وسى ماقساتتا گەرمانيادان تۇرعىن ءۇي-كوممۋنالدىق شارۋاشىلىعى مەن جول قۇرىلىسى سالاسىنىڭ ساراپشىسى ەرۆين فلەيشەردى ارنايى شاقىرعان. «نەمىس مامانى تەحنيكالار مەن قىزمەتكەرلەر سانىن كوبەيتۋ قاجەتتىگىن ايتتى. ونىڭ ۇسىنىس-پىكىرلەرىن ەسكەرىپ, «Foton» دەپ اتالاتىن كوپ فۋنكتسيالى 10 جاڭا ماشينا ساتىپ الدىق. ءبىر جاقسىسى, بۇل تەحنيكانى قىستا دا, جازدا دا جول تازالاۋعا پايدالانۋعا بولادى. سونىمەن قاتار اۆتوپاركىمىز 4 گرەيدەرمەن جانە 2 شنەكتى روتورمەن تولىقتى. وتكەن جىلى گرەيدەرلەر جول ۇستىندەگى مۇزدى تازالاي الماعاندىقتان فيندىك مۇز جارعىش تەحنيكا ساتىپ الدىق. قالا تازالىعىنا جاۋاپتى «وسكەمەن ءتارتىپ» مەكەمەسىندەگى جۇمىسشىلار سانىن 500-گە جەتكىزدىك. قىسقاسى, تەحنيكا مەن جۇمىسشىلار ساقاداي ساي. الايدا قالادا بىلتىرعىداي قالىڭ قار مەن سىرەسكەن مۇزدىڭ جوقتىعىنان بۇل تەحنيكالاردى ءالى پايدالانا الماي وتىرمىز. ازىرگە قاڭتارىلىپ تۇر», دەيدى وسكەمەن قالاسىنىڭ اكىمى قۋات تۇماباەۆ. نەمىس ساراپشىسى بىزدەگى كوبىنە اشىق-شاشىق جاتاتىن كاناليزاتسيالىق ليۋكتەردىڭ ورنالاسۋىنا قاتىستى دا ءوز ويىن ءبىلدىرىپتى. شەتەلدىك مامان مۇنىڭ كولىك جۇرگىزۋشىلەرىنە قولايسىز ەكەندىگىن ايتىپ, ەۋروپا مەن اقش-تاعىداي جاياۋ جۇرگىنشىلەر جولىنا ورنالاسقانى دۇرىس دەپتى.
قالا باسشىسى وتكەن جىل وسكەمەن ءۇشىن تابىستى بولعانىن, وبلىس ورتالىعىندا ەلباسىنىڭ قاتىسۋىمەن «نۇرلى جول» ساياباعى اشىلعانىن, شاھاردا 23 شاقىرىم جول ورتاشا جوندەۋدەن وتكەنىن, 20 جىلعا جۋىق ءۇي كەزەگىندە تۇرعان تۇرعىندار باسپاناعا قول جەتكىزگەنىن ايتادى. ال 2018 جىلى قالا كوشەلەرىن جارىقتاندىرۋ, اباتتاندىرۋ, جولداردى كەڭەيتۋ جۇمىستارى جالعاسىن تاۋىپ, جىبەك ماتالار شاعىن اۋدانىندا ۇلكەن ساياباق سالىنادى. تاعى ءبىر جاعىمدى جاڭالىق, جاقىندا وسى شاعىن اۋداندا 1000 ورىندىق قازاق مەكتەبىنىڭ قۇرىلىسى باستالدى.
ازامات قاسىم,
«ەگەمەن قازاقستان»
وسكەمەن
