بۇگىندە قۇرىلىس كومپانيالارى «قاراعايلى» شاعىن اۋدانىندا تۇرعىن ءۇي باعدارلاماسى اياسىندا سالىنعان العاشقى كوپ پاتەرلى 9 قاباتتى ۇيلەردى قولدانىسقا بەرۋدە. قۇرىلىستىڭ نەگىزگى مەردىگەرلەرى بولىپ سەمەيدىڭ ەكى ءىرى كومپانياسى بەلگىلەنگەن. قازىرگى ۋاقىتتا كىرپىش قالاۋ جانە تەرەزەلەردى ورناتۋ جۇمىستارى 100 پايىز اياقتالىپ, تەك ءۇيدىڭ ىشكى ارلەۋ جۇمىستارى جۇرگىزىلىپ جاتىر.
سونىمەن قاتار قالادا مەملەكەت-جەكەمەنشىك سەرىكتەستىگى اياسىندا «فيرما ازيا» جشس 320 ورىندىق بالاباقشا سالىپ جاتىر. نىساندى قولدانىسقا بەرۋ مەرزىمى وسى جىلدىڭ سوڭىنا بەلگىلەنگەن. قازىرگى ۋاقىتتا بۇل جەردە مەكتەپكە دەيىنگى تاربيە وشاعىنىڭ ىرگەتاسى قۇيىلىپ, قابىرعالارى قالانۋدا.
ايماق باسشىسىنىڭ قاتىسۋىمەن «فيرما ازيا» جشس بولاشاقتا بوي كوتەرەتىن «اباي-ارەنا» بىرەگەي كەشەنىنىڭ قۇرىلىس جۇمىستارىن باستاپ كەتتى. بىرەگەي عيماراتتىڭ قۇرىلىس جۇمىستارىنا بىرنەشە ءىرى سەرىكتەستەر مەن وتاندىق مامانداردى شاقىرتۋ كوزدەلىپ وتىر. وبلىس اكىمىنىڭ ايتۋىنشا, بۇل اۋداندا كوپقاباتتى بىرنەشە تۇرعىن ءۇي سالۋ جوسپارلانعان. ەڭسەلى تۇرعىن ۇيلەر اتشاپتىرىم اۋماقتى الاتىن «اباي-ارەنا» كەشەنىن جان-جاعىنان قورشاپ تۇراتىن بولادى.
– قانداي ادەمى شاعىن اۋدان. تاعى دا بىرنەشە تۇرعىن ءۇي بوي كوتەرۋى كەرەك. ولار «اباي-ارەنا» كەشەنىن جان-جاعىنان قورشاپ تۇرسا ۇيلەسىمدى كورىنەدى. شامامەن ول ۇيلەر 12 قابات بولسا جانە ءتۇسىن اشىق تۇستەن تاڭداساڭىزدار. بۇل شاعىن اۋداننىڭ تۇرعىندارىنا, جالپى قالانىڭ حالقىنا كوتەرىڭكى كوڭىل-كۇي سىيلايدى, – دەدى وبلىس اكىمى دانيال احمەتوۆ.
سونىمەن قاتار شاعىن اۋداندا تۇرعىندارعا جايلى بولۋى ءۇشىن كەڭ جولدار توسەلىپ, جاياۋ جۇرگىنشىلەر ايماعى مەن اۆتوتۇراق قاراستىرىلعان. ايتا كەتەيىك, قۇرىلىس جۇمىستارى بارىسىندا شاعىن اۋداندا قۇرىلىسشىلار قالاشىعى سالىنباق. جاتاقحانا مەن كۇنىنە ءتورت رەت تاماق بەرەتىن 200 ورىنعا شاقتالعان اسحانا دا بولادى. ودان باسقا قۇرىلىس جۇمىستارىنا جۇمىلدىرىلاتىن كومپانيالار مەن سەرىكتەستەردىڭ وكىلدەرى جۇمىس ىستەيتىن جەكە كەڭسە دە جوسپارلانعان.
راۋشان نۇعمانبەك,
جۋرناليست
سەمەي
