ءبىز وسى ورايدا, ەلىمىزدەگى فۋتبول ماماندارى اراسىندا كىشىگىرىم ساۋالناما جۇرگىزىپ, ەلوردالىق كوماندانىڭ «سپورتينگكە» قارسى ويىنداعى مۇمكىندىگى جانە «سپارتاكقا» قارسى كەزدەسۋدىڭ ناتيجەسى تۋرالى پىكىرلەرىن سۇراعان بولاتىنبىز.
1. «استانا» دۋبايداعى وجج اياسىندا رەسەي چەمپيونى ماسكەۋلىك «سپارتاك» كومانداسىنا قارسى ويىندا جەڭىسكە جەتتى. بۇل ويىن ناتيجەسى كەزدەيسوق پا, الدە, كوماندالاردىڭ شىنايى دەڭگەيىن كورسەتتى مە؟
2. ستانيمير ستويلوۆ كومانداعا ءتيىستى دەڭگەيدە كوڭىل بولىنبەي جاتقاندىعىن, ءتىپتى, سوڭعى ۋاقىتتا ترانسفەرگە قاراجاتتىڭ جوقتىعىن, ال سىياقىلاردىڭ تولەنبەگەنىنە ءبىر جىلدان استام ۋاقىت وتكەندىگىن ايتىپ ءجۇر. ءسىزدىڭ ويىڭىزشا «استانا» ءدال قازىرگى قارجىلىق مۇمكىندىكتەرىمەن ەۋروپانىڭ ۇزدىك كوماندالارىمەن باسەكەلەسە الا ما؟
3. «استانا» كومانداسى ەكى ماۋسىمدا رەسەي, پولشا, سلوۆەنيا جانە چەحيانىڭ ۇزدىك كلۋبتارى – «سپارتاك» (ماسكەۋ), «لەگيا» (ۆارشاۆا), «ماريبور», «سلاۆيا» (پراگا) كوماندالارىنا قارسى وتكىزگەن ويىنداردا باسىم ءتۇستى. «استانانىڭ» جەتكەن جەتىستىكتەرىنىڭ ارتىندا كىم نەمەسە نە تۇر دەپ ويلايسىز؟
4. «استانا» كومانداسى 15 اقپان كۇنى ەۋروپا ليگاسىنىڭ 1/16 كەزەڭى اياسىندا پورتۋگاليالىق «سپورتينگكە» قارسى العاشقى كەزدەسۋىن وتكىزەدى. وتاندىق كلۋبتىڭ وسى كەزدەسۋلەردە جەڭىسكە جەتۋ مۇمكىندىگى قانشالىقتى دەپ ويلايسىز؟
قۇرالبەك ورداباەۆ, «قايرات» فۋتبول كلۋبىنىڭ ارداگەر قاقپاشىسى:
1. ءدال قازىر ەكى كوماندا بىردەي جاعدايدا, بىردەي دەڭگەيدە. رەسەي چەمپيوناتى ناۋرىز ايىنىڭ باسىندا جالعاسىن تاپسا, بىزدەگى ەل چەمپيوناتى دا سول ۋاقىتتا باستالادى. ال وعان دەيىن ەكى كوماندانىڭ ەۋروپا ليگاسى اياسىنداعى ماتچتارى بار. ال كەشەگى ويىنعا كەلەر بولساق, «استانا» جەڭىسكە دەگەن جىگەر تانىتتى. ويىننىڭ وقۋ-جاتتىعۋ جيىنى اياسىندا وتكەندىگىنە قاراماستان بۇل ەلوردالىق ويىنشىلاردىڭ وزدەرىنە دەگەن سەنىمدىلىكتەرىن ارتتىراتىنى انىق. ەكى كوماندانىڭ تولىق بەت-بەينەسىن كورە الدىق دەپ ويلايمىن.
2. ستانيمير ستويلوۆ باپكەردىڭ سىياقى تۋرالى ايتقانىنا پىكىر بىلدىرۋدەن اۋلاقپىن. سەبەبى, بۇل جاعدايعا كلۋب باسشىلىعى مەن باس دەمەۋشىسى «سامۇرىق قازىنا» قورىنىڭ وكىلدەرى جاۋاپ بەرۋى كەرەك. وسىعان دەيىن, «استانا» فۋتبول كلۋبىنىڭ پرەزيدەنتى سايان حاميتجانوۆ ماۋسىمعا جانە ەۋروپا ليگاسىنىڭ 1/16 كەزەڭى اياسىندا وتەتىن «سپورتينگكە» قارسى كەزدەسۋگە دايىندىق جوسپارعا ساي ءوتىپ جاتىر دەپ مالىمدەمە جاسادى. ال كلۋبتىڭ مۇمكىندىكتەرىنە كەلەر بولساق, «استانا» كومانداسى سوڭعى جىلدارى وتە جوعارى ناتيجەلەرگە جەتتى. ونى ەۋروپانىڭ ۇزدىك كلۋبتارىنا قارسى كەزدەسۋلەردە كورسەتكەن ويىندارىمەن دالەلدەي الدى.
