دەپۋتاتتار الدىمەن مادەنيەت جانە سپورت ءمينيسترى ارىستانبەك مۇحامەدي ۇلىنىڭ تانىستىرۋىمەن كەيبىر زاڭنامالىق اكتىلەرگە ارحيۆ ءىسى ماسەلەسى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ءبىرىنشى وقىلىمدا ماقۇلدادى. ءمينيستردىڭ مالىمدەۋىنشە, اتالعان قۇجات اياسىندا ارحيۆ ىستەرى جونىندە 4 بىردەي زاڭعا وزگەرىستەر مەن تولىقتىرۋلار ەنگىزۋ كوزدەلگەن. «زاڭ جوباسىنىڭ نەگىزگى ماقساتى – قۇجاتتامالىق قامتاماسىز ەتۋدىڭ جاڭا اقپاراتتىق نىساندارىن ءومىردىڭ بارلىق سالالارىنا ىقپالداستىرۋ مەن ەلەكتروندى قۇجات اينالىمىنا كوشۋگە بايلانىستى ارحيۆ ءىسى سالاسىنداعى زاڭنامانى جەتىلدىرۋ بولىپ تابىلادى. سوندىقتان دا ءبىز ارحيۆتىك قۇجات, ارحيۆ ءىسى سەكىلدى تۇسىنىكتەردى سارالاي وتىرىپ, ۇلتتىق ارحيۆ قورىنا قۇجاتتاردىڭ مەملەكەتتىك ەسەبى, ۇلتتىق ارحيۆ قورىنىڭ قۇجاتى, باسقارۋدى قۇجاتتىق تۇرعىدا قامتاماسىز ەتۋ, ەرەكشە قۇندى قۇجات سەكىلدى ۇعىمداردى اينالىمعا ەنگىزبەكپىز. وعان قوسا, مەملەكەتتىك ارحيۆ جۇيەسىنە تۇڭعىش پرەزيدەنت – ەلباسى كىتاپحاناسىن قوسۋدى ۇسىنامىز», دەدى ا.مۇحامەدي ۇلى.
سونىمەن قاتار مينيستر ءوز بايانداماسىندا مەملەكەتتىك ارحيۆ كورسەتەتىن قىزمەتىنىڭ ءتىزىمىن, اتاپ ايتقاندا, اقىلى قىزمەتتى كەڭەيتۋ جوسپارلانىپ وتىرعانىن ايتتى. ال مۇنداي قىزمەتتەردىڭ قاتارىنا تاقىرىپتىق, گەنەالوگيالىق سۇراۋلار مەن ارحيۆ قۇجاتتارىنىڭ دەپوزيتارلىق ساقتالۋى جاتادى ەكەن. «وتكەن جىلى ەكسپو-2017 مامانداندىرىلعان حالىقارالىق كورمەسى اياسىندا استانادا سيرەك كىتاپتار مەن قولجازبالاردىڭ ۇلتتىق ورتالىعى اشىلعان بولاتىن. ءبىز بۇل تۇرعىدا ارمەنياداعى عىلىمي-زەرتتەۋ ورتالىقتارىنىڭ تابىستى تاجىريبەسىن نەگىزگە الدىق. قىسقا ۋاقىت ىشىندە ورتالىقتا مەملەكەت تاريحى مەن مادەنيەتىنە قاتىستى اسا قۇندى تاريحي كىتاپتاردىڭ جانە قولجازبالاردىڭ كوللەكتسياسى قالىپتاسىپ ۇلگەردى. زەرتتەۋشىلەر ءۇشىن كورمە, وقۋ زالدارى اشىلدى», دەدى ا.مۇحامەدي ۇلى.
ال اتالعان زاڭ جوباسىنا قاتىستى قوسىمشا بايانداما جاساعان ماجىلىستەگى الەۋمەتتىك-مادەني دامۋ كوميتەتىنىڭ مۇشەسى كەڭەس ابساتيروۆ بۇل ماسەلە بويىنشا جۇمىس توبىنىڭ 5 وتىرىسى جانە ءتيىستى كوميتەتتىڭ كەڭەيتىلگەن وتىرىسى ۇيىمداستىرىلعانىن اتاپ ءوتتى. «زاڭ جوباسىمەن جۇمىس ىستەۋ بارىسىندا دەپۋتاتتار جوبانىڭ جەكەلەگەن نورمالارىن ناقتىلاۋعا جانە جاقسارتۋعا باعىتتالعان تۇزەتۋلەرىن ەنگىزدى. ال تالقىلاۋ ناتيجەلەرى بويىنشا قازاقستان رەسپۋبليكاسى كونستيتۋتسياسىنىڭ 61-بابىنىڭ 6-تارماعىنا سايكەس ەنگىزگەن ۇسىنىستار ەل ۇكىمەتىنە جولداندى», دەدى ول.
