جيىرما جىل بويى جوعارى ليگادا باسەكەگە ءتۇسىپ, 2017 جىلدىڭ سوڭىندا جەڭىمپازداردىڭ تۇعىرىنا كوتەرىلگەنىن بىلەمىز. وسىلايشا «سپارتا نوماد» كتك كومانداسى ءۇشىن وتكەن جىل ولجالى اياقتالدى. جەرلەستەرىمىز كتك-نىڭ جوعارى ليگاسىندا ءبىرىنشى ورىن الىپ, اقىرى ايدى اسپانعا شىعاردى. اتالمىش كوماندانىڭ بۇل جەڭىسى ءبىر جاعىنان تاۋەلسىزدىك كۇنىمەن ورايلاسىپ, وتانداستار ءۇشىن توسىن سىي بولدى.
نە دەسەك تە «سپارتا نوماد» كوڭىلدى تاپقىرلار كلۋبىنىڭ ەڭ جوعارعى اتاعىن العاش رەت يەلەنگەن كوماندا بولىپ قالا بەرمەك. قازاقستاندىقتار بۇل جەڭىستى 17 جىل بويى كۇتكەن ەدى!
ورايى كەلىپ تۇرعاندا استانالىق كتك كومانداسى 2015-2016 جىلدارى كتك جوعارى ليگاسىنىڭ مارەسىنە شىعىپ, وتكەن جىلى سۆەتلوگورسكىنىڭ التىن قالاسىندا ۇلكەن كيۆين يەگەرلەرى اتاندى.
الماتىداعى جانكۇيەرلەرىمەن كەزدەسۋگە سەرىكجان نەسىپباەۆ, دانيار ءجۇمادىلوۆ, الماز نۇرتازا, ديدار جەكسەكوۆ, ولجاس رىمباەۆ, ەركەبۇلان مىرزابەك, باۋىرجان وماروۆ, ارتەم پريماك, گۇلنارا سەيىلباەۆا مەن قۇمار لۇقمانوۆ كەلدى.
كوڭىلدى تاپقىرلار بىردەن بەيرەسمي اڭگىمەگە كوشۋدى ۇسىندى. زالدا وتىرعاندار ولاردى سۇراقتاردىڭ استىندا قالدىردى دەسە دە بولادى. ارينە جەڭىس تاقىرىبى دا قالىس قالعان جوق.
جانكۇيەرلەردى اسىرەسە, كەلەشەك تۋرالى سۇراقتار قىزىقتىردى. سەرىكجان نەسىپباەۆ كەلەسى جىلى قازاقستاندىق كتك ليگاسىنىڭ قايتا قالپىنا كەلەتىنىنە ۋادە بەرىپ, «ازىرگە شاعىن, تاجىريبەلىك فورماتتا قۇرىلسا دا, ليگا بولادى» دەپ مالىمدەدى.
ايناش ەسالي,
«ەگەمەن قازاقستان»
الماتى
