ۇمىت قالدى دەۋىمىز ارتىق بولار, دەگەنمەن كوپ ماقتاۋلىلاردىڭ اراسىندا ەرەكشەلەنبەي قالعانى بايقالادى. سەبەبى, كوپ جانكۇيەر بىلە بەرمەس – جاسىل الاڭنىڭ سىرتىندا دا قانشاما قىرۋار شارۋا اتقارىلىپ جاتىر. «2017 جىلدىڭ ەڭ ۇزدىك فۋتبول مەنەدجەرى» دەگەن ماراپاتقا يە بولعان سايان جاقسىگەلدى ۇلى تۋرالى ازدى-كەم ايتا وتسەك ارتىق بولماس.
الەمدىك فۋتبول مەنەدجەرلەر مەن باپكەرلەردىڭ قولىندا ەكەنىن ەكىنىڭ ءبىرى بىلەدى. جارعاق قۇلاعىمىز جاستىققا تيمەي ءتۇن جارىمىندا شىرت ۇيقىنى بۇزىپ كورەتىن الەمدىك فۋتبولدا جوزە موۋرينو, انتونيو كونتە, كارلو انچەلوتتي سەكىلدى باپكەرلەر بار ەكەنىن جانە ولاردىڭ الاڭداعى 11 فۋتبولشىنى عانا ەمەس كۇللى كوماندانى باسقارىپ وتىراتىنى ايدان انىق. كەيدە ءبىر قولىنا راديو باسقارعىش الىپ الىپ الەمدىك جۇلدىزداردى ويناتىپ وتىرعان ادامدار ما دەپ قالارسىڭ. ەۋروپادا مۇنداي مامانداردى – مەنەدجەر دەيدى. سەبەبى, ولار جاي عانا جاتتىقتىرۋشى دەڭگەيىنەن ءوسىپ كەتكەندەر. لۋكاكۋدىڭ قايدا اۋىساتىنىن, نەيماردىڭ قاي تۇستا وينايتىنىن نەمەسە مەسسيدىڭ قاي جەردە ايىپ دوبىن ورىندايتىنىن سولار شەشەدى. ولار جاسىل الاڭنان تىس ماسەلەلەردى دە شەشەدى. گول سوققانعا ارنايى قالاماقى تاعايىنداپ, جاقسى ويناپ كوزگە تۇسكەندى كوتەرمەلەپ, كەۋدەسىندە نالاسى بار جانكۇيەرلەردىڭ دە كوڭىلىن تاۋىپ – كوماندا ءۇشىن ءبارىن جاسايدى. ءتىپتى, سەر الەكس جايلى الگى اڭىز بار عوي. «مانچەستەر يۋنايتەد» كلۋبىندا جۇمىس ىستەگىسى كەلەتىن ەدەن جۋشىنىڭ ءوزى الەكستىڭ الدىنان وتپەي جۇمىسقا قابىلدانبايتىن دەلىنەتىن. «استانا» كومانداسىنىڭ جەتىستىكتەرىنە ارقاۋ ەكى مەنەدجەر بار دەلىك. ءبىرى جاسىل الاڭداعى فۋتبولعا جاۋاپتى – ستانيمير ستويلوۆ بولسا, ەكىنشىسى تۋرا سوعان جەتەقابىل ەڭبەگى بار الاڭ سىرتىندا جۇرەتىن – سايان حاميتجانوۆ.
«استانا» فۋتبول كلۋبىنىڭ پرەزيدەنتى بولعالى بەرى سايان حاميتجانوۆ ەل فۋتبولىنا ەۋروپالىق مەنەدجمەنتتى الىپ كەلگەندەي. الدىمەن ونىڭ ەلورداعا الىپ كەلگەن فۋتبولشىلارى مەن باپكەرلەرىن سارالايىق. باپكەر ماسەلەسىن شەشىپ, بولگاريادا جۇرگەن ستويلوۆتى شاقىرتتى. ەشكىمگە ەسىمى تانىس ەمەس «بوتەۆتىڭ» باپكەرىن ءدۇيىم جۇرتقا ايدىك ەتكەن وسى كىسى. ايتپەسە, تۋا ءبىتتى تالانتتى باپكەر بولسا ستويلوۆ بىردەن توپ بىرىنشىلىكتەردە قىزمەت ەتەر ەدى. ءستانيميردىڭ ءوزى دە سۇقبات بەرگەن كەزىندە حاميتجانوۆ سەكىلدى مەنەدجەرمەن تاندەم قۇرعانىن ماقتانا ايتىپ جۇرەدى. سەبەبى, باپكەر مەن باسقارۋشىنىڭ باستارى ءبىر قازاندا قايناماسا العا قويعان شارۋاڭنىڭ بەرەكەسى قاشادى. تالانتتى اياقدوپشى بولعانىمەن, باپكەردىڭ وي داپتەرىنە ەنبەسە وندايلاردى كومانداعا قۇر ماسىل قىلۋدىڭ قاجەتى نە؟!
