الىستاعى اۋىلدىڭ ۇزدىك وقۋشىلارى ارنايى شاكىرتاقى الادى. قۇرمانعازى اۋدانىنداعى ءابۋ سارسەنباەۆ اتىنداعى ورتا مەكتەپتە ء«مۇسليمات انا» اتىنداعى شاكىرتاقى ون جىلدان بەرى تابىستالىپ كەلەدى. بۇگىنگە دەيىن مەكتەپتىڭ 224 وقۋشىسىنا وسىنداي شاكىرتاقى بەرىلگەن. «ول ءۇشىن بالالار ساباقتى جاقسى وقىپ, ونەر-بىلىمدەرىمەن كوزگە تۇسۋلەرى كەرەك. بۇل ءبىر جاعىنان وسكەلەڭ ۇرپاقتى جاقسىلىققا ىنتالاندىرۋ, ەكىنشى جاعىنان ءمۇسليمات انا سىندى ەلگە سىيلى, قادىرلى جانداردى ۇلگى ەتۋ», دەيدى قازاقستان جازۋشىلار وداعىنىڭ مۇشەسى, قوعام قايراتكەرى ومىرزاق قاجىمعاليەۆ. ول ومىردەن وزعان زايىبىنىڭ قۇرمەتىنە ارناپ وسى شاكىرتاقىنى جىل سايىن تالاپتى بالالارعا ۇسىنىپ ءجۇر.
ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى اياسىندا ۇيىمداستىرىلعان «رۋحاني جاڭعىرۋ – وسكەلەڭ ۇرپاقتىڭ جارقىن جولى» تاقىرىبىنداعى اۋقىمدى شارانىڭ ءبىر ءبولىمى «جاقسىلىققا جارالعان جان» اتتى سالتاناتتى كەشكە ارنالدى. ادامدىق پەن پاراساتتىڭ ۇلگىسى بولعان ءمۇسليمات انا سىندى ابزال جاندار ءار اۋىلدا بار, سولاردى ۇلىقتاپ, جاستارعا ۇلگى ەتۋىمىز كەرەك, – دەيدى اۋداندىق ىشكى ساياسات ءبولىمىنىڭ باسشىسى ج.شامبوزوۆ.
باقىتگۇل باباش,
«ەگەمەن قازاقستان»
اتىراۋ
