تاسس اقپارات اگەنتتىگىنىڭ حابارلاۋىنشا, جەر سىلكىنىسىنىڭ وشاعى حۋاليان ايماعىندا بولعان. تايۆان سەيسمولوگتارى ونىڭ ماگنيتۋداسى 6 بالدان اسقانىن حابارلادى. دەرەكتەرگە سۇيەنسەك, ەلدە ءبىر كۇن ىشىندە جەر 180 مارتە تەربەلگەن.
اپاتتىڭ سالدارىنان جاعالاۋداعى بىرقاتار عيماراتقا زاقىم كەلگەن. ءتىپتى كەيبىر كەشەندەر قيسايىپ, قۇلاۋدىڭ الدىندا تۇر. قۇتقارۋشىلار ىزدەۋ جۇمىستارىن جالعاستىرىپ جاتىر. BBC ارناسى جوعالعان ادامداردىڭ باسىم بولىگى سول قيراعان ۇيىندىلەردىڭ استىندا قالۋى مۇمكىن ەكەنىن ايتادى.
وقيعادان كەيىن قىتاي سەكىلدى كورشى ەلدەر كومەك قولىن سوزعان. تايۆان تاراپى سولاردىڭ ىشىنەن قىتايدىڭ جاردەمىنەن باس تارتىپ, قۇتقارۋ شارالارىنا وزدەرىنىڭ شاماسى جەتەتىنىن مالىمدەدى. دەگەنمەن رەسمي وكىلدەر بۇل شەشىمنەن ەشقانداي ساياسي استار ىزدەمەۋ كەرەك ەكەنىن جەتكىزدى. جالپى قىتاي مەن تايۆان اراسىنداعى قارىم-قاتىناس 1949 جىلى بۇزىلعان بولاتىن. كەيىنىرەك ءوزارا مامىلەگە كەلگەندەي كورىنگەنىمەن, ءىشىنارا ءبىر-ءبىرىن مويىندامايتىنى بايقالادى.
تايۆان – ەكى تەكتونيكالىق تاقتانىڭ قيىلىسقان جەرىندە ورنالاسقان. سوندىقتان مۇندا جەر سىلكىنىسى ءجيى بولىپ تۇرادى. ەكى جىل بۇرىن ماگنيتۋداسى 6,4 بالدىق اپات كەلىپ, 117 ادامنىڭ ءومىرىن جالماعان-دى. ال 1999 جىلعى جەر سىلكىنىسى كەزىندە 2400-گە جۋىق ادام قايتىس بولعان.
