«ەگەمەن قازاقستان» گازەتى جاڭا ماۋسىمدا قازاق كلۋبتارىنىڭ قاتارىنا قوسىلعان كەيبىر لەگيونەر فۋتبولشىلاردى كەڭىنەن تانىستىرۋدى باستايدى. كوپتىڭ ورتاسىنان كوزگە ءتۇسىپ, توپتىڭ ورتاسىنان توبە كورسەتەدى دەگەن ۇمىتپەن. بۇگىنگى كەيىپكەرىمىز – دجابا كانكاۆا.
2014 جىل. دنەپروپەتروۆسك قالاسى. جەرگىلىكتى «دنەپر» مەن كيەۆتىڭ «ديناموسى» اراسىنداعى ماڭىزدى ويىن. كەزدەسۋدىڭ بەل ورتاسىندا كۇتپەگەن جاعداي بولدى. قوناقتار شابۋىلشىسى ولەگ گۋسەۆ قارسىلاس كوماندانىڭ قاقپاشىسى دەنيس بويكامەن دوپقا تالاستا قاتتى قاقتىعىستى. باسىنان اۋىر سوققى العان گۋسەۆ الگى جەردە ەسىنەن تانىپ قالدى. سول ۋاقىتتا فۋتبولشىعا الاڭ يەلەرىنىڭ ويىنشىسى دەر ۋاقىتىندا العاشقى كومەك كورسەتىپ, ولىمنەن اراشالاپ قالدى. دارىگەرلەردىڭ ايتۋىنشا, العاشقى كومەك دەر كەزىندە كورسەتىلمەگەندە گۋسەۆتىڭ ومىرىنە قاۋىپ ءتونىپ تۇرعان ەكەن. ۋكراين فۋتبولشىسىنىڭ ءومىرىن قۇتقارىپ قالعان – دجابا كانكاۆا ەدى. سول وقيعادان كەيىن ۋكراينانىڭ كەز كەلگەن قالاسىندا كانكاۆاعا دەگەن قۇرمەت, جانكۇيەرلەردىڭ ىستىق ىقىلاسى ارتا ءتۇستى. اجالعا اراشا بولعان كانكاۆا ادامگەرشىلىك تۇرعىسىنان دا ءوزىنىڭ مىقتىلىعىن كورسەتتى.
– مەنىڭ ورنىمدا كەز كەلگەن ادام سولاي ىستەۋشى ەدى, مۇنىمدى ەرلىككە سانامايمىن. ەڭ باستىسى, ءبارى دۇرىس اياقتالدى. قولىمنان كەلگەنىن جاسادىم, – دەگەن ەدى سول كەزدە فۋتبولشى.
گرۋزين فۋتبولشىسى كۇنى كەشە عانا قوستانايدىڭ «توبىلىمەن» كەلىسىمشارتقا وتىردى. دجابا كانكاۆا تۋرالى كوپ نارسە ايتۋعا بولادى. گرۋزيا ۇلتتىق قۇراماسىنىڭ كاپيتانى. بىرنەشە رەت ءوز ەلىنىڭ ۇزدىك فۋتبولشىسى اتانعان. گرۋزيادا تانىمالدىعى جاعىنان ايگىلى كاحابەر كالادزەدەن كەم تۇسپەيدى.
اتاقتى «دينامو» (تبيليسي) فۋتبول كلۋبىنىڭ تۇلەگى «دنەپردە» دە كەرەمەت ويىندارىمەن كوزگە ءتۇستى. ۋكراين كومانداسى 2014-2015 ماۋسىمىندا ەۋروپا فۋتبولىندا اتوي سالدى. كۇرامىندا كونوپليانكا, روتان, كانكاۆا سياقتى مىقتىلار جينالعان دنەپروپەتروۆسك جىگىتتەرى ازۋلى «وليمپياكوس», «اياكس», «ناپولي» كوماندالارىن جەڭىپ, ەۋروپا ليگاسىنىڭ فينالىنا دەيىن جەتتى. تەك فينالدا عانا اتاقتى «سەۆيلياعا» جول بەردى.
