جاقىندا وسى مۇزايدىندا شاھارداعى ستۋدەنتتەر مەن مەكتەپ وقۋشىلارى اراسىندا «كوڭىلدى ستارت» ويىنى ۇيىمداستىرىلدى. مۇزايدىنعا كونكي تەبۋگە كەلگەن جاستار ءۇش كومانداعا ءبولىنىپ, سپورتتىڭ 5 تۇرىنەن سىنعا ءتۇستى. «مۇنداي سپورتتىق جارىستاردى ءار اپتانىڭ سەنبى-جەكسەنبى كۇندەرى ءداستۇرلى تۇردە وتكىزىپ وتىرامىز. بۇل جولى شارا سوڭىندا «تەمەكىنى تاتتىگە الماستىر» اتتى اكتسيا ۇيىمداستىرىپ, شىلىم شەگەتىن جاسوسپىرىمدەردى سالاۋاتتى ءومىر سالتىن ۇستانۋعا, تەمەكىنى تاستاۋعا شاقىردىق. جاستار تەمەكى تارتقانشا ءبىر مەزگىل كونكي تەۋىپ, دەنەلەرىن شىنىقتىرىپ, دەنساۋلىقتارىن نىعايتقانى عانيبەت ەمەس پە؟ «التاي» ستاديونىنا كەلۋشىلەر تەك كونكي تەبۋمەن عانا شەكتەلمەيدى, حوككەي دە ويناي الادى. ءبىز الداعى اپتادا وقۋشىلار اراسىندا حوككەي ءتۋرنيرىن وتكىزۋدى جوسپارلاپ وتىرمىز. ءۇش نۇسقاۋشىمىز بار. ولار كونكي تەبە المايتىندارعا كونكيدە ءجۇرۋدى ۇيرەتەدى. مەديتسينالىق بەكەت كۇنى بويى جۇمىس ىستەيدى. مۇزايدىنعا كەلۋشىلەردىڭ كوپتىگىن ەسكەرە وتىرىپ بيىل 200 دانا جاڭا كونكي ساتىپ الدىق», - دەيدى «التاي» ستاديونىنداعى مۇزايدىنعا جاۋاپتى مەكەمە «گوسستروي» جشس ديرەكتورى ەرلان جارمۇحامەدوۆ. ونىڭ ايتۋىنشا, مۇزايدىنعا دەمالىس كۇندەرى 3 مىڭعا, جۇمىس كۇندەرى 500-گە جۋىق حالىق كەلەدى.
وسكەمەن قالالىق دەنە شىنىقتىرۋ جانە سپورت ءبولىمىنىڭ بەرگەن مالىمەتتەرىنە سۇيەنسەك, بۇگىندە وبلىس ورتالىعىندا «التاي» ستاديونىن قوسا العاندا 8 مۇزايدىن شاھار تۇرعىندارى ءۇشىن جۇمىس ىستەپ تۇر. سونىمەن قاتار قالاداعى مەكتەپتەردىڭ جانىندا 36 شاعىن مۇزايدىن بار. «وسكەمەن تۇرعىندارىنا كومسومول ارالىندا, «مەتاللۋرگتەر» ساياباعىندا, «تيتان» ستاديونىندا, ەتنواۋىلدا, «نۇرلى جول» ساياباعىندا, كومەندانتكا وزەنىنىڭ جاعالاۋىندا جانە امفيتەاترداعى مۇزايدىندا كونكي تەبۋگە بارلىق مۇمكىندىك جاسالعان. تۇرعىندارعا قولايلى بولۋ ءۇشىن كيىنىپ-شەشىنەتىن ورىندار قاراستىرىلعان, شاي ءىشىپ, بوي جىلىتاتىن شاعىن ءدامحانالار جۇمىس ىستەيدى. قالالىقتار كومسومول ارالىندا, ابلاكەت ىقشام اۋدانىندا جانە ولگا رىپاكوۆا اتىنداعى جەڭىل اتلەتيكا مەنەجىنىڭ ارتىنداعى شاڭعى جولدارىندا شاڭعى تەبۋلەرىنە دە بولادى. بۇل شاڭعى جولدارىندا قالالىق جانە وبلىستىق دەڭگەيدەگى جارىستار ۇيىمداستىرىلىپ تۇرادى», - دەيدى قالالىق دەنە شىنىقتىرۋ جانە سپورت ءبولىمىنىڭ باسشىسى الماس اتاەۆ.
ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن اۆتور
