قازاقستان-شۆەيتساريا ماتچىنىڭ شىمىلدىعىن 21 جاستاعى دميتري پوپكو مەن گەنري لااكسونەن اشتى. اتر جاريالاعان تىزىمگە كوز جۇگىرتسەك, ءبىزدىڭ پوپكو – 231-ءشى, ال لااكسونەن 123-ءشى ورىنعا جايعاسقان ەكەن. دەگەنمەن رەيتينگتەگى الشاقتىققا قاراماستان, كەزدەسۋ وتە تارتىستى ءوتتى. تولىق ءۇش ساعاتقا سوزىلعان باسەكەنىڭ العاشقى سەتىن جەڭىسپەن باستاعان جەرلەسىمىز, كەلەسى كەزەڭدە دە جەڭىسكە جەتۋ ءۇشىن ءبىراز تەر توكتى. دەسە دە, بۇل سەت تە پوپكونىڭ ەنشىسىنە جازىلدى. بۇل جەردە شۆەيتساريالىق سپورتشىنىڭ جانكەشتىلىگىن ايتا كەتكەن ءجون. ول قارسىلاسىنىڭ ويلاستىرعان ءəدىسىن دەر كەزىندە بايقاپ, قارسى سوققى جاساپ تا ۇلگەردى. ءۇشىنشى سەتتە لااكسونەن جيناقىلىق تانىتىپ, بۇل سەتتى ءوز پايداسىنا شەشتى. Əيتكەنمەن, دميتري پوپكو وزىنەن ءتورت جاس ۇلكەن ءارى رەيتينگتە جوعارى ورنالاسقان əرىپتەسىنە قاراعاندا جىگەرلى ويىن كورسەتىپ, 6:2, 7:6, 3:6, 7:5 ەسەبىمەن باسىم ءتۇستى. ءسويتىپ قازاقستان قۇراماسىنا العاشقى جەڭىستى سىيلادى.
شۆەيتساريا جانكۇيەرلەرىنىڭ كوڭىلىن كۇپتى ەتكەن ءبىرىنشى كەزدەسۋدەن كەيىن, قازاقستان قۇراماسىنىڭ ءبىرىنشى راكەتكاسى ميحايل كۋكۋشكين (اتر رەيتينگىندە 73-ورىندا) شۆەيتساريانىڭ ورتان قول تەننيسشىسى ادريان بودمەرگە (485) قارسى شىقتى. بىردەن ايتايىق, كۋكۋشكين بۇل كەزدەسۋدە 4:1 ەسەبىمەن جەڭىسكە جەتىپ, ءبىرىنشى كۇننىڭ قورىتىندىسى بويىنشا ەسەپتى 2:0-گە جەتكىزدى. الايدا تابلوداعى كورسەتكىشكە قاراپ, جەڭىس ءبىزدىڭ تەننيسشىگە وڭاي كەلدى دەپ ايتۋعا بولمايدى. ادريان بودمەر العاشقى سەتتە جەڭىسكە جەتكەنىمەن, قارسىلاسىنا قاراعاندا تاجىريبەسى مول ءبىزدىڭ تەننيسشى 3:6, 6:3, 6:2, 6:3 ەسەبىمەن باسىم ءتۇستى.
