سوڭعى كەزدەرى ءبىزدىڭ قوعام ونلاين قارىز بەرۋ دەگەن ماسەلەگە تاپ بولىپ وتىر. مۇنداي قارىز بەرەتىن شاعىن كومپانيالاردىڭ جىلدىق پايىزدىق وسىمدەرى 700-دەن 1000 پايىزعا دەيىن. ايىپپۇل مەن تولەماقى ءوسىمى دە شەكتەۋسىز. قارىز الۋ ءۇشىن ونلاين كومپانيانىڭ سايتتارىنداعى تالاپتارىن كومپيۋتەردە باسىپ, كەرەكتى سومانى الىپ جۇرە بەرەسىڭ. وسىنىڭ ءوزى ءتۇرلى كۇدىك تۋدىراتىنى ءسوزسىز. ويتكەنى ونلاين كومپانيالار قارىز الۋشىنىڭ تولەم مۇمكىندىكتەرىن تەكسەرمەي قالاي بەرەدى؟ ءتىپتى قارىز الۋشىنىڭ بۇرىنعى نەسيەلىك تاريحى دۇرىس بولماسا دا قارىز بەرىلەتىنى ايتىلعان. سوندا بۇل «نە قىلعان باتپان قۇيرىق, ايدالادا جاتقان قۇيرىق» دەگەن وي كەلەدى.
كليەنتتىڭ قۇجاتتارى تەكسەرىلمەي, ءوزىن كورمەي (ماس كۇيىندە مە نەمەسە ەسىرتكى شەگىپ العان جوق پا؟) ۇلكەن قاراجاتتى ۇستاتا سالۋ دەگەن قايدان شىققان؟ مۇمكىن ول ادامعا باسقا بىرەۋلەر كومپيۋتەر تۇيمەشەلەرىن زورلىقپەن باسقىزىپ تۇرعان شىعار؟..
قازاقستان رەسپۋبليكاسىنىڭ «شاعىن قاراجات ۇيىمدارى تۋرالى» زاڭىندا مۇنداي وپەراتسيالاردى رەتتەۋ جانە وسىنداي كومپانيالاردىڭ كليەنتتەرىن قورعاۋ قاراستىرىلماعان. بۇل – اتالمىش ونلاين كومپانيالار زاڭنان جانە مەملەكەتتىك رەتتەۋدەن تىس ارەكەت ەتەدى دەگەن ءسوز. سونىمەن قاتار ونلاين كومپانيالار كليەنتتەرىنىڭ كرەديتتىك كارتالارىنىڭ بارلىق دەرەكتەرىن (سونىڭ ىشىندە قورعالاتىن كودتارىن), سونداي-اق ەشقانداي كەلىسىمسىز نەسيەلىك تاريحتارىن تەگىس جازىپ الادى ەكەن. ال بۇل دەگەنىڭىز قازاقستان رەسپۋبليكاسىنىڭ «نەسيەلىك بيۋرو جانە نەسيەلىك تاريحتى جاساۋ» زاڭىنداعى 25-باپتىڭ تالابىن بۇزىپ تۇر.
وسىنى كورگەن سوڭ ءبىز قوعامدا ازاماتتار مەن ونلاين كومپانيالار اراسىندا ەرتەڭگى كۇنى تالاي جايتتار تۋى مۇمكىن ەكەنىن بولجاپ, الدىن الۋ ءۇشىن زاڭ تالاپتارىنا قايشى جاسالىپ جاتقان قارجىلىق وپەراتسيالاردىڭ ارەكەتتەرىن تەكسەرۋدى ءوتىنىپ باس پروكۋرور قايرات قوجامجاروۆتىڭ اتىنا دەپۋتاتتىق ساۋال جولدادىق.
سەرگەي ەرشوۆ,
سەنات دەپۋتاتى
