پاتەر كىلتتەرى تاپسىرىلعان سالتاناتتى جيىندا وبلىس باسشىسى جانسەيىت تۇيمەباەۆ مەملەكەتتىك «نۇرلى جول» باعدارلاماسى اياسىندا ەلگە بەرىلىپ جاتقان تۇرعىن ۇيلەر ەلباسىنىڭ حالىققا دەگەن قامقورلىعىنىڭ كورىنىسى ەكەندىگىن اتاپ ءوتتى.
– مەملەكەت باسشىسى نۇرسۇلتان نازارباەۆتىڭ جۇرگىزىپ وتىرعان ساياساتىنىڭ ماقساتى – ءاربىر قازاقستاندىق وتباسىن جەكە تۇرعىن ۇيمەن قامتاماسىز ەتۋ. ەلىمىزدە سوڭعى جىلدارى جۇزەگە اسىرىلىپ جاتقان «نۇرلى جول» مەملەكەتتىك باعدارلاماسى اياسىندا وبلىس ورتالىعىن ايتپاعاندا, ءوڭىردىڭ تۇكپىر-تۇكپىرىندە تۇرعىن ۇيلەر قارقىندى بوي كوتەرىپ, جەرلەستەرىمىز جاڭا پاتەرلەرگە يە بولۋدا. مىنە بۇگىن مەملەكەتتىك باعدارلاما بويىنشا 288 پاتەر ءوز يەسىن تاپتى. بيىلعى جىل بۇگىنگى پاتەر يەلەرى ءۇشىن قۋانىشتى ساتتەن باستالعالى وتىر. سىزدەردى قونىستارىڭىزبەن قۇتتىقتايمىن, شاڭىراقتارىڭىز باقىت پەن قۋانىشقا, بالا كۇلكىسىنە تولسىن, – دەدى وبلىس باسشىسى.
پاتەر العانداردىڭ ءبىرى باۋىرجان ايساعاليەۆتىڭ قۋانىشىن تۇسىنۋگە بولادى. ءبىلىم سالاسىندا 22 جىل قىزمەت اتقارعان ۇستاز:
– بۇل كۇنگە دە جەتتىك, – دەپ مارقايادى. – پاتەر تاۋقىمەتىن تارتقاندار ونىڭ قانشالىقتى قيىندىعىن بىلەدى. بۇگىندە ۇكىمەتكە ارتىق-اۋىس ءسوز ايتىپ, حالىقتىڭ كوڭىلىن قوبالجىتاتىندار كوبەيىپ بارادى. ەل پايداسى ءۇشىن ەشتەڭە جاسالماي وتىرعانداي كورەدى. ءوز باسىم ءدال قازاقستانداعىداي ەلگە قامقورلىقتى كورشىلەس مەملەكەتتەردەن بايقاي قويمايمىن. حالىقتىڭ ءالسىز توپتارىنا جەتكىلىكتى كوڭىل ءبولىنۋ-
دە. سوندىقتان مەملەكەت قامقورلىعى ءۇشىن ەلباسىمىزعا راحمەت ايتامىز.
جاڭادان پايدالانۋعا بەرىلگەن پاتەر كىلتتەرىن تاپسىرعان وبلىس اكىمى ايساعاليەۆتار وتباسىنىڭ داستارقانىنان ءدام تاتتى.
ءسوز رەتى كەلگەندە ايتا كەتەيىك, وبلىستا 2017 جىلى اۋماعى 625,789 مىڭ شارشى مەتردى قۇرايتىن جالپى سانى 7500-گە جۋىق پاتەر بەرىلگەن. ونىڭ ىشىندە 3 مىڭنان استام پاتەر «بايتەرەك» اق ارقىلى بەرىلگەن ارەندالى تۇرعىن ۇيلەر بولسا, 2285 پاتەر جەكەمەنشىك ەسەبىنەن الىنعان تۇرعىن ۇيلەر. بۇدان وزگە, جاس وتباسىلارعا ارنالعان جانە ساتىپ الۋ قۇقىعىنسىز بەرىلەتىن ارەندالىق, سونداي-اق نەسيەلىك تۇرعىن ۇيلەر بويىنشا 2161 پاتەر يەلەرىن تاپتى.
مەملەكەتتىك باعدارلامالار ۇلىستىڭ ۇيىتقىسى اتانعان وڭتۇستىككە وسىنداي شاراپاتىن تيگىزىپ جاتىر.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
