فورۋم اياسىندا احقو تhomson Reuters حالىقارالىق اگەنتتىگىمەن بىرلەسە وتىرىپ, «Those who dare win: exploring new frontiers» («جەڭىسكە جەتۋدەن قورىقپاۋ: جاڭا بەلەستەردى باعىندىرۋ») تاقىرىبىندا پانەلدىك تالقىلاۋ جيىنىن وتكىزدى. سەسسيانىڭ نەگىزگى ماقساتى - دامىپ جاتقان نارىقتاردىڭ ينۆەستيتسيالىق تارتىمدىلىعىن تالقىلاۋ بولاتىن. ودان بولەك, حالىقارالىق بيزنەس ورتانىڭ وكىلدەرىنە احقو مۇمكىندىكتەرى تانىستىرىلدى.
پانەلدىك سەسسيادا سپيكەر رەتىندە IHS Markit عىلىمي-تالداۋ كومپانياسىنىڭ جاھاندىق ەنەرگەتيكالىق جانە حالىقارالىق ماسەلەلەر جونىندەگى اعا ۆيتسە-پرەزيدەنتى كارلوس پاسكۋال, Abraaj Group باسقارۋشى سەرىكتەسى مۋستافا ابدەل-ۆادۋد, Abraaj Group وڭىرلىك باس ديرەكتورى جانە Standard Chartered كوممەرتسيالىق جانە جەكە بانكتىك بيزنەس جونىندەگى باس ديرەكتورى اننا مارس, رۋاندانىڭ قارجى جانە ەكونوميكالىق جوسپارلاۋ ءمينيسترى كلاۆەر گاتەتە ءسوز سويلەدى.
تالقىلاۋ الدىندا پانەلدىك سەسسيانىڭ قاتىسۋشىلارى مەن قوناقتارى ءۇشىن ارنايى جازىلعان قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ بەينەجولداۋى تىڭدالدى. ءوز سوزىندە ەلباسى تاۋەلسىزدىك جىلدارىنداعى قازاقستاننىڭ ەكونوميكالىق دامۋىنداعى نەگىزگى كەزەڭدەردى اتاپ ءوتىپ, الەۋەتتى ينۆەستورلاردى استانادا شىلدە ايىندا وتەتىن احقو-نىڭ حالىقارالىق تۇساۋكەسەر راسىمىنە شاقىردى. پانەلدىك تالقىلاۋعا قازاقستان رەسپۋبليكاسى پرەمەر-ءمينيسترىنىڭ ورىنباسارى ەربولات دوساەۆ, قر قارجى ءمينيسترى باقىت سۇلتانوۆ, قر ۇلتتىق ەكونوميكا ءمينيسترى تيمۋر سۇلەيمەنوۆ جانە شۆەيتسارياداعى قر ەلشىسى جانار ايتجانوۆا جانە جەتەكشى ينۆەستورلار مەن بيزنەس الپاۋىتتار قاتىستى.
«بيزنەس وكىلدەرىن دامۋشى نارىقتارعا باسا نازار اۋدارۋعا, جاڭا مۇمكىندىكتەردى زەرتتەۋگە جانە جۇمىس ىستەپ جاتقان قارجىلىق جۇيەلەرگە جاڭا سەرپىن بەرۋگە كومەكتەسۋگە شاقىرامىن. ءوز كەزەگىندە احقو ىنتىماقتاستىق ءۇشىن بىرەگەي مۇمكىندىكتەر بەرە الادى جانە بۇكىل ەۋرازيا كەڭىستىگىندەگى جولباسشى بولا الادى», - دەپ اتاپ ءوتتى احقو باسشىسى قايرات كەلىمبەتوۆ. بۇگىن احقو وكىلدەرى قارجىلىق تەحنولوگيالارعا ارنالعان Caspian Week سەكتسياسىنا قاتىسادى. سونىمەن قاتار, احقو دەلەگاتسياسى قازىرگى تاڭدا جۇمىس ىستەپ جاتقان جانە ىقتيمال سەرىكتەستەرىمەن بىرقاتار ىسكەرلىك كەزدەسۋلەر وتكىزەدى.
