2017 جىلى ككو مۇشەلەرى اتىنا تۇرعىنداردان 10 ءوتىنىش كەلىپ تۇسكەن ەكەن. ونىڭ بارلىعى ۇيىمنىڭ وتىرىستارىندا تالقىلانىپ, ءوتىنىش يەلەرىنە ناقتى كومەك كورسەتىلگەن. مىسالى, 2017 جىلدىڭ باسىندا قاراعاندى قالاسىنىڭ تۇرعىنى ءوتىنىش ءبىلدىرىپ, الاياقتاردان قوماقتى قاراجاتىن قايتارا الماي جۇرگەندىگى تۋرالى شاعىمدانعان. ككو مۇشەلەرى ورتالىق پوليتسيا ءبولىمىنىڭ باسشىلىعى جانە پروكۋراتۋرا ورگاندارىمەن بىرلەسىپ, قىلمىستىق ءىستىڭ نەگىزىندە شاعىم يەسىنىڭ 4 ميلليون تەڭگەگە جۋىق اقشاسىن قايتارۋعا كومەكتەستى.
«كونسۋلتاتيۆتىك-كەڭەسشى ورگاننىڭ باستى مىندەتى – حالىقتىڭ پوليتسياعا دەگەن سەنىمىن ارتتىرىپ, ىشكى ىستەر ورگاندارى قىزمەتىنىڭ اشىق جۇرگىزىلۋىنە ىقپال ەتۋ بولماق. وبلىستىڭ جەر كولەمى ۇلكەن بولعاندىقتان, شالعايداعى اۋداندار مەن اۋىلدارداعى تۇرعىنداردىڭ ءتۇرلى ماسەلەلەر بويىنشا ارىز-شاعىمدارىن پوليتسياعا جەتكىزۋ ءۇشىن بىزبەن بايلانىسقا شىعا الماي, قيىندىق كورەتىنى راس. سوندىقتان كونسۋلتاتيۆتىك-كەڭەسشى ورگان وكىلدەرى الىستاعى ەلدى مەكەندەرگە بارىپ, حالىقتىڭ ارىز-شاعىمدارىن تىكەلەي قابىلداۋى قاجەت. سودان كەيىن ولاردى ۇيىمنىڭ وتىرىستارىندا تالقىلاپ, ءتيىستى شەشىمدەر قابىلدايتىن بولامىز», دەيدى ككو توراعاسى ج.نۇرپەيىسوۆ.
جالپى, ككو مۇشەلەرى پوليتسيا جۇمىسىنىڭ اشىق جۇرگىزىلۋىن قاداعالاۋ ءۇشىن كەز كەلگەن ىشكى ىستەر بولىمدەرىنىڭ عيماراتىنا كەدەرگىسىز كىرە الادى. كونسۋلتاتيۆتىك كەڭەسشى ورگاننىڭ قۇرامىندا جۋرناليستەر, ۇكىمەتتىك ەمەس ۇيىمداردىڭ جانە قوعامدىق بىرلەستىكتەردىڭ وكىلدەرى بار. ورگاننىڭ جالپى مۇشەلەرىنىڭ سانى 9 ادام بولىپ بەكىتىلگەن.
قايرات ءابىلدا,
«ەگەمەن قازاقستان»
قاراعاندى
