– جاڭا بالەت مەكتەبى 180 ورىنعا نەگىزدەلگەن, ال ينتەرناتىمەن قوسا العاندا قوسىمشا تاعى 60 ورىندىق عيمارات 2013 جىلى سالىنۋى كەرەك ەدى, – دەيدى سەمەيدەگى بالەت مەكتەبىنىڭ ديرەكتورى كاميليا راشيتقىزى, – سول كەزدە جاڭا نىساننىڭ تەحنيكالىق-ەكونوميكالىق نەگىزدەمەسى قولعا الىندى. ءسويتىپ مەكتەپ مەن ينتەرناتتىڭ سالىنۋىنا 640 ملن تەڭگە قاجەت بولعان ەدى, قاراجات سول كۇيى بولىنبەي قالدى. سەمەي قالاسىنىڭ ورتالىعىنداعى «72 كۆارتال» اۋماعىنداعى 8-ناۋرىز كوشەسى بويىنان قالا اكىمدىگى الدەقاشان جەر ءبولىپ قويدى. بىراق قارجى بەرىلمەگەندىكتەن, جوبالاۋ-سمەتالىق قۇجات تا سول كۇيى جاسالمادى. «سەمسترويپروەكت» جشس باعالاعانداي, مەكتەپ پەن ينتەرنات قۇرىلىسىنىڭ جوبالاۋ-سمەتالىق قۇجاتىنا بارلىعى 15 ملن تەڭگەدەن ارتىق قاراجات كەرەك ەكەن. قازىردەن باستاپ 2018 جىلدىڭ بيۋدجەتىنە وسىنى كىرگىزۋ كەرەك. وبلىستىق بيۋدجەتكە تەك جوبالاۋ-سمەتالىق قۇجات جاسالعان سوڭ عانا تاپسىرىس بەرىلەدى.
سونىمەن «دارىندى بالالارعا ارنالعان ارنايى بالەت مەكتەبىنە» 25 جىل بويى جەتەكشىلىك جاساپ وتىرعان شىعىس قازاقستان وبلىستىق تاتار قوعامدىق ورتالىعىنىڭ ءتورايىمى كاميليا يسمايلوۆانىڭ سوزىنە سۇيەنسەك, بالەت مەكتەبى جاڭادان زاماناۋي تالاپقا ساي جاسالۋى ءتيىس. وندا 4 حورەوگرافيالىق سىنىپ بار, ودان وزگە 2 بولمە مۋزىكالىق قۇرالدارمەن جۇرەتىن ساباقتارعا ارنالسا, 2 بولمە ارنايى پاندەرگە, ال 4 كابينەت اكىمشىلىك جۇمىستارعا تيەسىلى. سونداي-اق تىگىن تسەحى, كوستيۋم كيەتىن جانە كيىمدەردى جۋاتىن بولمە, اسحانا, پسيحولوگيالىق قيىندىقتاردان ارىلۋ, ياعني وڭاشالانۋ بولمەسى, سۋمەن جۋىناتىن, باسسەين جانە تاعى باسقالارى قامتىلعان.
– سوڭعى كەزدە ەلىمىزدە بالەتكە قىزىعۋشىلىق ارتىپ كەلەدى, – دەدى كاميليا راشيتقىزى, – استانادا «استانا وپەرا» بالەت جانە وپەرا تەاترى سالىنعان. قازاق ۇلتتىق حورەوگرافيا اكادەمياسى ىسكە قوسىلدى. وسىنىڭ بارلىعى ەلباسىنىڭ ونەر مەن مادەنيەتتى قولداۋىنىڭ ارقاسىندا جۇزەگە اسىپ جاتىر. سەمەيدىڭ بالەت مەكتەبىندە ناعىز شەبەرلەر, ءوز ءىسىنىڭ مايتالماندارى جۇمىس ىستەيدى. ءبىزدىڭ تۇلەكتەر «استانا وپەرا» ساحناسىندا ونەر كورسەتەدى. جاقىندا وبلىس باسشىسى دانيال احمەتوۆ شىعىس قازاقستان وبلىسىندا كاسىبي ۇلتتىق ەتنوگرافيالىق انسامبل قۇرۋدى ۇسىنعان ەدى.
ءبىزدىڭ بالەت مەكتەبىنىڭ ونەرپازدارىنىڭ وسى ءانسامبلدى قۇرۋعا مۇمكىندىكتەرى دە, تالانتتارى دا جەتەدى. ەتنوگرافيالىق انسامبل دامىپ, ەلگە تانىمال بولۋى ءۇشىن ونىڭ قۇرامىندا تالانتتىلار بولۋ كەرەك. جانە ءبىزدىڭ عانا ەمەس, شەتەلدىڭ دە جوعارى ونەر مەكتەبىمەن بايلانىستارىن ۇزبەگەن ءجون. ءبىز وسى ءىستى باستاعان 25 جىل ىشىندە قازاق ۇلتتىق حورەوگرافيا اكادەمياسىمەن, الماتى حورەوگرافيا ۋچيليششەسىمەن تىعىز بايلانىس ورناتتىق. حالىقارالىق وقۋ ورىندارىمەن دە ارىپتەستىك قارىم-قاتىناستامىز. بىزگە ۇزدىك ونەر مايتالماندارى كەلىپ, سەمينارلار, شەبەرلىك ساباقتار وتكىزەدى.
وسىنىڭ ءبارىن ايتىپ وتىرعان سەبەبىم, بالەت مەكتەبىنىڭ ءوز ءۇيى مەن تالانتتى بالالارعا ارنالعان ينتەرناتى بولسا, وبلىس ءوزىنىڭ بالەت مەكتەبى, ەتنوگروفيالىق-حورەگرافيالىق انسامبلدەرىمەن حالىقارالىق دەڭگەيدە تانىمال بولا تۇسەر ەدى.
وسى ماسەلە تۋرالى قالا اكىمى ەرماك سالىموۆتەن سۇراعانىمىزدا, 2018 جىلدىڭ بيۋدجەتىنەن جوبالاۋ-سمەتالىق قۇجاتتى جاساۋ ءۇشىن قارجى قاراستىرىلاتىنىن ايتتى. ونىڭ ايتۋىنشا, «72 كۆارتال» اۋدانىندا ەمەس, قالا سىرتىنداعى «قاراعايلى» دەگەن جەردە ءتورت مەكتەپ, ءتورت بالاباقشا سالىنباقشى. وسى عيماراتتاردىڭ ءبىرىن بالەت مەكتەبىنە لايىقتاۋ ويدا بار كورىنەدى.
راۋشان نۇعمانبەك,
جۋرناليست
سەمەي
