سپيكەرلەر جۋرناليستەردى اگەنتتىكتىڭ جانە ونىڭ ارنالارىنىڭ ءبىر جىلدىق قىزمەتتەرىنىڭ ناتيجەسىمەن, سونداي-اق 2018 جىلعا جوسپارلانعان جاڭا جوبالارىمەن تانىستىردى.
ءوز سوزىندە الماگۇل احمەتجانوۆا اگەنتتىكتىڭ 5 جىلدىق ستراتەگيالىق دامۋىن جۇزەگە اسىرۋ جۇمىسى جالعاسىپ جاتقانىن جەتكىزدى.
«اتالعان ستراتەگيا اياسىندا اگەنتتىك تەلەارنالارىنىڭ تارالىم ساياساتىنا, سونداي-اق ۇيىمنىڭ بيزنەس-پروتسەسىنە تۇزەتۋلەر جۇرگىزىلدى. بۇل ارنالاردىڭ كونتەنتىن جاقسارتۋعا, اگەنتتىك قىزمەتىن وڭتايلاندىرۋ جانە جۇمىس تيمدىلىگىن ارتتىرۋعا مۇمكىندىك بەردى. اگەنتتىك ارنالارى 2017 جىلى حالىقتى مەملەكەتتىك باعدارلامالار تۋرالى اقپاراتتاندىرۋ ءۇشىن ناقتى جۇمىس جاسادى. وسى ماقساتتا جاڭا تەلەجوبالار ىسكە قوسىلدى, ونىڭ ىشىندە «رۋحاني جاڭعىرۋ» باعدارلاماسىن ايتۋعا بولادى, اگەنتتىكتىڭ شىعارماشىلىق توبى قازىرگى تاڭداعى ەڭ ماڭىزدى ماسەلەلەردى دەرەكتى فيلمدەرگە ارقاۋ ەتتى, سونىمەن بىرگە تەلەارنالار ءىرى فورۋمدارعا اقپاراتتىق قولداۋ كورسەتىپ, حالىقارالىق جانە جەرگىلىكتى ءىس-شارالاردى تاراتتى», دەدى ول.
سونىمەن قاتار باسقارما ءتورايىمى ماماندار دايىنداۋ جانە ولاردىڭ بىلىكتىلىگىن ارتتىرۋ جۇمىسىنا دا باسا نازار اۋدارىلعانىن باياندادى.
«وسى ماقساتتا «TRT» تەلەراديوكومپانياسى, «Anadolu» اقپارات اگەنتتىگى جانە «France 24» تەلەكومپانياسىمەن كەلىسىم جاسالدى. قىزمەتكەرلەر «دىبىستىق ينجەنەريا», «وپەراتورلىق شەبەرلىك», «جارىق بەرۋشى شەبەرلىگى», «اسكەري جۋرناليستيكا», «ەنەرگەتيكالىق جۋرناليستيكا» جانە ت.ب. باعىتتار بويىنشا ءبىلىم الدى. جىل قورىتىندىسى بويىنشا «حابار» قىزمەتكەرلەرىنىڭ 70 پايىزى ءبىلىم الىپ, بىلىكتىلىگىن جەتىلدىردى», دەدى ول.
باسقارما ءتورايىمىنىڭ ورىنباسارى رينات كەرتاەۆ تا بۇگىنگى تاڭدا جاس جۋرناليستەردى دايىنداۋدا ارنا تاراپىنان اتقارىلىپ جاتقان جۇمىستار اۋقىمدى ەكەنىن ايتىپ ءوتتى.
«حابار» ارناسىنىڭ قورىتىندىسى بويىنشا ارنا ديرەكتورى ەرلان يگىسىنوۆ بايانداپ: «باستى نازاردى ازاماتتارىمىزدىڭ ءتۇرلى ماسەلەلەر بويىنشا حابارىن ارتتىراتىن الەۋمەتتىك ماڭىزدى جوبالارعا اۋدارامىز. الەۋمەتتىك باعىتتاعى باعدارلامالار اراسىندا – «داۆايتە گوۆوريت!», ء«بىلۋ ماڭىزدى», ء«بىزدىڭ نازاردا», «انا مەن بالا» جانە ت.ب. باعدارلامالار بار. وتكەن جىلى ارنانىڭ تاپسىرىسىمەن 14 تەلەحيكايا تۇسىرىلگەن. ولاردىڭ اراسىندا «قاريا», «مەزگىلسىز ماحاببات», «انا جۇرەگى» جانە باسقالارى بار. ال «وگەي جۇرەك» (2016) تەلەحيكاياسى «ABU Prizes» حالىقارالىق بايقاۋىندا قازىلاردىڭ ارنايى سىيلىعىنا يە بولدى. ارنانىڭ ديستريبيۋتورلىق قىزمەتىنىڭ ناتيجەسىندە موڭعوليا, رەسەي, قىتاي جانە وڭتۇستىك-شىعىس ازيانىڭ 9 ەلىندە تەلەحيكايالار مەن باعدارلامالاردى ترانسلياتسيالاۋ قۇقىعىن بەرۋ تۋرالى كەلىسىم جاسالدى», دەدى.
«حابار 24» ارناسى مەن «Kazakh TV» تەلەارناسىنىڭ باسشىلارى دا وتكەن جىلى جاسالعان جۇمىستار تۋرالى كەڭىنەن اقپارات بەردى.
ايتا كەتەتىن تاعى ءبىر جايت, بۇگىننەن باستاپ «حابار» ارناسىندا پحەنچحان قالاسىنداعى قىسقى وليمپيا ويىندارى كورسەتىلەدى. ويىنداردان حابار تاراتۋ ءۇشىن وڭتۇستىك كورەيا ەلىنە ەكى شىعارماشىلىق توپ جىبەرىلگەن. ارنا ەفيرىنەن جارىستار تىكەلەي ەفيردە جانە الدىن الا جازىلىپ بەرىلەدى, سونداي-اق كۇن سايىن ارنايى كۇندەلىكتەر دايىندالادى.
راۋان قايدار,
«ەگەمەن قازاقستان»
