كەرىسىنشە, مورالدىق-پسيحولوگيالىق جانە الەۋمەتتىك-قۇقىقتىق تۇرعىدان ءتيىستى كومەكتەر بەرىلسە, ولار ەركىن ومىرگە تەز ءسىڭىسىپ كەتەرى انىق. وسى ورايدا ەلىمىزدە باس بوستاندىعىنان ايىرۋ ورىندارىنان بوساعاندار, ەڭ الدىمەن, پروباتسيا قىزمەتىنىڭ ەسەبىنە الىنادى. بۇل رەتتە مۇعالجار اۋدانىنىڭ ورتالىعىندا وتكەن جىلى اشىلعان «پروباتسيا ءۇيى» تىركەلگەن تۇلعالارعا ءوز شاپاعاتىن تيگىزىپ كەلەدى. سونىڭ ناتيجەسىندە بىرقاتارى جۇمىسپەن قامتۋ ورتالىعى ارقىلى قۇرىلىس جۇمىستارىنا تارتىلسا, تاعى ءبىرى تەپلوۆوز ماشيناسىنىڭ كومەكشىسى ماماندىعىن الۋ ءۇشىن ونەركاسىپ كوللەدجىنە جولدانعان. سونداي-اق جەتى تۇلعاعا بەلگىلەنگەن كولەمدە تەگىن مەديتسينالىق كومەك كورسەتىلگەن. كەلەسى كەزەكتە ولاردىڭ قاتارىن «جاسىل ەل» جاساعىنىڭ ساپىنا جۇمىسقا ورنالاسقاندار مەن «باستاۋ-بيزنەس» باعدارلاماسى بويىنشا وقۋ كۋرسىنا قابىلدانعاندار جانە قۇقىقتىق, سونىڭ ىشىندە قورعاۋشىنىڭ كومەگىن العاندار قۇرايدى.
وسى جوبا بيىل دا جالعاسىن تاۋىپتى. «پروباتسيا ءۇيىنىڭ» قىزمەتى ء«بىر تەرەزە» قاعيداتىنا نەگىزدەلگەن. سوعان سايكەس مەملەكەتتىك قىزمەتتەر مەن راسىمدەر وڭايلاتىلعان تۇردە كورسەتىلەدى. پروباتسيا قىزمەتىنىڭ ەسەبىندە تۇرعانداردىڭ قاي-قايسىسى دا الەۋمەتتىك-قۇقىقتىق كومەكتەن تىس قالىپ كورگەن ەمەس.
مۇنداعى باستى ماقسات – جازاسىن وتەپ كەلگەندەردىڭ قايتادان قىلمىس جاساۋعا ۇمتىلۋ ارەكەتتەرىنىڭ الدىن الۋ, قىلمىسقا يتەرمەلەيتىن سەبەپتەرگە جول بەرمەۋ جانە باس بوستاندىعىنان ايىرۋ ورىندارىنان بوساعانداردىڭ قوعامدىق ومىرگە تەزىرەك بەيىمدەلىپ كەتۋىنە جاعداي جاساۋ, دەيدى ىشكى ىستەر مينيسترلىگىنىڭ اقتوبە وبلىسى بويىنشا قىلمىستىق اتقارۋ جۇيەسى دەپارتامەنتى مۇعالجار اۋداندىق №1 پروباتسيا قىزمەتى ءبولىمىنىڭ اعا ينسپەكتورى گۇلسەزىم ەشماعامبەتوۆا.
جوعارىدا ايتىلعانداي, جازاسىن وتەپ كەلگەندەرگە ارنايى كۆوتا بويىنشا بەلگىلى ءبىر جۇمىس ورىندارى ۇسىنىلادى. بۇل ءتارتىپ پەن جۇيە الەۋمەتتىك دامىتۋ باعدارلاماسىن جۇزەگە اسىرۋ شەڭبەرىندە بەلگىلەنگەن. بۇعان قوسا پروباتسيا قىزمەتى ەسەبىندەگى تۇلعالاردى قاجەت بولعان جاعدايدا كەشكى مەكتەپتەرگە جىبەرۋ كوزدەلگەن. بوستاندىققا شىققاندار دا بارلىق رەسپۋبليكا ازاماتتارى سەكىلدى زەينەتاقى مەن جاردەماقى رەسىمدەۋگە جانە ءوز بيزنەستەرىن اشىپ, نەسيە الۋعا قۇقىلى. مۇعالجارداعى پروباتسيا قىزمەتىنىڭ جاناشىرلارى مۇنداي جاعدايدا ءتيىستى كومەك كورسەتۋدى قىزمەت داعدىسىنا اينالدىرىپ وتىر.
تەمىر قۇسايىن,
«ەگەمەن قازاقستان»
اقتوبە وبلىسى,
مۇعالجار اۋدانى
