تاراز قالالىق مادەنيەت ۇيىندە جامبىل وبلىسى اكىمىنىڭ ءبىرىنشى ورىنباسارى, تاراز قالاسى بويىنشا اقپاراتتىق توپتىڭ جەتەكشىسى بەكبولات ورىنبەكوۆتىڭ توراعالىعىمەن قالا اكتيۆىنىڭ جيىنى ءوتتى. اتالعان جيىندا قالا اكىمى رۇستەم داۋلەت بايانداما جاساپ, ەلباسى جولداۋىندا ايتىلعان ونەركاسىپتىك رەۆوليۋتسيا الەمىنە بەيىمدەلۋدىڭ 10 مىندەتىنە توقتالدى. جالپى, تاراز قالاسىندا 2015-2017 جىلدار ارالىعىندا جالپى قۇنى 19,3 ميلليارد تەڭگەنى قۇرايتىن 9 يندۋستريالىق جوبا ىسكە قوسىلعان ەكەن. ناتيجەسىندە 290 جاڭا جۇمىس ورنى اشىلعان. ەندى ەلباسى جولداۋىنان تۋىندايتىن مىندەتتەردى جۇزەگە اسىرۋ اياسىندا ۇستىمىزدەگى جىلى جالپى قۇنى 6 ميلليارد 924 ميلليون تەڭگە بولاتىن 4 ينۆەستيتسيالىق جوبانى ىسكە اسىرۋ جوسپارلانىپ وتىر. ناتيجەسىندە 607 جاڭا جۇمىس ورنى اشىلادى. سونىمەن قاتار شاھار باسشىسى قالاداعى كاسىپورىنداردا تسيفرلى تەحنولوگيالاردى ەنگىزۋ جۇمىستارى قولعا الىنعانىن دا اتاپ ءوتتى.
وڭىردە قۇرىلعان اقپاراتتىق توپتىڭ جۇمىس كەستەسىنە سايكەس, وبلىستىق كاسىپكەرلىك جانە يندۋستريالىق-يننوۆاتسيالىق دامىتۋ باسقارماسىنىڭ باسشىسى قارلىعاش ارالبەكوۆا مەن وبلىس اكىمى اپپاراتىنىڭ اگروونەركاسىپ كەشەنى مونيتورينگىن دامىتۋ ءبولىمىنىڭ باسشىسى دۋلات وسپانوۆ شۋ اۋدانىندا بولىپ, اۋدان اكتيۆىمەن كەزدەستى. اكتيۆ جيىنىندا ءسوز العان اۋدان اكىمى قايرات دوساەۆ ەلباسى جولداۋى تۇرعىنداردىڭ ءال-اۋقاتىن ارتتىرۋعا جانە قوعامنىڭ دامۋىن قامتاماسىز ەتۋگە باعىتتالعانىن اتاپ ءوتتى. ءوز سوزىندە قارلىعاش ارالبەكوۆا وبلىستا كاسىپكەرلىكتى قولداۋ كارتاسى بويىنشا جالپى قۇنى 568 ميلليارد تەڭگەنى قۇرايتىن 36 ينۆەستيتسيالىق جوبا جۇزەگە اسىرىلىپ جاتقانىن, ال ەلىمىزدىڭ يندۋستريالىق-يننوۆاتسيالىق دامۋ باعدارلاماسىنىڭ العاشقى بەسجىلدىعىندا شۋ اۋدانىندا جالپى قۇنى 1,5 ميلليارد تەڭگە بولاتىن 2 جوبا جانە 5,7 ميلليون اقش دوللارىن قۇرايتىن 1 جوبا ىسكە اسىرىلعانىن ايتتى.
وبلىستىق ءماسليحاتتىڭ حاتشىسى باعلان قاراشولاقوۆ باستاعان اقپاراتتىق توپ مويىنقۇم اۋدانىندا بولىپ, ءتورت باعىت بويىنشا ءتۇسىندىرۋ جۇمىستارىن جۇرگىزدى. اكتيۆ جيىنىن اۋدان اكىمى باقىتجان نۇركەنوۆ اشىپ, جۇرگىزىپ وتىردى. سونىمەن قاتار وبلىستىق ءماسليحات اپپاراتىنىڭ باسشىسى ءبىرجان كۇزەمبەكوۆ, وبلىستىق ەكولوگيا دەپارتامەنتىنىڭ باسشىسى قاناتبەك مادىبەك, وبلىستىق قازاق دراما تەاترىنىڭ ديرەكتورى بولات بەكجانوۆ, تاراز يننوۆاتسيالىق-گۋمانيتارلىق ۋنيۆەرسيتەتىنىڭ پرورەكتورى سانات اشىربەكوۆ, وبلىستىق ءدىن ىستەرى باسقارماسىنىڭ باسشىسى جانگەلدى وماروۆ جانە باسقا دا ازاماتتار اۋداننىڭ قىلىشباي, قۇموزەك, قارابوگەت اۋىلدارىندا بولىپ, كوپشىلىكپەن كەزدەستى.
ال «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى مۇراتحان شۇكەەۆ تالاس اۋدانىنا كەلىپ, «قازفوسفات» جشس-نا قاراستى «شولاقتاۋ» تاۋ-كەن كەشەنىندە وتكەن كەنشىلەر جيىنىنا قاتىستى. مۇندا ەلباسى جولداۋىنان تۋىنداعان مىندەتتەر اڭگىمە وزەگىنە اينالىپ, ءوندىرىستى وركەندەتۋ جايى ءسوز بولدى. كەشەن جۇمىسشىلارى كەزدەسۋ بارىسىندا ەلباسى جولداۋى, اسىرەسە حيميا سالاسىنىڭ قىزمەتكەرلەرىنە سەرپىن بەرەتىنىنە, سوندىقتان وڭىردە ءوندىرىس سالاسى وركەندەي بەرەتىنىنە سەنىم ءبىلدىردى.
حاميت ەسامان,
«ەگەمەن قازاقستان»
جامبىل وبلىسى
