ءسوز باسىندا پرەزيدەنت: «بۇل كىتاپ مەنىڭ ۇلى قولداۋشىم, كەمەل كەلەشەگىنە ءوزىنىڭ قازاقستاندىق جولىمەن قارىشتاعان جاسامپاز حالقىما ارنالادى!» دەپ, كىتاپتىڭ مازمۇنىن ايقىنداپ بەرگەن. جاڭا تۋىندىدا ەگەمەن مەملەكەتتىڭ نەگىزى قالانعان كۇننەن باستاپ ونىڭ قالىپتاسۋ كەزەڭدەرىنىڭ ەرەكشەلىكتەرى مەن 26 جىلدىق تاۋەلسىزدىك داۋىرىندەگى ىشكى جانە سىرتقى سىن-قاتەرلەردى ەڭسەرۋگە بايلانىستى قابىلدانعان شەشىمدەردىڭ ءمان-مازمۇنى مەن تەتىكتەرى ەگجەي-تەگجەيلى باياندالادى. سونىمەن قاتار كىتاپتا «قازاقستاندىق دامۋ ۇلگىسىنىڭ» تابيعاتى مەن ونىڭ ەۆوليۋتسياسى, باستى ۇستانىمدارى مەن قوزعاۋشى كۇشتەرى سارالانعان. قازاقستاندى جاڭعىرتۋدىڭ ءۇش تولقىنى كەڭىنەن اشىپ كورسەتىلگەن. ءبىرىنشى جانە ەكىنشى جاڭعىرتۋ اياسىندا توتاليتارلىق جۇيەدەن تۇبەگەيلى اجىراپ, نارىقتىق ەكونوميكانى قۇرۋ جانە باسەكەگە بارىنشا قابىلەتتى ەلۋ ەلدىڭ قاتارىنا قوسىلۋ مىندەتى مەرزىمىنەن بۇرىن ورىندالدى.ءۇشىنشى جاڭعىرتۋدىڭ ماقساتى – ەلىمىزدى قالىپتاسقان جاڭا جاھاندىق احۋال جاعدايىندا جاڭعىرتا وتىرىپ, الەمدەگى ەڭ وركەندى 30 مەملەكەتتىڭ قاتارىنا قوسۋ.
كىتاپ ەلىمىزدىڭ جاڭا تاريحىن تۇتاس قامتىعان, مازمۇنى اسا باي 4 بولىمنەن تۇرادى. كىتاپتاعى ءار ءبولىمنىڭ ءوزى بىرنەشە بولىمدەرگە بولىنگەن. ولاردىڭ دا اتاۋلارىنا اسا ءمان بەرىلىپ, جاڭا تاريحىمىز بەن قازاقستاندىق قۇندىلىقتاردىڭ داۋىرلىك وقيعالارى ناقتى ءارى ءدال سۋرەتتەلگەن. كىتاپتىڭ تاراۋلارى: «تاريحي ادىلەتتىلىك سالتاناتى», «تۇعىرى بەرىك مەملەكەتتىك قۇرىلىم», «باستى قۇندىلىعىمىز – بەيبىتشىلىكتى قاستەرلەي بىلدىك», «جاڭالىقتىڭ جىلى لەبى جانە قايتا تۇلەگەن ءداستۇر», «قياعا كوز تىككەن قازاقستان بارىسى», «باياندى بولسىن باس قالا!», «تاۋەلسىزدىك رۋحىمىزدى شىڭدادى», «بۇرىن-سوڭدى بولماعان زياتكەرلىك ورلەۋ», «الەم مويىنداعان كوشباسشىلىق», «كوز الدىمىزداعى ۇلى وزگەرىستەر», «جاڭا ەكونوميكاعا باتىل ۇمتىلىس», «ادام كاپيتالىنىڭ جاڭا ساپاسى», «قازاقستاننىڭ ايقىن جانە مىزعىماس باسىمدىقتارى» جانە تاعى باسقا بولىمدەردە ەلىمىزدىڭ جارقىن ساتتەرى بۇگە-شىگەسىنە دەيىن باياندالادى. سونداي-اق كىتاپتا ەلىمىزدىڭ تاۋەلسىزدىك جىلدارىندا قول جەتكىزگەن باستى 33 جەتىستىگى مەن وعان جەتۋ جولدارى جان-جاقتى ايتىلعان. بۇل جەتىستىكتەردىڭ بارلىعى تاۋەلسىزدىكتىڭ جەمىسى جانە ەلباسىمىزدىڭ ەلى ءۇشىن اتقارعان ەرەن ەڭبەگىنىڭ ناتيجەسى.
«تاۋەلسىزدىك ءداۋىرى» وتاندىق جانە شەتەلدىك قالىڭ وقىرمان قاۋىمدى قىزىقتىرار تىڭ تۋىندى. ەلباسىنىڭ جۇرەك تورىندەگى تولعانىستارىنان شىققان بۇل كىتاپتى ءبارىمىزدىڭ قاسيەتتى وتانىمىز – قازاقستان رەسپۋبليكاسىنىڭ نەگىزىن قالاعان تۇڭعىش پرەزيدەنتىمىزدىڭ ءوز قولىمەن جازىلعان تاۋەلسىزدىك ەنتسيكلوپەدياسى دەپ اتاۋعا تولىق نەگىز بار
ءبىزدىڭ الدىمىزدا زور مىندەتتەر تۇر. ونىڭ ەڭ باستىسى – ەلباسى ايقىنداپ بەرگەن قازاقستاندى الەمنىڭ دامىعان 30 ەلى قاتارىنا قوسۋ بولىپ تابىلادى. وسى اسۋدى ءبىز پرەزيدەنتىمىزبەن بىرگە الاتىنىمىزعا سەنىمدىمىز. ەلباسىمىز: «بىزدە رۋح بايلىعى بار. ول بارىنەن بۇرىن – وتانشىلدىق سەزىم, قازاقستاندىق پاتريوتيزم. ونىڭ باستى ولشەمى – تاتۋلىق, تىنىشتىق, تۇراقتىلىق», دەگەن بولاتىن. ورتاق وتانىمىز, باعانالى وردامىز – قازاقستاننىڭ بوساعاسىن بەرىك, شاڭىراعىن بيىك ۇستاپ, ءتۇتىنىن ءتۇزۋ ۇشىرۋ – ەلدىك ماقسات.
ەندەشە «باق بەرەردە ەلگە ىرىس قونادى, ۇستانعان جولى دۇرىس بولادى», دەگەن ەلباسى نۇرسۇلتان ءابىش ۇلىنىڭ العا قويعان ماقسات-مىندەتتەرىن ورىنداۋدا جالپاق جۇرتتى جۇمىلدىرۋى مەملەكەتشىل قىزمەتكەردىڭ مىندەتى عانا ەمەس, قاسيەتتى پارىزى بولۋى كەرەك. ءبىز وسى تۋرا جولدامىز!
عالياسقار سارىباەۆ,
«نۇر وتان» پارتياسى الماتى وبلىستىق فيليالى توراعاسىنىڭ ءبىرىنشى ورىنباسارى
