سۋرەتتى تۇسىرگەن مايگۇل سۇلتان
سەميناردا قوعام قايراتكەرى بەرىك ابدىعالي ۇلى جينالعان كوپشىلىككە اشىق لەكتسيا وقىدى. تاريحشى ءوزىنىڭ جاڭا جارىق كورگەن «الاشوردانىڭ اسكەري قۇرىلىمى (1917-1920 جج.)» اتتى كىتابىنىڭ نەگىزىندە الاشوردا ۇكىمەتىنىڭ ۇلتتىق اسكەرىنىڭ قالىپتاسۋ كەزەڭىن جان-جاقتى باياندادى. ول العاش رەت ماسكەۋ, سانكت-پەتەربور, ومبى جانە تومسك قالالارىنىڭ ارحيۆتەرى مەن كىتاپحانالارىندا ساقتالعان قۇجاتتىق دەرەكتەردى كەلتىرە وتىرىپ, الاشوردا ۇكىمەتىنىڭ سول داۋىردەگى ۋاقىتشا ءسىبىر ۇكىمەتى, كازاكتاردىڭ اسكەري توپتارى سياقتى ماڭىزدى تاريحي فاكتورلارمەن ارا-قاتىناسىن ايتتى.
ۇلتتىق اكادەميالىق كىتاپحانادا وتكەن القالى جيىنعا قاتىسقان كورنەكتى مەملەكەت جانە قوعام قايراتكەرلەرى, ديپلوماتتار, ۇلت زيالىلارى مەن زەرتتەۋشى-عالىمدار دا ءسوز سويلەپ, پايىمدى پىكىرلەرىن ورتاعا سالدى.
اكادەميا باسشىسى دارحان قىدىرالى بەرىك ابدىعالي ۇلىنا راحمەت ايتىپ, «تۇركى حالىقتارىنىڭ تاريحىن زەرتتەۋگە قوسقان ۇلەسى ءۇشىن» TWESCO العىس حاتىمەن ماراپاتتادى.
ايتا كەتەيىك, حالىقارالىق تۇركى اكادەمياسى بىلتىر «تۇلعالار تاعىلىمى» اتتى سەمينارلار لەگىن باستاعان. ءداستۇرلى سەميناردىڭ ەڭ العاشقىسى تاتار حالقىنىڭ كورنەكتى قايراتكەرى ءابدىراشيت يبراھيمگە ارنالعان بولاتىن.
مايگۇل سۇلتان,
«ەگەمەن قازاقستان»