كۇن تارتىبىنە شىعارىلعان كەلەسى ماسەلە – باس پروكۋروردىڭ ورىنباسارى اندرەي لۋكين تانىستىرعان «قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىنداعى ۇستاپ بەرۋ تۋرالى شارتتى راتيفيكاتسيالاۋ تۋرالى» زاڭ جوباسى بولدى. ايتا كەتەيىك, بۇل قۇجات 2015 جىلى 15 ماۋسىمدى حانويدا جاسالعان شارتتى راتيفيكاتسيالاۋعا باعىتتالعان. «زاڭ جوباسىنىڭ نەگىزگى ماقساتى – ۋاعدالاسۋشى مەملەكەتتەردىڭ ۇستاپ بەرۋگە اكەپ سوعاتىن قىلمىسى ءۇشىن قىلمىستىق قۋدالاۋدى جۇزەگە اسىرادى نەمەسە زاڭدى كۇشىنە ەنگەن سوت ۇكىمىن ورىنداۋ ماقساتىندا ءوزىنىڭ اۋماعىندا جۇرگەن كەز كەلگەن ادامدى بەرۋ سالاسىندا ىنتىماقتاستىقتى جۇزەگە اسىرۋ بولىپ تابىلادى», دەدى ا.لۋكين.
باس پروكۋروردىڭ ورىنباسارىنىڭ تۇسىندىرۋىنشە, شارتقا سايكەس ءبىر تاراپتىڭ اۋماعىندا قىلمىس جاساعان جانە ەكىنشى تاراپتىڭ اۋماعىندا جاسىرىنىپ جۇرگەن قىلمىسكەرلەردى ەكستراديتسيالاۋ بويىنشا ەكى ەلدىڭ قۇقىق قورعاۋ ورگاندارىنىڭ ءوزارا ءىس-قيمىل جاساۋ ماسەلەلەرى رەگلامەنتتەلگەن.
وتىرىس اياسىندا وسى زاڭ جوباسىنا قاتىستى قوسىمشا باياندامانى باستان-اياق قازاق تىلىندە جاساعان زاڭناما جانە سوت-قۇقىقتىق رەفورما كوميتەتىنىڭ مۇشەسى نارينە ميكاەليان ورايلى ساتتە ءماجىلىس توراعاسى تاراپىنان جوعارى باعا الىپ, قوشەمەتكە بولەندى. ال دەپۋتاتتىڭ پىكىرىنشە, قۇجاتقا ۇستاپ بەرۋ سالاسىنداعى ەۋروپالىق ستاندارتتار يمپلەمەنتاتسيالانعان. «سول سەبەپتەن دە ۇستاپ بەرۋگە اكەپ سوعاتىن نەگىزدەر مەن ۇستاپ بەرۋدەن باس تارتۋ شارتتارى ەگجەي-تەگجەيلى رەگلامەنتتەلگەن. سونداي-اق ۋاقىتشا ۇستاپ بەرۋ مەن ۇستاپ بەرۋدى كەيىنگە قالدىرۋدى رەتتەيتىن نورمالار دا بار. ۇستاپ بەرۋ ماسەلەلەرىندە تىكەلەي ءوزارا ءىس-قيمىل جاسايتىن ەكى مەملەكەتتىڭ ورتالىق ورگاندارى ايقىندالعان. قۇجاتتاردى بەرۋ ءتارتىبى مەن ولاردىڭ رۇقسات ەتىلۋى دە ەسكەرىلگەن», دەدى ن.ميكاەليان.
ايتا كەتەيىك, جيىن بارىسىندا حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ماۋلەن اشىمباەۆتىڭ بايانداۋىمەن قازاقستاننىڭ قاۋىپسىزدىك كەڭەسى تۋرالى جانە ونىڭ قىزمەتتىك ماسەلەلەرىنە وزگەرىستەر مەن تولىقتىرۋلار ەنگىزۋ تۋرالى زاڭ جوباسىنا قورىتىندى ازىرلەۋ جونىندە شەشىم قابىلداندى. ال وتىرىس سوڭىندا حالىق قالاۋلىلارى ءوز قۇزىرەتتەرى شەڭبەرىندە ءتيىستى ۆەدومستۆو باسشىلارىنىڭ اتىنا دەپۋتاتتىق ساۋالدارىن جولدادى. ولاردىڭ قاتارىندا بەرىك دۇيسەنبينوۆ, گالينا بايماحانوۆا, جامبىل احمەتبەكوۆ, امانجان جامالوۆ, سەرىك ساپيەۆ, شاكير حاحازوۆ, ۆلاديسلاۆ كوسارەۆ, قۋانىش سۇلتانوۆ, كۇدايبەرگەن ەرجان, شايماردان نۇرىموۆ جانە ازات پەرۋاشەۆ بولدى.
نۇرلىبەك دوسىباي,
«ەگەمەن قازاقستان»