دجابا كانكاۆا – قورعانىسقا جاقىن وينايتىن جارتىلاي قورعاۋشى. وسىعان دەيىن «دينامو» (تبيليسي), «الانيا» (ۆلاديكاۆكاز), «ارسەنال» (كيەۆ), «دنەپر» (دنەپروپەتروۆسك) كوماندالارىندا ويناعان. فۋتبولشىنىڭ سوڭعى ويناعان كومانداسى – فرانتسيانىڭ «رەيمس» ۇجىمى. فرانتسۋزدارمەن ءۇش جىلدىق كەلىسىمشارتقا وتىرعان ەدى. الايدا ءبىرجارىم جىلدان كەيىن «رەيمستەن» كەتۋىنە ءماجبۇر بولدى. كوماندانىڭ تومەنگى ليگاعا ءتۇسىپ قالۋى كانكاۆانىڭ ۇمتىلىسىنا, ويىنىنا دا كەرى اسەرىن تيگىزدى. فرانتسيادان كەتكەن سوڭ دجاباعا «مەتتس», «نيتستسا» «مالاگا» كوماندالارى قىزىعۋشىلىق تانىتقان. كوكتەمدە اتالعان كوماندالارمەن كەلىسسوز جۇرگىزگەنى تۋرالى اقپارات تاراعان, الايدا بەلگىسىز سەبەپتەرگە بايلانىستى ەشبىرىمەن ورتاق مəمىلەگە كەلە المادى. بيىل قىستا «توبىلدىڭ» ۇسىنىسىن قابىلداپ, قوستانايدان ءبىر-اق شىقتى.
ۋكراينالىق سپورت ءجۋرناليسى ۆيكتور حوحليۋك كانكاۆاعا قاتىستى مىناداي مىنەزدەمە بەرەدى. «دەنە ءبىتىمى مىعىم, جىگەرلى, تەحنيكاسى مىقتى فۋتبولشى. جاسىل الاڭدى جاقسى كورە بىلۋىمەن كوزگە تۇسەدى. قورعانىسقا كوپ كوڭىل بولەدى. الىس قاشىقتىقتاعى ارىپتەستەرىنە دوپتى شەبەر جەتكىزۋمەن ەرەكشەلەنەدى. سوققىلارى جويقىن. Əرىپتەستەرىمەن تەز ءتىل تابىسادى. فۋتبولدان تىس بىلايعى ومىردە دە كوشباسشى جىگىت», دەپ ماقتاۋىن جەتكىزگەن. قازاقستان بىرىنشىلىگى ويىندارىندا دəل وسىنداي قاسيەتتەرىن, شەبەرلىگىن, مىقتىلىعىن كورسەتىپ جاتسا, ارتىلعان ءۇمىتتىڭ, سەنىمنىڭ اقتالعانى.
«توبىلدىڭ» باس باپكەرى ويىنشىنىڭ مۇمكىندىگىن جاقسى بىلەدى. كانكاۆانىڭ كومانداعا كەلۋىنە ۆلاديمير نيكيتەنكو تىكەلەي مۇددەلى بولىپتى. جارتىلاي قورعاۋشىنىڭ الەۋەتىن ءتيىمدى پايدالانسا, قوستانايلىقتاردىڭ الىسقا شابارى انىق.
ءبىر جاعىنان ۇلتتىق بىرىنشىلىگىمىزگە جاسى كەلگەن, رەسەيدىڭ نەمەسە ۋكراينانىڭ كوماندالارىنا جاراماي قالعان فۋتبولشىلار كەلەدى دەگەن اڭگىمە ءجيى ايتىلدى. دەگەنمەن, كانكاۆا سياقتى مارقاسقالاردىڭ ءجونى بولەك. حالىقارالىق تəجىربيەسى مول, ەۋروپا ليگاسىنىڭ فينالىندا ويناعان, ۇلتتىق قۇراماسىنىڭ كوشباسشىسى. كəسىبيلىگىمەن, ءجۇرىپ-تۇرىسىمەن جاس فۋتبولشىلارعا ۇلگى بولىپ, فۋتبولدىڭ كوپ سىرىن ۇيرەتەرى انىق. «توبىلداعى» تالاي تالانتتاردى قاناتىنىڭ استىنا الار, جول كورسەتەر, بار بىلگەنىمەن بولىسەر, قامقورلىق تانىتار...
كوپتى كورگەن تاجىريبەلى ويىنشىلار وسىنداي ەرەكشەلىگىمەن قۇندى. ولاردىڭ قپل-عا فۋتبولداعى عۇمىرىن اياقتاۋعا كەلگەنى ايتپاسا دا بەلگىلى. ايتسە دە ەۋروپادان قىرىق ءۇش كۇندىك كەمدىگى بار قازاق فۋتبولى ءۇشىن مۇنداي ويىنشىلار قاجەت-اق.
ەركەبۇلان جومارت,
«ەگەمەن قازاقستان»
