بۇل ورايدا, جۇمىسسىز جۇرگەن ازاماتتاردى ارنايى باعدارلامامەن شاعىن كاسىپكەرلىككە تارتۋ, وقىتۋ ماڭىزدى. بۇگىندە وبلىستا 15 كىشى بيزنەس جوبالارى ازىرلەنگەن. ياعني, 44 مىڭ ادامدى شاعىن كاسىپكەرلىككە تارتۋ كەزىندە دايىن ءمودۋلدى كىشى بيزنەس جوبالار بىرگە ۇسىنىلماق. ۇكىمەتتىڭ ونلاين رەجىمدە وتكەن سەلەكتورلىق وتىرىسىندا بايانداما جاساعان وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ مالىمدەۋىنشە, بۇل جۇمىسسىزدىقتى ازايتۋدا ماڭىزدى شارا بولعالى تۇر. ءوڭىر باسشىسىنىڭ ايتۋىنشا, بىلتىر 37,7 مىڭ ادام ناتيجەلى جۇمىسپەن قامتۋ باعدارلاماسىنا تارتىلعان. جوعارىدا ايتىلعان كەشەندى جوسپاردىڭ 50 پايىزى ەڭبەككە جارامدى ازاماتتارعا تۇراقتى كاسىپ بەرۋگە باعىتتالادى. سونىڭ نەگىزىندە 44 مىڭ ادامدى جۇمىسقا تارتۋ جوسپارلانىپ وتىر. ال «ورلەۋ» جوباسى اياسىندا وتكەن جىلى وڭتۇستىكقازاقستاندىق 17 مىڭ وتباسى 36 مىڭ ءىرى قارا مەن ۋاق مال السا, 757 وتباسىعا 36 مىڭ قۇس ۇلەستىرىلگەن. سونداي-اق, 3 مىڭعا جۋىق وتباسىعا كاسىپكەرلىكپەن اينالىسۋى ءۇشىن قاجەتتى قۇرال-جابدىقتار بەرىلگەن.
بيىل نەگىزگى باسىمدىق حالىقتى تۇراقتى جۇمىسپەن قامتۋ ماسەلەسىنە ءبولىنىپ وتىر. وبلىس اكىمىنىڭ ايتۋىنشا, بۇل رەتتە مەملەكەتتىك جانە سالالىق باعدارلامالار شەڭبەرىندە 866 جوبا بويىنشا 46 مىڭ جاڭا جۇمىس ورنىن اشۋ جوسپاردا بار. بىلتىر وڭىرىمىزدە 16 مىڭ 743 ادام كاسىبي جانە قىسقا مەرزىمدىك وقۋعا جولدانسا, وسى ازاماتتاردىڭ 67 پايىزى تۇراقتى جۇمىسقا ورنالاسىپتى. سونداي-اق, وتكەن جىلى وبلىستا ء«ار اۋىلعا ءوز شەبەرى» اتتى اكتسياسى اياسىندا 15 ماماندىق نەگىزىندە 9 مىڭعا جۋىق ازامات قىسقا مەرزىمدىك وقۋ كۋرسىنان ءوتىپ, اۋىلدى جەرلەرگە جۇمىسقا كىرىسكەن. بيىل وسى جوبا نەگىزىندە تاعى دا 7 مىڭ ازاماتتى وقىتۋ كوزدەلۋدە.
عالىمجان ەلشىباي,
«ەگەمەن قازاقستان»