جارىستىڭ ەكىنشى كۇنى جۇپتاسىپ ونەر كورسەتۋدە الەكساندر نەدوۆەسوۆ پەن تيمۋر حابيبۋللين دۋەتى مارك-اندرەا حۋسلەر مەن لۋكا مارگاروليگە قارسى كورتقا شىقتى. جانكۇيەرلەردىڭ قىزۋ قولداۋىنا يە بولعان جەرلەستەرىمىز العاشقى ەكى سەتتە قارسىلاستارىنان 6:4, 6:4 ناتيجەسىمەن باسىم ءتۇستى. جەڭىس ۋىستارىنان سۋسىپ بارا جاتقانىن بىلگەن شۆەيتساريا قۇراماسىنىڭ تەننيسشىلەرى تەز ەسىن جيىپ, كەلەسى ەكى سەتتى ءوز پايدالارىنا شەشتى. ءتورتىنشى سەتتەن كەيىن ەكى قۇرامانىڭ ناتيجەلەرى تەڭەستى. سوڭعى سەتتە جەڭىس ەكى قۇراماعا دا اۋاداي قاجەت ەدى. ويتكەنى شەشۋشى سەتتە قازاقستان قۇراماسى جەڭىسكە جەتسە, مەرزىمىنەن بۇرىن 1/4 فينالعا شىعادى, ال شۆەيتساريا تەننيسشىلەرى بۇل ماتچتى ءوز پايدالارىنا جازاتىن بولسا, ولاردا دا كەلەسى كەزەڭگە شىعۋ ءۇشىن ءۇمىت وتى قايتا پايدا بولار ەدى. دەگەنمەن الدارىنا جەڭىسكە جەتۋ دەگەن ناقتى ماقسات قويعان وتانداستارىمىز بەسىنشى سەتتە جيناقى ويىن ورنەگىن كورسەتىپ, قارسىلاستارىنان جەڭىستى ج ۇلىپ الدى. قورىتىندى ەسەپ – 6:4, 6:4, 3:6, 6:7, 6:3. ءسويتىپ دياس دوسقاراەۆ جەتەكشىلىك ەتەتىن قۇراما جارىستىڭ الدا بولاتىن ەكى كەزدەسۋدىڭ نəتيجەسىنە قاراماستان, دەۆيس كۋبوگىنىڭ شيرەك فينالدىق كەزەڭىنە جولداما الدى.
ءتۋرنيردىڭ سوڭعى كۇنىندە ەكى ماتچ وينالدى. بۇل كۇنى ءبىرىنشى بولىپ كورتقا رومان حاسانوۆ شىعىپ, اندرەا حۋسلەرادان 3:6, 1:6 ەسەبىمەن جەڭىلىپ قالدى. ال دميتري پوپكو ادريان بودمەردى 7:6, 1:6, 10:6 ناتيجەسىمەن جەڭدى.
ەندى قۇراما جىگىتتەرى ءساۋىر ايىندا جارتىلاي فينالعا شىعۋ ءۇشىن باق سىنايدى.
ايتا كەتەيىك, قازاقستان قۇراماسى دەۆيس كۋبوگى اياسىندا شۆەيتساريا قۇراماسىمەن وسىمەن ءۇشىنشى رەت كەزدەستى. ەڭ العاش 2010 جىلى شۆەيتساريانى جەڭگەننەن كەيىن تاريحتا تۇڭعىش رەت الەمدىك توپقا شىققان ەدى. ال 2014 جىلى جەنەۆادا وتكەن ءتۋرنيردىڭ شيرەك فينالىندا وتانداستارىمىز 2:3 ەسەبىمەن ەسە جىبەرگەن ەدى. مىنە, ەندى ەكى قۇراما 1/8 فينالدا ءۇشىنشى رەت جولىعىپ, بۇل كەزدەسۋ قازاقستان قۇراماسىنىڭ جەڭىسىمەن اياقتالدى.
دياس دوسقاراەۆ, قازاقستان قۇراماسىنىڭ كاپيتانى:
– ءسوز جوق, جاقسى ماتچ بولدى, جىگىتتەر جارادى. ارينە, ويىندا ازداعان بۇرىلىستار بولدى. شۆەيتساريا قۇراماسى دا وتە تاجىريبەلى كوماندا. مارگارولي تەك ءبىر رەت قانا قاتەلەستى. كەلەسى كەزەڭدە دە ءبىزدى وڭاي قارسىلاس كۇتىپ تۇرعان جوق. ونىڭ ۇستىنە شيرەك فينال ويىنى سىرت الاڭدا وتەدى.
ءالي بيتورە,
«ەگەمەن قازاقستان»
