فوتو: ەرلان ومار, «ەگەمەن قازاقستان»
بىراق سول ەلەڭ-الاڭ شاقتاعى تاۋەلسىزدىكتى اياقتان تۇرعىزىپ, نىعايتۋ جولىنداعى كول-كوسىر ەڭبەك, توگىلگەن تەر, ازاماتتاردىڭ تەگەۋرىندى ءىس-قيمىلى, قاجىر-قايراتى تۋرالى بىلگەنمەن, ءاربىر ءىستىڭ قانداي قيىندىقتارمەن جۇزەگە اسقاندىعىن جەتىك, ءاربىر ۋاقىتتى ناقپا-ناق بىلە بەرمەيتىنىمىز اقيقات. بۇگىندە تاۋەلسىزدىكتىڭ نىعايۋىنا, ەلىمىزدىڭ ىرگەسى بەرىك ەل بولۋىنا ەڭبەك ەتىپ, ءوز ۇلەسىمىزدى قوسىپ جۇرگەنىمىزگە قۋانامىز جانە تاۋەلسىزدىك تۋرالى تاعىلىمدى اڭگىمەلەردى قۇرمەتپەن تىڭدايمىز.
مەملەكەت باسشىسىنىڭ «تاۋەلسىزدىك ءداۋىرى» اتتى شىعارماسى – ەلەڭ-الاڭ شاقتان بۇگىنگى قالىپتاسىپ, الەم ەلدەرىنە قازاقستاندى تانىتۋعا دەيىنگى ءجۇرىپ وتكەن جولدىڭ جەڭىل بولماعاندىعىن, ول ءۇشىن جۇمسالعان كۇش, ەلباسىنىڭ ماڭىندا جۇدىرىقتاي جۇمىلىپ بىرگە جۇرگەن ازاماتتار تۋرالى جان-جاقتى بىلۋگە مۇمكىندىك بەرەدى.
كىتاپتىڭ سۇبەلى ءتورت ءبولىمى, ونىڭ ىشىندەگى ءار تاقىرىبىنىڭ ءوزى تالاي تاريحتان تاعىلىم بەرەر بولىمدەرى كەشەگى كۇنىمىزدىڭ جازبا بەينەسى, بولاشاعىمىزدىڭ جارقىن داڭعىلى ىسپەتتى. بۇگىنگى قازاقستاندىقتار ەلىمىزدىڭ ەرتەڭىنە نىق سەنىممەن قارايتىنىمىز, مەملەكەتىمىزدىڭ نىعايۋى ءۇشىن, تاۋەلسىزدىگىمىزدىڭ باياندىلىعى ءۇشىن ەڭبەك ەتىپ, ءوز ۇلەسىمىزدى قوسىپ ءجۇرمىز دەپ سانايتىنىمىز اقيقات. كوڭىلگە سەلكەۋ تۇسىرمەيتىن بۇل سەنىمنىڭ, الدىمىزعا اسقاق ماقسات-مىندەت قويا بىلگەن بۇل جىگەردىڭ باستاۋى قايدا جاتىر دەگەن سۇراق تۋىندايدى. قازىرگىدەي الەم ەلدەرىن داعدارىستىڭ, اشتىقتىڭ, سوعىستىڭ – ءتۇرلى زۇلماتتىڭ شىرماۋى شىرماعان تىنىشسىز كەزەڭدە قابىرعالى ەلىمىز, كەڭ-بايتاق جەرىمىز, پاراساتتى باسشىمىز بولماسا, ەرتەڭگە سەنىم ارتۋ تۇرماق, بۇگىنگىنى باعامداپ-بولجاۋدىڭ ءوزى مۇمكىن بولماس ەدى.
«تاۋەلسىزدىك ءداۋىرى» – مەملەكەت باسشىسى ن.نازارباەۆتىڭ قازاقستاندى كەلەشەككە جەتەلەگەن كەمەل ساياساتىنىڭ ناقتى كورىنىسى. ءبىز سەنگەن, ءبىز ارقا سۇيەگەن الىپ كۇشتىڭ قايدان باستاۋ الىپ تۇرعاندىعىن وسى كىتاپتان وقىپ بىلۋگە بولادى. عالىمدارىمىز, ازاماتتار كىتاپقا «تاۋەلسىزدىك ەنتسيكلوپەدياسى» دەگەن اتاۋ بەرۋدە, راسىندا كىتاپ ءوز پاراقتارىنا تاۋەلسىزدىك, ونىڭ ءمانى, ەلىمىزدىڭ تاۋەلسىزدىككە قول جەتكىزۋى مەن قيىن جىلدار, بۇگىنگى قالىپتاسقان كەزەڭ تۋرالى جان-جاقتى دەرەكتى, تەرەڭ مالىمەتتى, سانسىز سۇراقتاردىڭ جاۋابىن توعىستىرۋىمەن بۇل اتاۋعا بارىنشا لايىقتى باسىلىم.
بۇگىنگى قازاقستان جاڭعىرۋدىڭ ءۇش تولقىنىن باسىنان وتكەرىپ, تاريحتىڭ, تاعدىردىڭ سىنىنا جۇتىلىپ كەتپەي جۇلقىنا, ورشەلەنە العا قۇلاش سەرمەگەن, سول سىنداردان شيرىعىپ شىعىپ, الەم نازارى اۋعان بيىك مىنبەلەردەن ماڭىزدى ءۇن قاتا بىلگەن, تورىندە القالى جيىندار وتكىزىپ, ناتيجەسىندە مامىراجاي مامىلەلەرگە ۇيىتقى بولا العان, ءوزىنىڭ ايقىن جولىن تاڭداعان نىق مەملەكەت. سان ۇلتتىڭ وكىلى ءبىر شاڭىراق استىندا تاتۋ-ءتاتتى ءومىر ءسۇرىپ, ءبىر مەملەكەتتىڭ تىلەگىن تىلەپ, ءبىر مەملەكەتتىڭ دامۋىنا ۇلەس قوسىپ, ونىڭ تىنىشتىعىن ءبىر كىسىدەي كۇزەتۋىمەن وزگەلەردى قايران قالدىرىپ, بەيبىتشىلىكتىڭ بەسىگى, اۋىزبىرلىكتىڭ ۇلگىسى بولعان ەل.
«تاۋەلسىزدىك ءداۋىرى» – باق قوناقتاعان بايتاق ەلىمىزدىڭ بايان-شەجىرەسى, ەل مەن جەردى تانيمىن دەگەن زامانداستارىمىزدىڭ دا, كەلەر ۇرپاقتىڭ دا تۇشىنىپ وقيتىن تۋىندىسى دەپ بىلەمىن.
ءپانيا سارمۋرزينا,
ماڭعىستاۋ وبلىستىق مادەنيەت باسقارماسى باسشىسىنىڭ مىندەتىن اتقارۋشى
ماڭعىستاۋ وبلىسى
