بىلتىر يالتا قالاسىندا وتكەن «دەتسكايا نوۆايا ۆولنا» اتتى حالىقارالىق ءان بايقاۋىنا قاتىسقانعا دەيىن ءامينا جاپاردى قازاقستاندىق ونەرسۇيەر قاۋىم جاپ-جاقسى ءبىلىپ قالعان بولاتىن. الدىمەن وبلىستىق, ودان كەيىن «ايالاعان استانا-2017» رەسپۋبليكالىق سايىستا توپ جارعان. قازىلار القاسى ون جاستاعى وقۋشىنىڭ ەشكىمگە ۇقسامايتىن كەڭ دياپوزوندى داۋسىنا ەرەكشە ءتانتى بولىپ, ءبىراۋىزدان گران-پريگە لايىق دەپ شەشكەن.
ول جاستايىنان ونەرلى اۋلەت ورتاسىندا تاربيەلەنىپ, ءان قاناتىندا تەربەلىپ ءوستى دەسە دە بولادى. اجەسىنەن ءبىر ەلى اجىرامايتىن. قايدا بارسا دا تومپاڭداپ ەرىپ جۇرەتىن. كەي تەتەلەستەرى سياقتى ويىن قىزىعىنا بەرىلگەننەن گورى وڭاشادا ءان شىرقاعاندى ۇناتاتىن. پوليتسيا قىزمەتكەرى بولىپ قىزمەت اتقاراتىن اكەسى سايران – ءبىرىنشى ماماندىعى بويىنشا مۋزىكانت. دومبىرا قۇلاعىندا شەبەر وينايدى. قىزىنىڭ بويىنداعى قابىلەتتى ەرتە اڭعارىپ, فورتەپيانو سىنىبىنا بەردى. تالانت قىرىنىڭ اشىلۋىنا ۆەرا پوگورەلوۆا, ولگا ەليسەەۆا سەكىلدى پەداگوگتەر كوپ تەر توكتى. ولاردىڭ ەڭبەگى زايا كەتكەن جوق. ءامينا تالاي بايگەلەردە جۇلدىزداي جارقىراپ, ءوزى تۋىپ-وسكەن تۇكپىردەگى اۋىلدىڭ نامىسىن ابىرويمەن قورعاپ ءجۇردى.
قالاي دەسەك تە قىرىم ساپارى ونىڭ ومىرىندە ۇلكەن ءىز قالدىردى. ايتۋلى بەلەسكە اينالدى. ۇلكەن ساحناعا العاش كوتەرىلسە دە, كورەرمەندەرگە لىق تولى زالدان ەش يمەنبەگەن. تەك ء«امينا جاپار. قازاقستان» دەگەندە از-كەم قوبالجىپ, بىراق بويىنداعى قورقىنىشتى لەزدە جيناپ العان. الدىڭعى قاتاردا وتىرعان اجەسىنە كوزى تۇسكەن. ونىڭ بايسالدى, نىق وتىرىسى جەڭىسكە دەگەن سەنىمىن ۇشتاي تۇسكەن. اسەم ءان اۋەنى سىرتقى دۇنيەنى مۇلدەم ۇمىتتىرىپ جىبەرگەن. قازىلار القاسىنىڭ التاۋى – 10, ەكەۋى 9 دەگەن باعانى كوتەرگەندە زال ءىشىن دۋ قول شاپالاق كومىپ كەتكەن. بۇل بولسا ارقاسىنان اۋىر جۇك تۇسكەندەي جەڭىلدەنىپ سالا بەرگەن. ال تينا تەرنەردىڭ شىعارماسىن كەرەمەت ورىنداعانىنا سۇيسىنگەنى سونشالىق, قازىلار القاسىنىڭ مۇشەسى لەرا كۋدرياۆتسەۆا ءبىر بالىن كەمىتىپ قويعانىنا قاتتى وكىنىش بىلدىرگەن.
جۋىردا وبلىستىق ىشكى ىستەر دەپارتامەنتىنىڭ باستىعى, گەنەرال-مايور بەرىك ءبىلالوۆ جاپاروۆتار وتباسىن ارنايى قابىلداپ, اميناعا نوۋتبۋك سىيلادى. اكە-شەشەسىنە العىس حات تابىس ەتتى.
جۇلدىزداي جارقىراپ, ءان الەمىنە قانات قاققان ونى قازىر رەسەيلىك تانىمال پروديۋسەر لينا اريفۋلينا اتتاي قالاپ الىپ, ونەر اتتى ۇلى قۇدىرەتتىڭ قىر-سىرىنا باۋلىپ ءجۇر.
ءمادينا بالعاشوقوۆا
سولتۇستىك قازاقستان وبلىسى
