ورتالىق مۋزەي 2013 جىلدان بەرى ء«بىز بىرگەمىز!» ستۋدياسىمەن بىرلەسە وتىرىپ «مۋزەي ءتۇنى», «ناۋرىز بوياۋلارى», «وتباسىمەن مۋزەيگە!» جانە باسقا دا تارتىمدى جوبالاردى ىسكە اسىردى.
جوبا جەتەكشىسى دينا مەرتەنوۆا شەت تىلدەرى ينستيتۋتىن تامامداعاننان كەيىن بىردەن كاسىپكەرلىكپەن اينالىستى. دەگەنمەن ول ءوزىنىڭ سۋرەتشى ەكەنىن جان-تانىمەن ءاردايىم سەزىنەتىن جانە سۋرەت ۋچيليششەسىندە وقىعان جىلدارىن ىستىق سەزىممەن ءجيى ەسكە الاتىن. ءبىرشاما جىل وتكەندە كەنەتتەن وتباسى وعان مولبەرت, قىلقالام مەن بوياۋلار ۇسىنىپ توسىن سىي جاسادى. سودان بەرى كەسكىندەمە ونەرى ونىڭ ومىرلىك ىسىنە اينالعان, ءسويتىپ ء«بىز بىرگەمىز!» اتتى كوركەمسۋرەت ستۋدياسىن اشتى.
ۋكراينالىق سۋرەتشى م.سكوبلينسكيمەن كەزدەسكەننەن كەيىن دينا كەسكىندەمەدە تىڭ ءارى بىرەگەي, ادامعا شابىت بەرەتىن, باستىسى, كەنەپكە بوياۋدى ساۋساقپەن جاعۋ, ماسحيتينمەن جانە قىلقالامداردى ارالاستىرا وتىرىپ سۋرەت سالۋ سياقتى ناتيجەلى ءتاسىل ارقىلى ادام سەزىمىنىڭ سان-الۋاندىعىن كورسەتۋگە بولاتىنىن بايقادى.
«اللا پريما» ءادىسى 1-3 ساعات اراسىندا تولىققاندى سۋرەت سالۋعا مۇمكىندىك بەرەتىن يمپرەسسيونيست سۋرەتشىلەردىڭ شىعارماشىلىعىندا تۇراقتى ورنىن تاپتى. بۇل مايلى بوياۋمەن ءاپ-ساتتە سۋرەت سالىپ شىعۋعا مۇمكىندىك بەرەتىن تانىمال ءتاسىل. مۇنداي ءادىستى قولداناتىن سۋرەتشى بوياۋ تولىق كەۋىپ بولعانشا سۋرەتىن سالىپ بىتىرەدى.
قازىرگى كەزدە ء«بىز بىرگەمىز!» ستۋدياسى ونەرگە نەمقۇرايلى قارامايتىن, ءوز دارىندارىنىڭ ءتۇرلى قىرلارىن شىڭداعىسى كەلەتىن ءتۇرلى جاستاعى ادامداردى بىرىكتىرە الدى. سەبەبى شىعارماشىلىق ۇشقىنىن ءاربىر ادام بويىنان تابۋعا بولادى. كەنەپ بەتىندە سەنىمدى سىرعىعان قىلقالام قيمىلىنان ءتۇرلى جولاقتار, بوياۋلار مەن بەينەلەر پايدا بولىپ, سوڭىندا تاماشا ءبىر كارتينانىڭ دۇنيەگە كەلۋىن باقىلاۋ دا ءبىر عانيبەت. كۇنى كەشە ونەردەن الشاق جۇرگەنىڭمەن بۇگىن ءوزىڭدى كەسكىندەمە ونەرىندە بايقاپ كورگەن ءتىپتى دە عانيبەت.
جوبانىڭ ماقساتى – مايلى بوياۋمەن سۋرەت سالۋدىڭ قىر-سىرىن ۇيرەتە وتىرىپ, ادامنىڭ وزىنە دەگەن سەنىمىن وياتۋ.
كورمەگە ءتۇرلى جانرداعى — پەيزاج, ناتيۋرمورت, پورترەت جانە باتيك ادىسىندە سالىنعان 50 شىعارما قويىلدى.
سۋرەت سالۋدا اكادەميالىق بىلىمدەرى بولماعانىمەن, سۋرەتتى جۇرەگىمەن جانە كوڭىلىنىڭ سيقىرلى ساۋلەسى – دارىن, شابىت جانە زور سۇيىسپەنشىلىكپەن سالاتىن جاندار. ونەرگە دەگەن سۇيىسپەنشىلىك بۇل ونەر يەلەرىن «الەم جاۋىنگەرلەرىندەي» سەزىندىرەدى.
ساپارباي پارمانقۇل,
«ەگەمەن قازاقستان»
الماتى
