شىمكەنت قالاسىن تولىقتاي ارالاعان, بارلىق ۇڭعىل-شۇڭعىلىن بىلەتىن وبلىس اكىمى جانسەيىت تۇيمەباەۆ جاياۋ جۇرگىنشىلەرگە ارنالعان «اربات» جوباسىنىڭ قاي جەرلەردە ورنالاساتىندىعىن بەلگىلەپ بەردى.
قالانى قاق ورتاسىنان قيىپ قوشقاراتا وزەنى وتەدى. جەردىڭ استىن جارىپ شىققان, ەل اۋىزىندا اۋليە قوشقاراتا بۇلاعى اتالاتىن سۋ جاعالاۋىنا بۇرىنعى اكىم اسقار مىرزاحمەتوۆتىڭ ۋاقىتىندا دەمالىس ورنى ورنالاستىرىلعان بولاتىن.
قىسى-جازى ءبىر تەمپەراتۋرادا اعاتىن قوشقاراتا بۇلاعىندا جىلدىڭ ءتورت مەزگىلىندە ادام ۇزىلمەيدى. اسىرەسە اپتاپتىڭ ميدى ساحاراعا سالعانداي قايناتقان ۋاقىتتارىندا تۇرعىندار «بالىق» بولىپ كەتەدى.
ەندى قوشقاراتا جاعالاۋىنان بولەك بەكەت باتىر, ا.اسقاروۆ جانە بەيبىتشىلىك كوشەلەرى دە «اربات» جوباسىنا ەندى.
«اربات» جوباسى اۋەدەن تۇسە قالعان جوق. قالا تۇرعىندارىمەن ءجيى جۇزدەسكەن وبلىس باسشىسى وسى ۇسىنىستى كوبىرەك ەستىگەن. سوندىقتان دا جانسەيىت قانسەيىت ۇلى وسى كوشەلەر بويىندا ورنالاسقان ءدامحانالاردىڭ بىرىنە توقتاپ, تۇرعىندارمەن ءبىر شىنىاياق شاي ۇستىندە تاعى دا پىكىرلەرىن تىڭدادى.
«اربات» جوباسى بويىنشا شاھار تۇرعىندارىنىڭ دەمالىس كۇندەرى ۋاقىتىن جاقسى وتكىزۋىنە جاعداي تۇرعىزىلادى. قولونەر شەبەرلەرى, سۋرەتشىلەر كورمەسى, كادەسىي سياقتى شاعىن دۇكەندەر جۇمىس جاسايدى. قازاق ۇلتىنىڭ سالت-داستۇرلەرى مەن ادەت-عۇرپىن كورسەتۋگە دە مۇمكىندىك تۋعىزىلادى. حالىق اندەرى مەن اۋەسقوي سازگەرلەردىڭ شىعارمالارىن تىڭداۋعا جاعداي جاسالىنباق.
جالپى, بىلتىر وڭتۇستىكتە وتىزدان استام ەسكيزدىك جاڭا جوبالار بەكىتىلگەن. ولاردىڭ قاتارىندا وڭىردەگى ءتۋريزمدى دامىتۋعا باعىتتالعان ەسكيزدەر, سونداي-اق شىمكەنت قالاسىنداعى جاڭا اۋەجاي جانە تەمىر جول ۆوكزالى مەن شاھارداعى كوپ قاباتتى تۇرعىن ءۇي كەشەندەرىنىڭ جوبالارى بار.
وبلىستىق ساۋلەت جانە قالا قۇرىلىسى باسقارماسى باسشىسىنىڭ ورىنباسارى باقتىباي دۇيسەبەكوۆ ساۋلەتتىك جوبالاردىڭ اراسىندا تۇركىستان قالاسىنداعى تاريحي-مادەني ءتۋريزمدى دامىتۋ تۇجىرىمداماسى, «قاسقاسۋ» دەمالىس ايماعى, شىمكەنت قالاسىنداعى شاتقالداردى كوگالداندىرۋ مەن جاياۋ جۇرگىنشىلەرگە ارنالعان «اربات» تيپىندەگى جولدار, «ەسكى قالا» اۋماعى بار ەكەندىگىن ايتادى.
«رۋحاني جاڭعىرۋ» باعدارلاماسىنا سايكەس وبلىس اۋماعىنداعى 500 ەسكەرتكىش انىقتالىپ, ونىڭ ىشىندە 100 نىساننىڭ ءتىزىمى وبلىستىق مادەنيەت باسقارماسىمەن بىرلەسىپ جاسالعان. ولاردىڭ قاتارىندا اۋدان ورتالىقتارىندا سالىناتىن «دوستىق ءۇيى» جوباسى, «قازىعۇرت» تاريحي-ەتنوگرافيالىق كەشەنى, «كاراۋىل- توبە», قوشقاراتا وزەنىنىڭ بويىن جانە «ورداباسى» مەموريالدىق تاريحي-مادەني كەشەنىن اباتتاندىرۋ مەن كوگالداندىرۋ, «كونە تۇركىستان» قالاشىعىن قالپىنا كەلتىرۋ, « ۇلى دالا» ساياباعىنىڭ نوبايى سىندى جوبالار ازىرلەندى», دەيدى ول.
بيىل وڭتۇستىكتە وسىنداي ىرگەلى جۇمىستار اتقارىلاتىن بولادى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
