«قالانىڭ عاشىقتار اللەياسى اۋماعىنداعى ەرتىس وزەنىنىڭ اعىسىندا جانارماي داعى پايدا بولعانى تۋرالى دابىل ءبىزدىڭ ورتالىقتىڭ «ەكولوگيالىق ساقشى» نومىرىنە جۇما كۇنى كەلىپ ءتۇستى. ءبىز جاعدايدى بىردەن وبلىستىق ەكولوگيا دەپارتامەنتىنە حابارلادىق. سول كۇنى اتالعان دەپارتامەنت پەن ءبىزدىڭ ورتالىق ماماندارى وقيعا ورنىنا بارىپ, سۋدىڭ بەتىنەن سىنامالار الدى. جۇرگىزگەن تالداۋلار سۋدىڭ قۇرامىنداعى مۇنايدىڭ ۇلەسى مولشەردەن 60 ەسە ارتقانىن كورسەتتى. اعىستىڭ ءسال جوعارى بولىگىندە مۇنايدىڭ سۋداعى ۇلەسى 14 ەسە كوپ ەكەنى بەلگىلى بولدى», دەيدى ەكولوگيالىق قاۋىپسىزدىك ورتالىعى جشس-ءنىڭ ديرەكتورى گەننادي كورەشكوۆ. ورتالىق باسشىسى ەرتىسكە مۇناي كەمەجاي اۋدانىنان جەتۋى مۇمكىن دەگەن بولجام ايتادى. ويتكەنى سول ماڭدا قۇم تاسيتىن قايىقتار تۇرادى.
ەرتىس وزەنىندە ورىن العان جاعدايعا بايلانىستى كەشە ارنايى تۇسىنىكتەمە بەرگەن وبلىستىق ەكولوگيا دەپارتامەنتىنىڭ باسشىسى دميتري كاۆريگين وقيعاعا قاتىستى جەدەل تەكسەرۋ شارالارى قولعا الىنىپ, سۋدىڭ لاستانۋ كوزىن انىقتاۋ ءۇشىن وسكەمەن قالاسىنىڭ ىشكى ىستەر باسقارماسىنا حات جولدانعانىن حابارلادى.
«ەكولوگيا زاڭناماسىن بۇزۋشىلاردى تاپقاننان كەيىن قورشاعان ورتاعا كەلگەن زيان مولشەرىن انىقتايتىن بولامىز. وزەنگە توگىلگەن مۇناي قالا تۇرعىندارى ءۇشىن قاۋىپ توندىرمەۋگە ءتيىس. ويتكەنى وسكەمەندىكتەر اۋىز سۋدى 40 مەتر تەرەڭدىكتەگى جەر استى سۋلارىنان الىپ پايدالانادى», دەيدى ول.
ازامات قاسىم,
«ەگەمەن قازاقستان»
وسكەمەن
