وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى ايقىن ەلەۋسىزوۆتىڭ ايتۋىنشا, سالادا 120 مىڭنان استام ادام جۇمىسپەن قامتىلعان. بىراق وتكەن جىلى اتىراۋ قالاسى مەن جىلىوي, يندەر اۋداندارىندا شاعىن جانە ورتا بيزنەس سالاسىندا جۇمىسپەن قامتۋ كورسەتكىشىندە ءبىراز تومەندەۋ بايقالدى, باسقارما باسشىسى مۇنى ءوندىرىستىڭ اۆتوماتتاندىرىلۋى مەن كەيبىر مەكەمەلەردە قىزمەتكەرلەر سانىنىڭ قىسقارۋىمەن بايلانىستىرادى.
الىستاعى اۋىل حالقىنىڭ كاسىپ اشىپ, زامانعا ساي تالاپتانۋىنا «بيزنەستىڭ جول كارتاسى-2020» مەملەكەتتىك باعدارلاماسىنىڭ كومەگى كوپ بولىپ وتىر. باعدارلاما جۇزەگە اسىرىلا باستاعان 2010 جىلدان بەرى اتىراۋدا 976 بيزنەس-جوبا قولداۋ تاۋىپ, 5564 جاڭا جۇمىس ورنى اشىلدى. الايدا يندەر, قىزىلقوعا, يساتاي اۋداندارىنىڭ تۇرعىندارى باعدارلاما يگىلىگىن كورۋگە ءالى دە اسىعار ەمەس. ەكىنشى دەڭگەيلى بانكتەردىڭ كاسىپكەرلەردىڭ كەپىل مۇلكىن تىم ارزانعا باعالاۋى دا اۋىل شارۋاشىلىعى جوبالارىنىڭ نەسيە الۋىنا كەدەرگى كەلتىرۋدە.
«سوڭعى بەس جىلدا اۋىل كاسىپكەرلەرىن قولداۋعا جەرگىلىكتى بيۋدجەتتەن 1 157 ملن تەڭگە قاراجات قارالدى. سونىڭ ناتيجەسىندە 242 بيزنەس نىسانى اشىلىپ, 500-دەن استام جۇمىس ورنى قۇرىلدى. بىلتىردىڭ وزىندە 67 جوبا ماقۇلداندى», دەيدى ايقىن ەلەۋسىزوۆ.
قازىر بيزنەس باستايمىن دەگەن ادامعا مەملەكەت تاراپىنان كومەكتىڭ سان ءتۇرى بار. وبلىستىق كاسىپكەرلەر پالاتاسىنىڭ باسشىسى اسىلبەك جاكيەۆ بىلتىر 265 كاسىپكەرلىك سۋبەكتىسى قارجىلاندىرىلىپ, جاڭادان 200 بيزنەس ورنى اشىلعانىن ايتادى. «باستاۋ بيزنەس» جوباسىنا وبلىستا 750 ادام قاتىسقان. الايدا كاسىپكەرلىك نەگىزدەرىن وقىعان 750 ادامنىڭ 130-ى عانا ناقتى ءىس باستاپتى. وبلىس اكىمى نۇرلان نوعاەۆ يساتاي اۋدانىنا جۇمىس ساپارى بارىسىندا وتكىزگەن كوشپەلى ماجىلىستە وسى ماسەلەگە نازار اۋداردى. «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسى اياسىندا اتىراۋ وبلىسىندا 2017 جىلى نەسيەلەۋگە 927 ملن تەڭگە, كەپىلدىكتى قامتاماسىز ەتۋگە 97,6 ملن تەڭگە, «باستاۋ بيزنەس» باعدارلاماسىن جۇزەگە اسىرۋعا 51 ملن تەڭگە بولىنگەن. ايماق باسشىسى بيزنەستى قولداۋعا باعىتتالعان مەملەكەتتىك باعدارلامالاردى جۇزەگە اسىرۋ كەزىندە وقىتىلعان ادامداردىڭ سانىنا ەمەس, ونىڭ ناتيجەسىنە, تيىمدىلىگىنە نازار اۋدارۋ كەرەكتىگىن ايتتى.
– 750 اۋىل تۇرعىنىنىڭ بيزنەس تۋرالى ءبىلىم العانى جاقسى, بىراق سولاردىڭ ىشىنەن تەك 130-ى عانا كاسىپ اشقانى ونىڭ تيىمدىلىگى تومەن بولعانىن كورسەتەدى. ادامداردىڭ ىنتاسىن, بيزنەسكە بەيىمدىلىگىن ەسكەرۋ كەرەك. قىزىلقوعا اۋدانىندا 253 ادام وقىتۋدان وتكەن, ناقتى ءىس باستاعانى – 22 ادام. قالعاندارى نەلىكتەن تىس قالىپ قويدى؟ كاسىپكەر بولعىلارى كەلەتىن تاعى دا 231 ادامعا قانداي كومەك كورسەتە الامىز؟ بارلىق جاۋاپتى ورگاندار وسى باعىتتا جۇمىس ىستەۋى كەرەك, – دەدى نۇرلان نوعاەۆ.
قازىر ايماقتا 20 مىڭعا جۋىق ادام جۇمىسسىز رەتىندە تىركەۋدە تۇر. قولدا بار مۇمكىندىك پەن مەملەكەتتىڭ كومەگىن پايدالانىپ, ءىس باستايمىن دەگەن ازاماتتارعا كاسىپكەر اتانۋ اسا قيىن ەمەس. باستىسى – نيەت.
باقىتگۇل باباش,
«ەگەمەن قازاقستان»
اتىراۋ وبلىسى
