كوپشىلىكتىڭ جانى قىسىلعاندا, ايتقان جەردەن اۋلاق, اۋرۋ القىمنان العاندا دارىگەرگە جۇگىرەتىنى جاسىرىن ەمەس. اسىرەسە اۋىلداعى اعايىنعا اۋرۋدىڭ الدىن الۋ, العاشقى كومەكتى ساپالى كورسەتۋ ماڭىزدى. ياعني ءار اۋىلدىڭ بىلىكتى مامانمەن جانە مەديتسينالىق قۇرال-جابدىقتارمەن قامتاماسىز ەتىلۋى زامان تالابى.
بۇل ورايدا سايرام اۋدانى, تەسپە اۋىلىندا تاياۋدا پايدالانۋعا بەرىلگەن قۇرامالى ءمودۋلدى مەديتسينالىق پۋنكت تۇرعىندار ءۇشىن قولجەتىمدى ءارى ءتيىمدى بولىپ وتىر. قۇرىلىسى قىرۋار قارجىنى قاجەت ەتپەيتىن ەمدەۋ مەكەمەسىن ىسكە قوسۋعا ەكى-اق اي ۋاقىت كەتكەن. الاڭى 125 شارشى مەتر بولاتىن, مەديتسينالىق قۇرالدارمەن جابدىقتالعان مودۋلدىك كونسترۋكتسيانىڭ قۇنى – 30 ملن تەڭگە. جالپى, سايرام اۋدانىندا بيىل بۇدان بولەك وسىنداي 5 مەديتسينالىق تىرەك ورناتىلادى. ءسويتىپ اۋداننىڭ دەنساۋلىق ساقتاۋ نىسانىنا دەگەن قاجەتتىلىگى 100 پايىز شەشىلمەكشى. سونىمەن قاتار سارىاعاش اۋدانىندا – 13, بايدىبەك اۋدانىندا – 3, تۇلكىباس اۋدانىندا 2 ءمودۋلدى مەدپۋنكت پايدالانۋعا بەرىلەدى.
تەسپە اۋىلى تۇرعىندارىنىڭ قۋانىشىن بولىسكەن وڭتۇستىك قازاقستان وبلىسىنىڭ اكىمى جانسەيىت تۇيمەباەۆ ەلىمىزدە وتاندىق مەديتسينانى دامىتۋعا باسا نازار اۋدارىلىپ جاتقانىن جەتكىزدى.
– ەلباسى ن.نازارباەۆ حالىققا ارناعان ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا مەديتسينالىق كومەكتىڭ قولجەتىمدىلىگى مەن تيىمدىلىگىن ارتتىرۋ قاجەتتىگىن اتاپ كورسەتتى. «حالىقتىڭ ءومىر ءسۇرۋ ۇزاقتىعىنىڭ وسۋىنە جانە مەديتسينالىق تەحنولوگيالاردىڭ دامۋىنا بايلانىستى مەديتسينالىق قىزمەت كورسەتۋگە دەگەن سۇرانىس كولەمى ارتا تۇسەتىن بولادى. قازىرگى دەنساۋلىق ساقتاۋ ءىسى قىمباتقا تۇسەتىن ستاتسيونارلىق ەمگە ەمەس, نەگىزىنەن اۋرۋدىڭ الدىن الۋعا باعىتتالۋعا ءتيىس», ەكەنى دە ەلباسى جولداۋىندا ايتىلدى. مىنە, وسى باعىتتاعى جۇمىستاردى جۇزەگە اسىرۋ ماقساتىندا وبلىس اكىمدىگى تاراپىنان ءتيىستى جۇمىستار اتقارىلىپ جاتىر. ماسەلەن, مەديتسينالىق تىرەكتەردىڭ قۇرىلىسىن جۇرگىزۋگە مودۋلدىك كونسترۋكتسيا ۇلگىسى ۇسىنىلىپ وتىر. ونى قۇراستىرۋ ءتاسىلى ۋاقىتتى ۇنەمدەۋگە جانە بيۋدجەت قاراجاتىن ءتيىمدى جۇمساۋعا وڭ اسەرىن تيگىزەدى. وسىنداي مەديتسينالىق تىرەكتە ناۋقاستارعا ءبىرىنشى مەديتسينالىق-سانيتارلىق كومەك كورسەتىلەتىن بولادى, – دەدى وبلىس اكىمى.
سونداي-اق بۇگىندە سايرام اۋدانىنىڭ ورتالىعى – اقسۋكەنت اۋىلىندا 500 كەلۋشىگە ارنالعان ەمحانا قۇرىلىسى جۇرگىزىلۋدە. بۇدان بولەك, كومپيۋتەرلىك توموگراف ساتىپ الىنىپ, ينسۋلت ورتالىعىن اشۋ جوسپارلانىپ وتىر. ايتا كەتەلىك, وبلىستا جىل سوڭىنا دەيىن تاعى 47 قۇرامالى ءمودۋلدى مەدپۋنكت ىسكە قوسىلماق. جالپى, وڭىردە 846 مەديتسينالىق نىسان حالىققا دارىگەرلىك كومەك كورسەتەدى, ونىڭ 225-ءى مەديتسينالىق تىرەك.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
