قازاقستان پرەزيدەنتى نۇرسۇلتان نازارباەۆ پەن اقش پرەزيدەنتى دونالد ترامپ نازارباەۆتىڭ اقش-قا رەسمي ساپارى بارىسىندا اق ۇيدە 16 قاڭتاردا كەزدەسەدى.
«پرەزيدەنت دونالد ترامپتىڭ باسشىلىعى كەزىندەگى ورتالىق ازيا ەلدەرىنىڭ ىشىنەن ءبىرىنشى بولىپ, نازارباەۆتىڭ اق ۇيگە رەسمي ساپارمەن كەلۋى قازاقستاننىڭ ايماقتاعى نەگىزگى ويىنشى ەكەنىن ايقىندايدى», - دەيدى ساياسي ساراپشى, سينگاپۋردىڭ Nanyang تەحنولوگيالىق ۋنيۆەرسيتەتى قىزمەتكەرى دجەيمس دورسي.
ول ورتالىق ازيانىڭ ءۇندى-قىتاي باسەكەلەستىگى, ءۇندىستان مەن اقش-تىڭ تىعىز قارىم-قاتىناسى جاعىنان ماڭىزدى ەكەنىن اتاپ ءوتتى. سونىمەن بىرگە قازاقستاننىڭ جاقىن سەرىكتەسى رەسەي بۇل ساپاردى مۇقيات قاداعالايتىن بولادى, - دەدى دورسي.
ەكى مەملەكەت باسشىلارى ايماقتىق قاۋىپسىزدىك پەن ەكونوميكالىق ىنتىماقتاستىق ماسەلەلەرى بويىنشا ستراتەگيالىق ارىپتەستىكتى نىعايتۋ جولدارىن, سونداي-اق قازاقستاننىڭ بۇۇ قاۋىپسىزدىك كەڭەسىنە توراعالىق ەتۋ كەزىندە كۇن تارتىبىنە قويىلعان بىرقاتار حالىقارالىق پروبلەمالاردى تالقىلايدى.
قر پرەزيدەنتى ءباسپاسوز قىزمەتىنىڭ حابارلاۋىنشا, 16-18 قاڭتاردا نۇرسۇلتان نازارباەۆ اقش-قا ءۇش كۇندىك رەسمي ساپارمەن كەلەدى.
سونىمەن قاتار قازاق پرەزيدەنتى بۇۇ قاۋىپسىزدىك كەڭەسىنىڭ وتىرىسىنا قاتىسادى.