3. ءدال قازىر ەۋروپادا ءبىزدىڭ ەلدەگى فۋتبولدىڭ دەڭگەيىنە مەنسىنبەۋشىلىكپەن قاراۋ دەگەن جوق. سەبەبى, «استانا» كومانداسى سوڭعى جىلدارداعى جەتىستىكتەرى ارقىلى ول تۇسىنىكتى تۇگەلدەي جويدى. ءدال قازىر «استانا» جانە «قايرات» قازاقستاننىڭ بەتكە ۇستار كوماندالارى.
4. ەكى ويىن قورىتىندىسىن ناقتى ايتا المايمىن. ال «استانا ارەنا» ستاديونىندا وتەتىن كەزدەسۋدە جەڭىسكە جەتەتىنىمىزگە سەنىمدىمىن. وسىعان دەيىن ەشبىر قازاقستاندىق كلۋب مۇنداي ناتيجەگە جەتكەن ەمەس. ەلوردالىق كوماندا ويىنشىلارى ماتچتى ەۋروپانىڭ بەلدى فۋتبول اگەنتتەرى تاماشالايتىنىن جاقسى بىلەدى. سوندىقتان, وزدەرىن كورسەتۋگە, جەڭىسكە جەتۋگە ەرەكشە تىرىسادى.
اسقار قوجابەرگەنوۆ, باپكەر:
1. «استانا» كومانداسى زاڭدى تۇردە جەڭىسكە جەتتى. دەگەنمەن, ەكى كوماندانىڭ وقۋ-جاتتىعۋ جيىندارىن باستاعاندارىنا از عانا ۋاقىت بولدى. ولار وزدەرىنىڭ ءالى دە تولىقتاي باپتارىنا كەلە قويعان جوق. ال باق-تا جاريالانعان مالىمەتتەر بويىنشا رەسەيلىك كوماندا قازاقستان چەمپيونىنا قارسى ويناۋعا وزدەرى ۇسىنىس جاساعان. وسىنىڭ ءوزى ءبىزدىڭ ەلدەگى فۋتبولدىڭ جاڭا دەڭگەيگە كوتەرىلگەنىن كورسەتەدى.
2. «استانا» باپكەرى ستانيمير ستويلوۆتىڭ پىكىرىمەن كەلىسپەسكە امال جوق. سەبەبى, ول ويىنشىلاردىڭ كوزقاراسىن اشىق بىلدىرە الاتىن, سوعان جاۋاپ بەرەتىن مامان. ال جوعارىدا ايتىلعان ماسەلەلەر كوماندانى ويىنعا دايىنداۋدا كەرى اسەرىن تيگىزەتىنى انىق. «استانا» كومانداسىنىڭ بۇگىنگى كۇنگە دەيىن جەتكەن جەتىستىگىنە كوز سالاتىن بولساق, وندا كومانداعا سىياقىلارى تولەنۋى ءتيىس.
3. مەن ءدال قازىر «استانا» – ەۋروپانىڭ مىقتى كوماندالارىنىڭ ءبىرى دەپ سەنىممەن ايتا الامىن. كوماندا وسى جەتكەن جەتىستىكتەرىن الداعى ماۋسىمدا قايتالاپ, ەلىمىزدىڭ نامىسىن ەۋروكۋبوكتەردە لايىقتى قورعاسىن دەسەك, «استاناعا» بارلىق جاعىنان قولداۋ اۋاداي قاجەت.
