىڭ كوبى ەكى قالاداعى قوناقۇيلەردە تۇرىپ جاتىر. ءتىپتى ءۇش ءجۇز شاقىرىم جەردەگى ەل استاناسى سەۋلدەگى قوناقۇيگە ورنالاسقان شورت-ترەك سايىسىن تاماشالاۋعا كەلگەن شىمكەنتتىك جيىرما جاستاعى ستۋدەنت ماقسات بەگمانوۆتىڭ جانكەشتىلىگىنە تاڭعالدىق. ول جارىس اياقتالعان سوڭ كاننىننان سەۋلگە ورالدى.
وسى ەكى قالادا وليمپيادا باعدارلاماسىنا ەنگەن جارىستار وتۋدە. تۋريستەر مەن جانكۇيەرلەر باعانىڭ شارىقتاپ تۇرعانىن ەلەپ-ەسكەرىپ جاتقان جوق. ءارلى-بەرلى قاتىناعان اۆتوبۋستار مەن ەلەكتر پويىزى, قوعامدىق كولىكتەر ادامدارعا لىق تولى.
مۇندا باعا اسپانداپ تۇر. پحەنچحانداعى الپەنسيا تاۋ كلاستەرىندە شاڭعى, بياتلون, سنوۋبورد, فريستايل ويىندارى وتۋدە. ال وعان جەتۋ ءۇشىن ەلەكتر پويىزىنا, سوسىن ارنايى قاتىنايتىن اۆتوبۋستارعا وتىراسىز. الماتىداعى دۇنيەجۇزىلىك قىسقى ۋنيۆەرسيادادا, سوچي وليمپياداسى كەزىندە جۇزدەگەن مىڭ جانكۇيەرلەردى كولىكتەر تەگىن تاسىعان. پويىزدىڭ باعاسى ءبىر ادامعا سەگىز مىڭ ۆون. بىزدىڭشە ەكى جارىم, ءۇش مىڭ تەڭگە. ال تاكسي اكەڭنىڭ قۇنىن سۇرايدى. ءبىر شاقىرىمعا ءبىر اقش دوللارىن سۇرايدى. ءدامحانا, مەيرامحانالاردا باعا اسپانداپ تۇر. قازاقستاننان كەلگەن سەرىك ەكەۋمىز جاپون تەڭىزىنىڭ جاعالاۋىندا ورنالاسقان ءبىر ءدامحانادان ءىرى قارا ەتىنەن ازىرلەنگەن قۋىرداق پەن اششى تاعامدارعا الپىس مىڭ ۆون تولەدىك. بۇل تەڭگەگە شاققاندا جيىرما مىڭ تەڭگە شاماسىندا. مۇنىڭ بارلىعىن نەگە قازبالاپ ءتىزىپ جاتىرمىز؟ سپورت جارىستارىن قازىر تەلەەكراننان سول ساتتە تاماشالاي الاتىندىقتان, وقىرماندارعا كورەي جەرىندەگى كورگەن-بىلگەنىمىزدى ايتا كەتكەن ارتىق بولماس, قۇرمەتتى وقىرمان.
ەندى مىنا قىزىقتى قاراڭىز. كەلگەن قوناقتار مەن تۋريستەرگە, سپورتشىلارعا تەگىن قىزمەت كورسەتەتىن ەرىكتىلەردى نەگىزىندە سايىستار وتەتىن جەردە, كەشەندەر مەن ادامدار كوپ جينالاتىن جەردەن كەزدەستىرەسىز. الايدا ورىس ءتىلدى ەرىكتىلەردى بەس كۇندە كەزدەستىرە الماي دال بولدىق. ءتىپتى سولاردىڭ دەنى اعىلشىن تىلىنەن دە ماقرۇم ەكەنىن بايقاپ قالدىق. حوش, سونىمەن شالعايدان كەلگەن تۋريستەردىڭ ەركىن ءجۇرىپ-تۇرۋى قيىنعا سوعىپ تۇر. ءتىپتى ساۋدا دۇكەندەرىندە بولعانىمىزدا وزىمىزگە قاجەتتى نان, شۇجىق, باسقا تاعامداردى تابا المادىق.
