ء«بىزدىڭ مينيسترلىك XXIII - قىسقى وليمپيادا ويىندارىنىڭ كورسەتىلىمىن جۇزەگە اسىراتىن قۇقىققا يە كومپانيامەن كەلىسسوزدەردى اياقتادى. وليمپيادا ويىندارىن اقپاننىڭ 9-ى مەن 25-ءى ارالىعىندا ەل تۇرعىندارى وتاندىق ارنالاردىڭ تىكەلەي ەفيرىنەن تاماشالايدى. دۇنيەجۇزى نازار اۋداراتىن ءدۇبىرلى دودانى «حابار», «Qazaqstan» مەن «Qazsport» ارنالارى تىكەلەي ترانسلياتسيالاۋ قۇقىعىنا يە بولدى», دەدى اقپارات جانە كوممۋنيكاتسيالار ءمينيسترى داۋرەن اباەۆ.
ءمينيستردىڭ سوزىنشە, «Qazaqstan» مەن «Qazsport» ارنالارى 150 تىكەلەي ترانسلياتسياعا شىعۋدى جوسپارلاپ وتىر. ال, «حابار» ارناسى ارقىلى 208 ساعاتتى قۇرايتىن 100 ترانسلياتسيا ەفيرگە شىعادى.
سونىمەن قاتار, قازاق جانە ورىس تىلدەرىندە وليمپيادا كۇندەلىگىن كورەرمەن نازارىنا ۇسىنۋ جوسپارلانعان. دەمەك, پحيونچحانعا ارنايى بارعان تىلشىلەر توبى كۇندەلىكتى سوڭعى اقپاراتتارىمەن بولىسەدى.
ء«بىزدىڭ جەرلەستەرىمىز 9 سپورت ءتۇرى بويىنشا سايىسقا تۇسەدى. تولىق اقپاراتتى تومەندەگى سىلتەمەدەن الۋىڭىزعا بولادى. وڭتۇستىك كورەيانىڭ الاڭدارىندا ەل نامىسىن قورعايتىن جەرلەستەرىمىزگە تەك قانا جەڭىس تىلەيمىز», دەگەن مينيستر سپورتشىلارعا تىلەكتەستىگىن ءبىلدىردى.
ەستەرىڭىزگە سالا كەتسەك, XXIII قىسقى وليمپيادا ويىندارى وڭتۇستىك كورەيانىڭ پحيونچان قالاسىندا 2018 جىلدىڭ 9 جانە 25 اقپانى ارالىعىندا وتەدى. الەمنىڭ 95 ەلىنەن 2900 سپورتشى 15 سپورت تۇرىنەن 102 مەدال جيىنتىعى ءۇشىن باق سىناسادى. قازاقستاندىقتار سپورتتىڭ 9 ءتۇرى بويىنشا جارىستارعا قاتىسادى. ولار: بياتلون, مانەرلەپ سىرعاناۋ, كونكي تەبۋ, شورت-ترەك, تاۋ شاڭعىسى, شاڭعى جارىسى, ترامپليننەن شاڭعىمەن سەكىرۋ, فريستايل اكروباتيكا, موگۋل.
