راس, مۇنداي ورانجەرەيا ەلىمىزدىڭ باسقا دا قالالارىندا بار. بىراق ولار تەك عىلىمي ماقساتتا عانا پايدالانىلادى. ال اۋماعى 2000 شارشى مەتردى الىپ جاتقان تەمىرتاۋلىق باقتىڭ ەسىگى كەلەم دەۋشىلەرگە قاشاندا اشىق.
«قىسقى باقتاعى» فلورا بىتكەننىڭ دەنى الماتى مەن قاراعاندى بوتانيكالىق باقتارىنان اكەلىنگەن. مۇندا قالا تۇرعىندارى سىيلاعان گۇل تۇقىمدارى دا بار. سونداي-اق تانىمال تۇلعالار ەككەن ەكزوتيكالىق وسىمدىكتەر دە جەتكىلىكتى. مىسالى, عارىشكەرلەر توقتار اۋباكىروۆ پەن تالعات مۇساباەۆ ساۋىراعاش پەن ولەاندر وتىرعىزعان.
مۇنداعى وسىمدىك اتاۋلىنىڭ ىشىندەگى بيىگى – قۇرما پالماسى مەن ۆاشينگتونيا. ال تومەندە ۇيىسا وسكەن ترادەسكانتسيا گۇلدەرىنىڭ جانىنا ايالداماي وتە شىعۋ ءتىپتى دە مۇمكىن ەمەس. كۇتىمى وتە كۇردەلى گيبيسكۋس (قىتاي راۋشان گۇلى) گۇلدەرى دە كوزدىڭ جاۋىن الىپ, ادامدى كادىمگىدەي اربايدى.
ءبىر تاڭعالارلىعى, باقتا جىل سايىن بانان جەمىس بەرەدى ەكەن. جەۋگە جارامسىز, ارينە. ساندىك اعاش سۇرپىنان: تەكستيلدى اباكا. سونىمەن قاتار, ورانجەرەيادا زوولوگيالىق بۇرىش تا بار. كەلۋشىلەر مۇندا تاۋىس, قويان, كىرپى جانە باسقا دا جانۋارلاردى تاماشالاي الادى.
ەكزوتيكالىق وسىمدىكتەردى باپتاۋ وڭاي شارۋا ەمەس. باقتىڭ ىشىندە 12 گرادۋستان تومەن تۇسپەيتىن جىلىلىق ءاردايىم ساقتالۋى ءتيىس. وسىمدىكتەردىڭ بارلىعى دا قولمەن سۋارىلادى. وسى جانە باسقا دا ۇقىپتىلىق پەن ىقتياتتىلىقتى قاجەت ەتەتىن جۇمىستىڭ بارلىعىن ەكى-اق ادام – اگرونوم بوتاگوز تاشەنوۆا مەن ونىڭ كومەكشىسى اتقارادى.
مەرەيتوي جىلى جابايى تابيعاتتىڭ وزىندە وتە سيرەك گۇلدەيتىن شەففلەرا دا ءبۇر جارىپ, توسىنسىي جاساپتى. «شەففلەرانى وسىدان 10 جىل بۇرىن بىزدەگى ءداستۇر بويىنشا جاس جۇبايلار وتىرعىزعان بولاتىن. جاقىندا قاراساق, ءبۇر جارا باستاپتى. بۇل دەگەنىڭىز ۇلكەن قۋانىش بولدى, سەبەبى شەففلەرا بىزدە العاش رەت گۇلدەدى», دەيدى بوتاگوز تاشەنوۆا قۋانىشىن جاسىرا الماي.
قايرات ءابىلدا,
«ەگەمەن قازاقستان»
قاراعاندى وبلىسى,
تەمىرتاۋ قالاسى
