ءبىز بۇل كۇنگە تەكتەن-تەك جەتە سالعان جوقپىز. الدىمەن پرەزيدەنتتىڭ باستاماسىمەن «قازاقستان-2050» ستراتەگياسىن قابىلدادىق. بۇل ءبىزدى الەمدە وزىق دامىعان 30 ەلدىڭ قاتارىنا كىرۋدى مەجەلەۋگە باستادى. بۇدان ءارى «100 ناقتى قادام» ۇلت جوسپارىن جۇزەگە اسىرۋ قولعا الىندى. قازىرگە دەيىن ونىڭ 60 قادامى جۇزەگە اسىرىلدى. ەندىگى كەزەكتە ۇزاق مەرزىمگە ارنالعان قادامداردى جوسپارلى تۇردە ورىنداۋ مىندەتى تۇر.
دامۋدىڭ وسىلاي ورىستەۋ جولى وتكەن جىلى قازاقستاننىڭ ءۇشىنشى جاڭعىرۋىنا جول اشىپ بەردى. وسى تۇستا رەسپۋبليكادا يندۋستريالاندىرۋ باعدارلاماسى ءوزىنىڭ ناتيجەلەرىن بەرە باستادى. وتكەن جىلى «تسيفرلى قازاقستان» كەشەندى باعدارلاماسىنىڭ قابىلدانۋى دا دامۋعا ءدۇمپۋ بەرەتىن سەرپىندەردىڭ ءبىرى بولدى. مۇنىڭ قاباتىندا ەلىمىزدىڭ 2025 جىلعا دەيىنگى دامۋىنىڭ كەشەندى ستراتەگيالىق جوسپارى جاسالدى. وسىلاردىڭ ءبارىن جيناقتاي كەلگەندە, بۇل جولعى جولداۋدىڭ بۇعان دەيىنگى بارلىق شاقىرۋلار مەن باعدارلامالاردىڭ كەزەكتى جيىنتىعى سياقتى بولىپ كورىنەدى. جاڭا جولداۋدىڭ بۇل تۇرعىداعى باستى ەرەكشەلىگى ونىڭ ءتورتىنشى ونەركاسىپتىك رەۆوليۋتسيا الەمىنە بەيىمدەلۋ مەن جەتىستىككە جەتۋ جولىن ايقىنداپ بەرگەنىندە بولىپ وتىر.
وتكەن جىلدىڭ ىشىندە ەلىمىز الەمدىك داعدارىستىڭ قولايسىز سالدارىن ەڭسەرىپ, سەنىمدى ءوسۋ جولىنا قايتا ءتۇستى. جىل قورىتىندىسىندا ىشكى جالپى ءونىمنىڭ 4 پايىزعا, ونەركاسىپ ءونىمىنىڭ 7 پايىزعا وسكەنى بەلگىلى بولدى. بۇل ۋاقىتتا كەدەيشىلىك 13 ەسە كەمىپ, جۇمىسسىزدىق دەڭگەيى 4,9 پايىزعا ازايدى. وسى ورايدا ماعان الەۋمەتتىك مىندەتتەمەلەردىڭ تولىق ورىندالاتىنى جونىندەگى مالىمدەمە ۇنادى. بۇعان سەنىم ارتۋعا دا نەگىز بار. ارادا وتكەن ءبىر جىلدا زەينەتاقى مەن جاردەماقى 3 رەت كوبەيگەنى وسىعان ايعاق. ءسوز بولىپ وتىرعان كەزەڭدە بازالىق زەينەتاقى 29 پايىزعا, ىنتىماقتى زەينەتاقى 32 پايىزعا, بالا تۋعا بەرىلەتىن جاردەماقى 37 پايىزعا, سونداي-اق مۇگەدەكتەر مەن اسىراۋشىسىنان ايىرىلعاندار جاردەماقىسى 43 پايىزعا وسكەن. سول سياقتى مەديتسينالىق قىزمەتكەرلەردىڭ ايلىعى 28 پايىزعا, پەداگوگتار ەڭبەكاقىسى 29 پايىزعا, الەۋمەتتىك قورعاۋ سالاسى قىزمەتكەرلەرىنىڭ جالاقىسى 40 پايىزعا كوبەيدى. ال «ب» كورپۋسىنداعى مەملەكەتتىك قىزمەتشىلەر 30 پايىزعا, ستيپەنديالار 25 پايىزعا ءوسىم الدى.
كەز كەلگەن ەلدىڭ ەكونوميكالىق جاعدايى ونىڭ الەۋمەتتىك ماسەلەلەرگە وسىلايشا كوڭىل بولۋىنەن كورىنەدى. مۇنداي كەڭدىككە ساناۋلى مەملەكەتتەر عانا بارا الادى. اسىرەسە, قازىرگىدەي داعدارىس مەڭدەگەن زاماندا الەۋمەتتىك سالاعا جۇمسايتىن شىعىنداردى ۇلعايتۋ وڭايعا تۇسپەك ەمەس. پرەزيدەنت ءبىزدىڭ مۇنداي باتىل قادامعا بارىپ وتىرعانىمىزدى جاريا ەتتى. بۇل رەسپۋبليكالىق بيۋدجەتتىڭ الەۋمەتتىك سالاعا بولىنگەن شىعىنى بيىل 12 پايىزعا ءوسىپ, 4,1 تريلليون تەڭگەدەن اسقانىنان دا ايقىن اڭعارىلادى. بۇعان قوسارىمىز, جىل ىشىندە الەۋمەتتىك تولەمدەردى, سونىڭ ىشىندە زەينەتاقىنى ءوسىرۋ ارقىلى 3 ميلليوننان اسا قازاقستاندىقتىڭ تابىستارى ۇلعايعالى وتىر. بيىلعى جىلدىڭ باسىنان باستاپ ىنتىماقتى زەينەتاقى 8 پايىزعا كوبەيدى. مۇگەدەكتەرگە, اسىراۋشىسىنان ايىرىلعان جانە مۇگەدەك بالالار تاربيەلەپ وتىرعان وتباسىلارعا ارنالعان جاردەماقىلار 16 پايىزدىق ءوسىمدى قۇرادى. بۇدان بولەك, 1 شىلدەدەن بازالىق زەينەتاقى ەڭبەك وتىلىنە بايلانىستى ورتاشا العاندا 1,8 ەسە كوبەيەتىن بولادى. جولداۋدا تاعى بىرقاتار وسىمدەر تۋرالى اتاپ تۇرىپ ايتىلعان.
ماڭىزدى قۇجاتتاعى تاعى ءبىر توقتالىپ وتەتىن جايت, وندا ۇستازدار قاۋىمىنا قۇرمەت كورسەتۋ جالعاسا بەرەتىنى تايعا تاڭبا باسقانداي اتاپ كورسەتىلگەن. مۇعالىمدەر مارتەبەسىن ارتتىرا بەرۋ ءبىلىمنىڭ نەگىزى دۇرىس قالانۋىنا جول اشادى. بۇعان جەتكىلىكتى كوڭىل بولگەن مەملەكەت باسشىسى ءبىلىم بەرۋدىڭ جاڭارتىلعان مازمۇنىنا كوشكەن مۇعالىمدەردىڭ لاۋازىمدىق جالاقىسىن بيىلعى 1 قاڭتاردان 30 پايىزعا كوبەيتۋدى تاپسىرعانى ناقتى دالەل بولا الادى.
مۇرات باقتيار ۇلى,
پارلامەنت سەناتىنىڭ دەپۋتاتى