سەنبى كۇنى كەشكىلىك ەلدەن كەلگەن ءبىر توپ جانكۇيەر كاننىن قالاسىنداعى ءزاۋلىم سپورت سارايىنداعى شورت-ترەك سايىسىن تاماشالاۋعا باردىق. ون ەكى مىڭ ادام سىياتىن الماتى مەن استاناداعى اتشاپتىرىم ارەنا سياقتى كەشەن ادامدارعا لىق تولدى. وكىنىشكە قاراي, مادىعالي قارسىبەكوۆتىڭ شاكىرتتەرى ءۇشىن بۇل كۇن ءساتسىز بولدى. ءۇمىت كۇتكەن نۇربەرگەن جۇماعازيەۆ قۇلاپ, جارىستان شىعىپ قالدى. دەنيس نيكيشا توپ باستاپ كەلە جاتقانىمەن ءتورتىنشى ورىنعا سىرعىدى. «مەن نەگىزىندە قىسقا قاشىقتىققا جۇگىرۋىم كەرەك بولاتىن. بىراق مۇزدىڭ ساپاسىن ءارى ءوزىمدى تەكسەرەيىن دەپ شەشتىم. نامىستى قولدان بەرمەۋگە تىرىسامىن», دەيدى دەنيس. تاعى ءبىر قىزىمىز ا.كرەستوۆا دا تاجىريبەنىڭ ازدىعىنان سىن ساتتە ءوز مۇمكىندىگىن پايدالانا المادى. ەندى ءبىزدىڭ كونكيشىلەرىمىز ءتورت رەت باعىن سىناپ كورەدى.
وليمپيادانىڭ العاشقى كۇنى نەمىستەر, نيدەرلاندتار مەن كورەيلەر ءۇشىن ءساتتى باستالدى. بياتلوننان سپرينتەرلەر جارىسىندا نەمىستىڭ لاۋرا دالمايەر اتتى سايىپقىرانى التىننان القا تاقتى. وكىنىشكە قاراي ءبىزدىڭ قىزدار گالينا ۆيشنەۆسكايا, داريا كليمينا, ولگا پولتورانينا جانە الينا رايكوۆا كوشتىڭ سوڭىندا قالدى. جەتى جارىم شاقىرىمدىق سكياتلون سايىسىندا دا قىزدارىمىز جەرگە قاراتتى.
جۇلدەدەن ءۇمىتتى بولعان ۆيشنەۆسكايا سپرينتتىك جارىستىڭ ءبىرىنشى وق اتۋ كەزەڭىندە بەس نىسانانىڭ ەكەۋىن كوزدەي الماي, ايىپ اينالىمىن ەكى رەت جۇگىرىپ ءوتىپ, ءبىراز ۋاقىت جوعالتىپ الدى. ال ەكىنشى اتۋ كەزەڭىندە بەس نىسانانىڭ بارلىعىنا ءدال تيگىزدى. بىراق العاشقى ەكى قاتەلىكتىڭ كەسىرىنەن ول سپرينتتىك جارىستى تەك 30-شى ناتيجەمەن اياقتادى. ۆيشنەۆسكايا وسى قاشىقتىقتا چەمپيون بولعان گەرمانيالىق لاۋرا دالمايەردەن 1 مينۋت 46 سەكۋندقا قالىپ قويدى.
ءدال 10 اقپان كۇنى 24 جاسقا تولعان گالينا ۆيشنەۆسكايا سول كۇنگى ساتسىزدىگى ءۇشىن قازاقستاندىق جانكۇيەرلەردەن كەشىرىم سۇراپ, الداعى ۋاقىتتا ۇزدىك ناتيجە كورسەتۋگە تىرىساتىنىن ايتتى. «بۇگىنگى ساتسىزدىك ءۇشىن جانكۇيەرلەردەن كەشىرىم سۇرايمىن. بارىمدى سالدىم. اياعىم, شاڭعىم جاقسى ءجۇردى. بىراق اتۋ كەزەڭىندەگى ەكى قاتەلىك كوپ نارسەنى شەشتى. جەل قاتتى بولدى ءارى قاتتى تولقىپ, جينالا المادىم. الداعى جارىستا تولعانىسىمدى جەڭىپ, ۇزدىك ناتيجە كورسەتۋگە تىرىسامىن», دەدى ۆيشنەۆسكايا جارىستان كەيىن ەلىمىزدىڭ باق وكىلدەرىنە بەرگەن سۇحباتىندا. ول سپرينتتە 30-ورىن العان سپورتشى رەتىندە الداعى ءىز قۋ جارىسىندا سورەدەن كەشىگىپ, 30-بولىپ شىعادى.
وڭداسىن ەلۋباي,
جۋرناليست, ارنايى
«ەگەمەن قازاقستان» ءۇشىن پحەنچحاننان
(وڭتۇستىك كورەيا)
