ۇيىم جەتەكشىلەرىنىڭ ايتۋىنشا, الەمدىك الەۋمەتتىك-ەكونوميكالىق ۇدەرىستەردە تۇبەگەيلى وزگەرىستەردىڭ ورىن الۋى ەڭبەككەرلەر ومىرىنە جانە كاسىپوداقتار قوزعالىسىنا جاڭا تالاپتار مەن مىندەتتەر, ەرەكشە جاۋاپكەرشىلىك جۇكتەپ وتىر. سەبەبى جاھان جۇرتى ءتورتىنشى ونەركاسىپتىك رەۆوليۋتسيا ءداۋىرى – تەرەڭ تەحنولوگيالىق وزگەرىستەر كەزەڭىندە تۇر. بۇل بولماي قويماس ۇدەرىس كۇن سايىن قورشاعان ورتانىڭ كەلبەتى مەن الەمدىك الەۋمەتتىك لاندشافتتىڭ وزگەرۋىنە الىپ كەلەدى.
وسى ورايدا قازاقستان كاسىپوداقتار فەدەراتسياسى ەلىمىزدەگى كاسىپوداقتار قوزعالىسىنىڭ ورنى مەن ءرولى تۋرالى وي قوسۋعا شاقىرادى. بۇل ماقساتتا اتالعان ۇيىم «كاسىپوداقتاردىڭ قازىرگى زامانداعى ءرولى مەن ورنى» اتتى ۇلتتىق پىكىرتالاس وتكىزبەك. پىكىرتالاس بارلىق ارنالار ارقىلى, سونىڭ ىشىندە الەۋمەتتىك جەلىلەردە دە جۇرگىزىلەدى. اشىق اڭگىمەگە قازاقستاننىڭ كەز كەلگەن ازاماتى, باق, ساراپشىلار قاۋىمداستىعىنىڭ وكىلدەرى قاتىسا الادى.
بۇل ءتورتىنشى ونەركاسىپتىك رەۆوليۋتسياعا قوعامنىڭ دايىندىق بارىسىن پىسىقتايتىن پىكىرتالاسقا اينالۋى ابدەن مۇمكىن. قازىردىڭ وزىندە ينتەرنەت, ۆيرتۋالدى ۆاليۋتانىڭ ەنۋىن بىلاي قويعاندا, ءوندىرىس ۇدەرىسىنىڭ بارلىعى روبوتتاندىرىلىپ جاتىر. قىتاي, اقش جانە ەۋروپا ەلدەرىندە ادام فاكتورىنسىز جۇمىس ىستەپ جاتقان زاۋىتتار پايدا بولدى. ونداعى روبوتتاردا اقىل-ويدىڭ باسقارۋىنا مۇقتاجدىق جوق ءارى تاۋلىك بويى جۇمىس ىستەۋگە قابىلەتتى. سول سياقتى «دايملەر» كومپانياسى جۇرگىزۋشىلەرسىز جۇك كولىكتەرىن شىعارۋعا جاقىن قالدى. جاساندى ينتەللەكت «سبەربانك» مەنەدجمەنتىنىڭ 50 پايىزدان استامىن جۇمىسسىز قالدىرىپ وتىر. ياعني ادام ەڭ باستى يەلىگىن – ەڭبەككە يەلىگىن جوعالتا باستادى. ال جەر بەتىندە ورتاشا ءومىر ءسۇرۋ جاسى جىلدان جىلعا ارتىپ كەلەدى. سوندا ادامزاتتىڭ باسىم بولىگى نەمەن شۇعىلدانادى دەگەن ساۋال تۋادى. 2025 جىلعا دەيىن ەۋرووداق ەلدەرىندە, جاپونيادا, رەسەيدە تەرمويادرولىق سينتەز ارقىلى ەنەرگيا وندىرەتىن ءىرى ستانسالار سالىنباق. بۇل ەكولوگيالىق تازا, قاۋىپسىز جاڭا قۋات كوزى. ياعني مۇناي مەن گاز, كومىرگە سۇرانىس تومەندەيدى دەگەن ءسوز. ماماندىقتار قۇرىلىمى دا وزگەرۋدە. حالىقارالىق ەڭبەك ۇيىمىنىڭ بولجامىنشا, كوپتەگەن تانىمال ماماندىقتار, سونىڭ ىشىندە زاڭگەرلەر, ەسەپشىلەر, ءوندىرىس قىزمەتكەرلەرى ءوز وزەكتىلىگىن جوعالتادى. ال ەلىمىزدە قاي ماماندار سۇرانىسقا يە؟ الەۋمەتتىك ەڭبەك قاتىناستارىنداعى جەدەل قولعا الىنۋى ءتيىس وسى ىسپەتتى ويلانتارلىق ماسەلەلەردىڭ شەشىمىن كاسىپوداقتار فەدەراتسياسى بىرگە قاراستىرۋدى ۇسىنىپ وتىر.
دۋمان اناش,
«ەگەمەن قازاقستان»
