العاشقى كانديداتتار رەتىندە سەربيا مەن چەرنوگوريا اتالادى. الايدا ولاردىڭ ماسەلەسى وزگەشە. ەڭ اۋەلى ەكى مەملەكەت ءوزارا كەلىسپەۋشىلىكتى رەتتەۋى ءتيىس. ەگەر كەلىسسوزدەر تابىستى اياقتالسا, ەكى مەملەكەت 2025 جىلعا قاراي ەو قۇرامىنا ەنەدى. جاڭا ستراتەگياعا ساي, البانيا مەن ماكەدونياعا تاياۋ ارادا وداق قۇرامىنا كىرۋ جونىندەگى كەلىسسوزدەر جۇرگىزۋگە ۇسىنىس جاسالادى. بوسنيا جانە گەرتسەگوۆينا دا مۇشە مەملەكەت اتانۋعا نەگىزگى كانديداتتىڭ ءبىرى. قۇجاتتا كوسوۆونىڭ وداق قۇرامىنا ەنۋ ءۇشىن ەۋروپا مەملەكەتتەرىمەن بايلانىسىن نىعايتۋ قاجەتتىگى ايتىلعان.
الايدا جوعارىدا اتى اتالعان مەملەكەتتەر ەۋرووداق قۇرامىنا كىرمەس بۇرىن بىرقاتار ماڭىزدى مىندەتتەردى ورىنداۋى ءتيىس. ولار: زاڭنىڭ ۇستەمدىگى, قاۋىپسىزدىك سالاسىنداعى ارىپتەستىكتى نىعايتۋ جانە كوشى-قوندى باقىلاۋ, ەكونوميكالىق دامۋعا قولداۋ, ەنەرگەتيكالىق قاۋىمداستىقتى كەڭەيتۋ, تسيفرلى ەكونوميكاعا ءوتۋ جانە كورشى ەلمەن تاتۋ قارىم-قاتىناس ورناتۋ. ەۋروپا كوميسسياسىنىڭ وداقتى كەڭەيتۋ جانە ساياسات جونىندەگى وكىلى يوحاننەس حاننىڭ ايتۋىنشا, بالقان تۇبەگى ەلدەرىندە ءالى كۇنگە دەيىن جەمقورلىق, تۇراقسىز ەكونوميكا جانە شەكارالىق كەلىسپەۋشىلىك سەكىلدى تۇيتكىلدەر جەتەرلىك.
جالپى باتىس بالقان ەلدەرىن ەۋروپا وداعىنا قابىلداۋ ماسەلەسى بىلتىر بولگاريا تاراپىنان كوتەرىلگەن بولاتىن. مۇنى ستراتەگيانى قابىلداۋ بارىسىندا ەلدىڭ سىرتقى ىستەر ءمينيسترى ەكاتەرينا زاحاريەۆا ەرەكشە اتاپ ءوتتى.
سونىمەن قاتار ەۋروپالىق كوميسسيانىڭ پرەزيدەنتى جان-كلود يۋنكەر 2017 جىلعى جولداۋىندا ەۋروپا وداعىن كەڭەيتۋگە ءازىر ەكەنىن جەتكىزگەن بولاتىن. بۇعان دەيىن قارت قۇرلىقتاعى ەكونوميكالىق الەۋەتى ورتاڭقول مەملەكەتتەردەن باقۋاتتى ەلدەرگە حالىقتىڭ جاپپاي كوشۋى سەبەبىنەن وداققا جاڭا مۇشەلەر قابىلداۋعا تىيىم سالىنعان بولاتىن.
ساياسي تاقىرىپتا جازىپ جۇرگەن Politico سايتى جاڭا ستراتەگيانى «ىزعارلى ماحابباتقا» تەڭەيدى. پورتال ەو كوشباسشىلارىنىڭ باتىس بالقانعا ەرەكشە نازار اۋدارۋىن رەسەي, قىتاي جانە تۇركيا مەملەكەتتەرىنىڭ وڭىردەگى بەلسەندىلىگىنىڭ ارتۋىمەن تۇسىندىرەدى. ونىڭ ۇستىنە 2015 جىلعى ميگراتسيالىق داعدارىس كەزىندە بوسقىنداردىڭ باتىس بالقان ارقىلى ەۋروپاعا ۇدەرە كوشۋى ايماقتىڭ ەۋروپا وداعىنداعى تۇراقتىلىقتى ساقتاپ قالۋداعى ماڭىزىن كورسەتەدى.
«ەگەمەن-اقپارات»
