قۇمار ىرگەباي ۇلى ونىڭ ءوتىنىشىن قابىلداپ, جۋىردا اۋدان اكتيۆىن جاڭا اكىممەن تانىستىردى. ول ءوز سوزىندە جەرگىلىكتى كادرلاردىڭ الەۋەتىنە سۇيەنەتىنىن, الايدا جۇكتەلگەن تاپسىرمالار ۇدەسىنەن كورىنە الماعان باسشىلارعا ەشقانداي جەڭىلدىك تە, ارتىقشىلىق تا جاسالمايتىنىن قاداپ ايتتى.
– تايىنشا – ايماقتاعى ىرگەلى اۋدانداردىڭ ءبىرى. اگروونەركاسىپتىك كەشەندى دامىتۋدىڭ الەۋەتى جوعارى, ينۆەستيتسيا تارتۋ مۇمكىندىكتەرى مول. شيكىزاتتى وڭدەۋ, بالامالى ەنەرگيا كوزدەرىن ەنگىزۋ, تىڭ جوبالاردى جۇزەگە اسىرۋ تەگەۋرىندى قيمىلدى قاجەت ەتەدى, – دەي كەلىپ, ق.اقساقالوۆ بۇعان دەيىن ع.مۇسىرەپوۆ اۋدانىنا جەتەكشىلىك ەتىپ كەلگەن ۆلاديمير دۋدوۆتىڭ تايىنشا اۋدانىندا اۋقىمدى شارالاردى اتقارۋعا بىلىگى دە, تاجىريبەسى دە جەتەتىنىنە سەنىم ءبىلدىردى. وعان ەڭبەككەرلەردىڭ جالاقىسىن كوتەرۋ, ينۆەستيتسيا كولەمىن ۇلعايتۋ, جولداردى قالپىنا كەلتىرۋ سىندى بىرقاتار تاپسىرمالار جۇكتەلدى. مۇندا ءسۇت وڭدەيتىن جانە سۇيىق تىڭايتقىشتار شىعاراتىن زاۋىتتار سالىنادى. كراحمال, گليۋتەن ازىرلەيتىن جەلىلەر ىسكە قوسىلادى. ءبىر سوزبەن ايتقاندا, جۇمىس ىستەۋگە تالابى تاۋداي باسشىعا ارالاساتىن سالالار جەتىپ ارتىلادى.
ايماقتىڭ ەكونوميكالىق دامۋىنىڭ نەگىزگى باعىتتارى بەلگىلەنگەن اپپاراتتىق كەڭەستە سىنداردىڭ ءبىر بولىگى مامليۋت اۋدانىنىڭ اكىمى ەربولات بەكشەنوۆكە قاراتا ايتىلعان ەدى. اسىرەسە جاڭا جۇمىس ورىندارىن اشۋداعى ولقىلىقتار, يندۋستريالىق-يننوۆاتسيالىق دامۋ باعدارلاماسىنىڭ ەكىنشى بەسجىلدىعىنا بىردە-ءبىر جوبانىڭ ەنبەگەنى كوزگە شۇقىپ كورسەتىلگەن. جىل باسىندا وتكەن اكىمدىك وتىرىسىندا جەرگىلىكتى بيۋدجەتكە جوسپارلى سالىق ءتۇسىمىن قامتاماسىز ەتە الماعانى, ينۆەستيتسيا جايىنىڭ اقساپ تۇرعانى, وبلىس كورسەتكىشىن تومەندەتىپ تۇرعان ەكى اۋداننىڭ ءبىرى ەكەنى ە.بەكشەنوۆتىڭ بەتىنە تاعى باسىلعان. وسى جايتتار ەسكەرىلگەن بولۋ كەرەك, كادرلىق اۋىس-ءتۇيىستىڭ ناتيجەسىندە مەملەكەتتىك قىزمەتتى ەڭ تومەنگى بۋىننان باستاپ اقجار اۋدانى اكىمىنىڭ ورىنباسارلىعىنا دەيىن كوتەرىلگەن جاستىلەك سىزدىقوۆ جاڭا لاۋازىمعا يە بولدى. قۇمار ىرگەباي ۇلى اۋداندا ءسۇت وڭدەيتىن جالعىز شارۋاشىلىق قانا جۇمىس ىستەيتىنىن, بيزنەس-ارىپتەستەرمەن تىعىز بايلانىس ورناتۋ كەرەكتىگىن, بيىل وڭتۇستىك وڭىرلەردەن كوشىپ كەلەتىن 59 وتباسىعا بارلىق الەۋمەتتىك كومەكتى جاساۋ, جۇمىسقا ورنالاستىرۋ قاجەتتىگىن ەسكە سالدى.
ە.بەكشەنوۆ جەر قاتىناستارى باسقارماسىن باسقارۋعا جىبەرىلدى. شاماسى ونىڭ تاعى ءبىر سىن تەزىنەن سۇرىنبەي وتۋىنە سوڭعى مۇمكىندىك بەرىلگەن سەكىلدى. شارۋاشىلىقتا ابدەن ىسىلعان بولات جۇمابەكوۆ ع.مۇسىرەپوۆ اۋدانىن باسقارۋعا جولدانسا, يندۋستريالىق-يننوۆاتسيالىق دامۋ باسقارماسىنىڭ جەتەكشىسى جانات سادۋاقاسوۆ قىزىلجار اۋدانى اكىمىنىڭ ورىنتاعىنا جايعاستى.
جاڭا اتقامىنەرلەردى الدا ۇلكەن سىناقتار كۇتىپ تۇر. ماسەلەن حاسان بەكتۇرعانوۆ اتىنداعى مامليۋت قالالىق مەكتەبى سۋىق. پلاستيك تەرەزە قويۋ جونىندەگى وتىنىشتەر قۇرعاق سوزدەن اسپاي كەلەدى. مادەنيەت ءۇيى تولىق جوندەلدى دەگەن اقپارات بەرىلگەنمەن, شاتىرى اۋىستىرىلماعاندىقتان جاۋىن-شاشىن كۇندەرى عيمارات ءىشى سۋعا تولىپ كەتەدى. حالىقتى ساپالى اۋىز سۋمەن قامتۋ قىزىلجار اۋدانى تۇرعىندارىنىڭ باستى مۇڭىنا اينالعان.
كورسەتىلگەن سەنىم بار دا, جاۋاپكەرشىلىك جۇگىن ۇعىنۋدىڭ, سالماقتاپ بەزبەنگە سالۋدىڭ, سوعان وراي ولقىلىقتاردى ەڭسەرۋدىڭ ۇتىمدى شەشىمدەرىن قابىلداۋدىڭ ءجونى بولەك. جاڭا اتقامىنەرلەر سىناق مەرزىمىنە توتەپ بەرە الا ما, الدە الدىڭعى ارىپتەسى سياقتى وتستاۆكاعا سۇرانا ما, ۋاقىت كورسەتەدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
