استانا قالالىق قازاقستان حالقى اسسامبلەياسىنىڭ حاتشىلىعى مەن استانا قالاسى اكىمدىگى جانىنداعى «قوعامدىق كەلىسىم» مەملەكەتتىك مەكەمەسىنىڭ قولداۋىمەن وتكەن شارادا ەلباسىنىڭ بيىلعى جولداۋىنداعى نەگىزگى باسىمدىقتار, سونداي-اق ەتنوسارالىق ۇنقاتىسۋدى قالىپتاستىرۋداعى قازاقستان حالقى اسسامبلەياسىنىڭ ءرولى كەڭىنەن ءسوز بولدى.
جيىندا استانا قالالىق قحا حاتشىلىعىنىڭ مەڭگەرۋشىسى ل.قۇسايىنوۆا: «پرەزيدەنت ءوز جولداۋىنداعى جەتىنشى باعىتتا ەل بىرلىگىن نىعايتۋداعى نەگىزگى باستى مىندەتتەردىڭ ءبىرى ادام كاپتيالى تۋرالى اتاپ ءوتتى. بۇل رەتتە ەلباسىنىڭ قازاقستان جاستارىنىڭ ءۇش ءتىلدى مەڭگەرۋىنە باسا نازار اۋدارعانىن ەسكەرۋىمىز قاجەت. ويتكەنى ءۇش ءتىلدى مەڭگەرۋ ادام كاپيتالىن دامىتۋدىڭ نەگىزگى باعىتى بولىپ تابىلادى», دەدى.
استانا قالالىق قحا عىلىمي-ساراپشىلىق توبىنىڭ توراعاسى, تاريح عىلىمدارىنىڭ دوكتورى ۆ.سالاحوۆ ءوز كەزەگىندە قازاقستان پرەزيدەنتىنىڭ باسشىلىعىمەن ەلىمىز دامىپ, الەمدىك دەڭگەيدەگى جەتەكشى مەملەكەتتەر تاراپىنان لايىقتى باعاسىن العانىن ايتا كەلىپ, «مەملەكەت باسشىسىنىڭ ءاربىر جولداۋى حالىقتى بىرىكتىرۋگە باعىتتالعان. سوندىقتان ءبىز ەلباسى جولداۋىن قولداۋعا جانە ونى ءىس جۇزىندە تياناقتى ورىنداۋعا ءتيىسپىز. الەم قازاق حالقىن ەجەلدەن كەلە جاتقان قاراپايىمدىلىعى مەن دانالىعىنا بايلانىستى قۇرمەت تۇتادى. مۇنداي لايىقتى قۇرمەتكە ءبىز پرەزيدەنتىمىزدىڭ باسشىلىعى ارقاسىندا قول جەتكىزدىك. سوندىقتان ەلباسىنىڭ جولداۋىنا قولداۋ ءبىلدىرىپ, ادال نيەتپەن تالماي ەڭبەك ەتۋىمىز قاجەت», دەگەن ويىن جەتكىزدى.
استانا قالالىق قحا قوعامدىق كەلىسىم كەڭەسىنىڭ توراعاسى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى حالىقارالىق قاتىناستار فاكۋلتەتىنىڭ پروفەسسورى ءا.الپەيىسوۆ: «قازىرگى كەزدە ءتورتىنشى ونەركاسىپتىك رەۆوليۋتسيانى ءسوز ەتەر بولساق, وندا ءبىز شيكىزاتقا دەگەن قىزىعۋشىلىقتان الشاقتاپ, ءوندىرىستى قارقىندى دامىتۋعا باسىمدىق بەرۋىمىز كەرەك. سونىڭ ناتيجەسىندە شيكىزاتقا تاۋەلدى بولماي, بەلگىلى ءبىر جەتىستىكتەرگە قول جەتكىزەمىز. ءارى وندىرىستىك رەۆوليۋتسيا نەگىزىندە ءوز ءومىرىمىزدى جاقسارتا الامىز», دەدى.
سونىمەن قاتار باسقوسۋدا «تۇران-استانا» ۋنيۆەرسيتەتى ەكونوميكا كافەدراسىنىڭ پروفەسسورى, استانا قالالىق قحا عىلىمي-ساراپشىلىق توبىنىڭ مۇشەسى و.اليەۆ, استانا قالالىق قحا توراعاسىنىڭ ورىنباسارى, «ۆان» ارميان ەتنومادەني بىرلەستىگىنىڭ جەتەكشىسى س.سالۋميان, قحا مۇشەسى, استانا قالالىق «ۆايناح» ەتنومادەني ورتالىعىنىڭ توراعاسى س.گەروەۆ, «قازاقستانداعى ۇيعىرلاردىڭ رەسپۋبليكالىق ەتنومادەني ورتالىعى» قب توراعاسىنىڭ ورىنباسارى ر.ابدۋسالاموۆ ءسوز سويلەدى. ولار ن.نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنىڭ ماڭىزدى ىستەردىڭ تياناقتى ورىندالۋىن مىندەتتەگەن ستراتەگيالىق قۇجات بولىپ سانالاتىنىن, سوندىقتان بارشامىزدىڭ جولداۋدا اتاپ كورسەتىلگەن مىندەتتەردى ورىنداۋعا بەلسەنە اتسالىسۋىمىز قاجەتتىگىن, الدىمىزدا ەلباسى ايقىنداپ بەرگەن ون باعىتتا جۇمىلا جۇمىس ىستەۋ مىندەتى تۇرعانىن ءسوز ەتتى.
سونداي-اق باسقوسۋعا قاتىسۋشىلار بيىلعى جولداۋدىڭ جاستاردى قولداۋعا باعىتتالعانىن, وسى ورايدا جاستارعا ۇلكەن جاۋاپكەرشىلىك جۇكتەلىپ وتىرعانىن, اسىرەسە ولار يندۋستريانى تسيفرلاندىرۋ جانە جاڭا تەحنولوگيانى ەنگىزۋ ىسىنە بەلسەندى تۇردە اتسالىسۋى كەرەكتىگىن اتاپ كورسەتتى. جيىندا ءسوز العان ەتنوستار وكىلدەرىنىڭ ايتۋىنشا, تاعدىردىڭ تالايىمەن قازاقستان جەرىنە كەلگەن كەزدە جانە ودان كەيىن دە وزدەرىنە ءاردايىم قولداۋ كورسەتىپ كەلە جاتقان قازاق حالقىنىڭ ءتىلى مەن تاريحىن ءبىلۋ ماڭىزدى.
جولدىباي بازار,
«ەگەمەن قازاقستان»