4. اللا ءساتىن سالسا, سول ويىندى كورۋگە مەن دە ارنايى استاناعا بارامىن. مەنىڭ ويىمشا پورتۋگاليالىق كوماندانى ءوز الاڭىمىزدا بىرنەشە دوپ ايىرماسىمەن جەڭۋگە مۇمكىندىگىمىز بار. سەبەبى, ۋاقىت ايىرماشىلىعى, قازاقستانعا دەيىنگى اراقاشىقتىق, «استانا ارەناداعى» جاساندى الاڭ جانە جانكۇيەرلەردىڭ قىزۋ قولداۋى جەڭىسكە كەپىلدىك بەرەدى. استانادا وتەتىن كەزدەسۋدە جاقسى ناتيجەگە قول جەتكىزسەك, كوماندا سىرت الاڭدا قالاي ويناۋ كەرەك ەكەندىگىن بىلەدى. وعان ەلوردالىق كوماندانىڭ وتكەن ماۋسىمداعى لاتۆيالىق «يۋرمالا», يزرايلدىك «ماككابي», چەحيالىق «سلاۆياعا» قارسى كەزدەسۋلەردە كورسەتكەن ويىنى دالەل.
ايدار كۇمىسبەكوۆ, ۇلتتىق قۇرامانىڭ ەكس-قورعاۋشىسى:
1. ارينە, ءادىل ناتيجە «استانا» كومانداسى وتكەن جىلى وقۋ-جاتتىعۋ جيىنى بارىسىندا رەسەيلىك كلۋبقا 0:5 ەسەبىمەن ەسە جىبەرگەن بولاتىن. ال بۇگىنگى جەڭىس كوماندانىڭ جاڭا دەڭگەيگە كوتەرىلگەنىن كورسەتتى. ويىننىڭ جولداستىق ماتچ بولعاندىعىنا قاراماستان, استانالىقتار وسى ويىندا جەڭىسكە جەتۋ ارقىلى قازاقستاندىق جانكۇيەرلەرگە ەرەكشە قۋانىش سىيلادى.
2. البەتتە, باسەكەلەسە الادى. «استانا» فۋتبول كلۋبىنىڭ ەۋروپا ليگاسىنىڭ 1/16 كەزەڭىنە شىعۋى سونىڭ ايقىن دالەلى. باپكەر ايتىپ وتىرعان كومانداداعى قارجىلىق مۇمكىندىكتى جاقسارتۋ, ويىنشىلارعا سىياقىلارىن تولەۋ, قاتارعا جاڭا ويىنشىلار الۋ كەرەك دەگەن پىكىرلەرىمەن تولىقتاي قوسىلامىن. سەبەبى, كوماندانىڭ ويىنىنا جوعارىداعى فاكتورلار تىكەلەي اسەر ەتەدى. ەۋروپاداعى مىقتى كوماندالارعا قارسى ويىنداردا جەڭىسكە جەتۋ ءۇشىن, كوماندا قۇرامىنا ەۋروكۋبوكتەردە جيناعان تاجىريبەسى مول 1-2 ويىنشى السا دەپ ويلايمىن.
3. «سپارتاكقا» قارسى ويىندى مىسالعا الار بولساق, استانالىقتار بۇرىنعىمەن سالىستىرعاندا قارسىلاستارىنان قايمىعۋ, قورقۋ دەگەندى ۇمىتقان. وزدەرىنە دەگەن سەنىمدىلىكتەرى باسىم. وسى ورايدا, «استانا» فۋتبول كلۋبىن ەۋروپانىڭ ورتا دەڭگەيدەگى ۇجىمدارىنىڭ ءبىرى دەپ سەنىممەن ايتۋعا بولادى. ءتىپتى, قازىر جانكۇيەرلەردىڭ ءوزى ەلوردالىق كوماندادان تەك جەڭىس كۇتەدى. ونىڭ بارلىعى دۇرىس تاڭدالعان ويىنشىلار مەن باپكەرلەر قۇرامىنىڭ, كلۋب باسشىلىعىنىڭ, جالپى العاندا دۇرىس باعىتتا جۇمىس ىستەپ جاتقان جۇيەنىڭ ارقاسى. كوماندا وسى 2-3 جىلدىڭ ىشىندە جاڭا دەڭگەيگە كوتەرىلدى.
4. كەز كەلگەن قازاقستان ازاماتى «استانانىڭ» ودان ءارى وتكەنىن قالايدى. مەنىڭ ويىمشا ەكى كوماندانىڭ مۇمكىندىگى بىردەي, 50 دە 50. ەگەر ەلوردالىق كوماندا ويىنعا تىڭعىلىقتى دايىندالىپ, دۇرىس تاكتيكا تاڭداي بىلسە, كەلەسى كەزەڭگە جولداما الاتىن مۇمكىندىگى بار.
ەرمۇحامەد ماۋلەن,
«ەگەمەن قازاقستان»
