پرەزيدەنت ن.نازارباەۆ جىل سايىنعى قازاقستان حالقىنا ارناعان جولداۋلارىندا ءبىلىم سالاسىن ەشقاشان نازاردان تىس قالدىرعان ەمەس. بيىل دا ەلىمىزدىڭ ءتورتىنشى ونەركاسىپتىك رەۆوليۋتسيا جاعدايىنداعى دامۋىنىڭ نەگىزدەرىن كورسەتكەن ەلباسى ادام كاپيتالىنىڭ دامۋىنا, ونىڭ ىشىندە ءبىلىم سالاسىنا ەرەكشە توقتالدى.
ەلباسى ءوز جولداۋىندا «بارلىق جاستاعى ازاماتتاردى قامتيتىن ءبىلىم بەرۋ ىسىندە ءوزىمىزدىڭ وزىق جۇيەمىزدى قۇرۋدى جەدەلدەتۋ قاجەت. ءبىلىم بەرۋ باعدارلامالارىنىڭ نەگىزگى باسىمدىعى وزگەرىستەرگە ۇنەمى بەيىم بولۋ جانە جاڭا ءبىلىمدى مەڭگەرۋ قابىلەتىن دامىتۋ بولۋعا ءتيىس. پەداگوگتاردى وقىتۋ جانە ولاردىڭ بىلىكتىلىگىن ارتتىرۋ جولدارىن قايتا قاراۋ كەرەك بولادى. ەلىمىزدىڭ ۋنيۆەرسيتەتتەرىندەگى پەداگوگيكالىق كافەدرالار مەن فاكۋلتەتتەردى دامىتۋ قاجەت», دەپ اتاپ ءوتتى.
پرەزيدەنتتىڭ بۇل تاپسىرماسى وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ ۇجىمىنا دا اسا زور جاۋاپكەرشىلىك جۇكتەپ وتىر. جاڭا بۋىننىڭ پەداگوگتارى وقۋشىعا تەك ءبىلىم بەرىپ قانا قويماي, ونى ءوز بەتىنشە ىزدەنۋگە ماشىقتاندىرىپ, بالانىڭ بويىندا ءومىر بويى جاڭا بىلىمدەردى مەڭگەرۋ قابىلەتىن قالىپتاستىرۋى ءتيىس. ءبىز ءوز تۇلەكتەرىمىزدىڭ وسى تالاپتارعا ساي بولۋىنا ۇنەمى باسا نازار اۋدارىپ كەلەمىز.
ماسەلەن, ءبىزدىڭ وقۋ ورنىندا تۇڭعىش پرەزيدەنت اتىنداعى ورتالىق جۇمىس ىستەيدى. عىلىمي-يننوۆاتسيالىق كابينەت ن.نازارباەۆ ورتالىعى دەپ اتالادى. بۇل كابينەتتە جوعارى جىلدامدىقتى لوكالدى جانە Wi-Fi ينتەرنەت جۇيەسى بار. بۇل جەردە عىلىمي جوبامەن اينالىساتىن ستۋدەنتتەر مەن وقىتۋشى-پروفەسسورلار قۇرامى جۇمىس ىستەيدى.
وڭالباي اياشەۆ,
وبلىستىق ءماسليحاتتىڭ دەپۋتاتى, وڭتۇستىك قازاقستان پەداگوگيكالىق ۋنيۆەرسيتەتىنىڭ رەكتورى
وڭتۇستىك قازاقستان وبلىسى
