باعامداپ قاراساڭىز, دۇنيەجۇزىنىڭ وركەنيەتتى ەلدەرىنىڭ جاڭارتىلعان ەنەرگيا كوزدەرىن, ياعني, بالامالى قۋات كوزىن يگەرۋگە كوشىپ كەتۋىنىڭ استارىندا ۇلكەن ءمان جاتىر. اسىرەسە جاپونيا, وڭتۇستىك كورەيا, گەرمانيا, اقش ەلدەرىندە بۇل ءۇردىستىڭ ايرىقشا جولعا قويىلعانى دا نازار اۋدارارلىق جاعداي. «جاسىل ەكونوميكاعا» كوشۋ جولىنداعى قادامدار ءبىزدىڭ قازاقستاندا دا بايقالىپ وتىر. وتكەن جىلى عانا الەمنىڭ 119 ەلى مەن 22 حالىقارالىق ۇيىمىنىڭ عىلىمي قاۋىمداستىعىمەن بىرگە, ءتورت ميلليونعا جۋىق ادامدى ورتاق الاڭدا توعىستىرعان ەسكپو–2017 كورمەسى «جاسىل» تەحنولوگيالاردىڭ وتاندىق ەكونوميكاعا ەنۋ پروتسەسىن ودان ارمەن جەتىلدىرە ءتۇستى. مۇنىڭ بارلىعى سايىپ كەلگەندە, تابيعي رەسۋرستارعا دەگەن عالامدىق دەڭگەيدەگى مۇقتاجدىق ءسىز بەن ءبىز ءومىر ءسۇرىپ وتىرعان ءححى عاسىردا ايقىن سەزىلىپ وتىرعانىن كورسەتەدى.
رەسمي دەرەكتەردە دۇنيە ءجۇزى بويىنشا وندىرىلەتىن ەلەكتر ەنەرگياسىنىڭ تورتتەن ءبىرى جاڭارتىلعان قۋات كوزدەرىنە تيەسىلى ەكەندىگى انىق ايتىلىپ ءجۇر. عالىمداردىڭ بولجامى بويىنشا, 2050 جىلعا قاراي بۇل كورسەتكىش 80 پايىزعا دەيىن جەتەدى. قازىر ەلىمىزدە جالپى قۋاتتىلىعى 336 مۆت بولاتىن جاڭارتىلاتىن ەنەرگيا كوزدەرىنىڭ 55 نىسانى جۇمىس ىستەپ تۇر. ەندى ون جىلدان كەيىن ەلىمىزدەگى بالامالى قۋات ۇلەسىن 30 پايىزعا جەتكىزۋ مىندەتىن دە قويىپ وتىرمىز. سايىپ كەلگەندە بۇل شارالار قورشاعان ورتانى قورعاۋعا, ەكولوگيالىق تازالىقتى قامتاماسىز ەتۋگە ىقپال ەتەرى ءسوزسىز. دەمەك, «جاسىل» تەحنولوگيالارعا باعىتتالعان عىلىمي جاڭالىقتاردىڭ وندىرىسكە ەنۋ پروتسەسى كەزەك كۇتتىرمەيتىن نەگىزگى قادامدار قاتارىندا بولۋى ءتيىس.
باقىتجان ەرتاەۆ,
پارلامەنت ءماجىلىسىنىڭ دەپۋتاتى, حالىق قاھارمانى
