وبلىستىق بەينەلەۋ ونەرى مۇرجايىندا وتكەن كورمەگە سۋرەتشىنىڭ 24 تۋىندىسى قويىلدى. كورەرمەن نازارىنا ۇسىنىلعان كارتينالاردىڭ بارلىعى دا سوڭعى ەكى جىل ىشىندە دۇنيەگە كەلگەن. ولاردىڭ قامتىعان تاقىرىبى دا سان الۋان: وتباسىنىڭ ۇيىتقىسى ءھام ۇرپاقتى جالعاستىرۋشى ايەل بەينەسى, حالىقتاردىڭ پايدا بولۋى مەن ولاردىڭ تاريحى, الەمدىك اڭىزدار مەن ميفتەر...
سۋرەتشىنىڭ بارلىق تۋىندىلارىنىڭ استارى فيلوسوفيالىق مانگە تولى دەگەندى ايتادى ونەرتانۋشىلار. اۆتوردى تابيعات, عارىش, ءومىر, ءدىن تۋرالى تولعامدار قاتتى قىزىقتىراتىن بولسا كەرەك. البەتتە, مۇنىڭ تۋ سىرتىندا ءبىر كارتينانى ومىرگە كەلتىرۋ ءۇشىن جۇزدەگەن ەكسيزدى سىننان وتكىزەتىن جانكەشتى ەڭبەكتىڭ تۇرعانى ايتپاسا دا تۇسىنىكتى.
بۇل – عايمولديننىڭ العاشقى كورمەسى ەمەس. وتكەن عاسىردىڭ 90-شى جىلدارى تۋىندىلارىن جۇرت تالقىسىنا شىعارىپتى. ول كەزدە قالادا «قاراعاندى اۆانگاردى» – «كاراۆان» جاستار توبى بولعان. سونىڭ العاشقى قۇرامىندا ەرلان دا بولعان ەكەن. مىنە, ەندى ول اراعا تالاي جىلدى سالىپ, ءوزىنىڭ كورەرمەنىمەن قايىرا قاۋىشتى.
ەرلان عايمولدين – قاراعاندىنىڭ تۋماسى. الماتى كوركەمسۋرەت ۋچيليششەسىن بىتىرگەن سوڭ, تۋعان قالاسىندا جارناما سالاسىندا تەر توككەن. ودان كەيىن 80-جىلدارى الماتىداعى مەملەكەتتىك تەاتر-كوركەمونەر ينستيتۋتىن (قازىرگى ت.جۇرگەنوۆ اتىنداعى ونەر اكادەمياسى) ساندىك-قولدانبالى ونەر سۋرەتشىسى ماماندىعى بويىنشا تامامداعان.
عايمولديننىڭ شىعارماشىلىعى تۋرالى قاراعاندىلىق ونەرتانۋشىلار وتە جىلى لەبىز بىلدىرەدى. مىسالى, بەلگىلى مامان ناتاليا يۆانينانىڭ مىنا پىكىرىنە نازار سالساق. «سۋرەتشىنى 2000-جىلداردىڭ باسىنداعى قازاقستاندىق ونەر مەكتەبىنىڭ وكىلى دەپ سەنىممەن ايتۋعا بولادى. ونىڭ كارتينالارىنداعى كەيىپكەرلەردىڭ, مەيلى ول ادام نەمەسە جان-جانۋار بولسىن, ءبارىنىڭ كوز جانارلارى مىندەتتى تۇردە ايقىن كوك تۇسپەن بەرىلەدى. بۇدان بىرەۋلەر ادامزاتتىڭ قۇشاق جەتپەس كەڭىستىگىن اڭعارسا, ەندى بىرەۋلەر ءتۇپسىز تەرەڭ, قاپ-قاراڭعى شىڭىراۋدى كورەدى. عايمولديننىڭ عاجايىپ الەمىنىڭ سىرى دا وسىندا بولسا كەرەك», دەيدى مامان.
قايرات ءابىلدا,
«ەگەمەن قازاقستان»
قاراعاندى
سۋرەتتەردى تۇسىرگەن دميتري كۋزميچەۆ