«استانا» باپكەرى ۇناتقان, كومانداعا العىسى كەلگەن كوپ ويىنشىعا كلۋبتىڭ قارجىسى جەتپەگەن كەزدەر از ەمەس. ال قارجى جەتەتىن ويىنشىلاردى باسشى قالاعانىمەن, باپكەر ۇناتپاي جاتادى. وسى تۇستا بىركەلكى تاڭداۋ جاساۋ بارىسىندا ستانيمير مەن سايان جۇبى نەمانيا ماكسيموۆيچ, يۆان ماەۆسكي, پاتريك تۆۋماسي, دجۋنيور كابانانگا سەكىلدى سايىپقىرانداردى الدى. قازاقستان پرەمەر-ليگاسىنان يسپان لا-ليگاسىنا فۋتبولشى اۋىستى دەگەندى ەستۋىڭىز بار ما ەدى؟ ەلوردالىق ۇجىمنىڭ ساپىندا كوزگە تۇسكەن سەرب جارتىلاي قورعاۋشىسى قازىر «ۆالەنسيا» ساپىندا گول سوعىپ ءجۇر. ودان بولەك تۆۋماسيگە كوز تىگىپ, كابانانگانى ساتىپ العىسى كەلەتىندەردىڭ قاتارى كوپ. قازاقستاننىڭ كوپ كلۋبتارى سەكىلدى ەكىنشى سورتتى سىرتتانداردى جيناپ الماي, ساپاعا ءمان بەرەتىن كلۋب وسى كۇنى جەرگىلىكتى قازاقستاندىق فۋتبولشىلاردىڭ دا وسۋىنە جول اشتى. وسى كۇنى يسپانيا ليگاسىنداعى «مالاگا» كومانداسى لوگۆينەنكوعا, رەسەيدىڭ بىرقاتار ۇجىمدارى سەرىكجان مۇجىقوۆ پەن دميتري شومكوعا قۇدا ءتۇسىپ وتىر. بۇل «استاناعا», جالپى قازاقستانعا جارناما ەكەنى داۋسىز. بۇرىندارى قازاقستان بىرىنشىلىگىنە اياق باسپايتىن كوپتەگەن ساپالى لەگيونەرلەر بۇل وقيعادان سوڭ, اعىلا تۇسەر دەپ وتىرمىز. مىسال ىزدەپ الىسقا بارمايمىز, 10 جىل بۇرىن رەسەي فۋتبولى وسىنداي جاعدايدان وتكەن.
ەۋروپا الاڭدارىندا ابرويمەن ونەر كورسەتىپ, ەل اتاعىن شىعارىپ جۇرگەن كوماندا سونىمەن قاتار ازدى-كەم قارجى دا تاۋىپ ءجۇر. ءبىر ماۋسىمدا 17 ميلليون ەۋرو تابىس ءتۇسىرىپ, ازۋلىلارمەن تەرەزەسى تەڭ شايقاستى. مۇنىڭ ءوزى ەل فۋتبولىنىڭ دامۋىنا قوسقان زور ۇلەس.
جىل سايىن جانكۇيەرى ارتىپ كەلە جاتقان «استانانىڭ» جەتىستىكتەرىنىڭ قويناۋىندا تۇرعان ادامدار كوپ. كلۋبقا قىزمەت ەتەتىن اۆتوبۋس جۇرگىزۋشىسىنەن باستاپ, فۋتبول تەورياسىن تالقىلايتىن باپكەرلەرگە دەيىن سايان حاميتجانوۆ سەكىلدى مەنەدجەر قۇرعان ساعاتتىڭ سىرتىلىنداي ۇزدىكسىز ءجۇرىپ تۇراتىن مەحانيزمىنىڭ ءبىر بولشەگى. سوندىقتان دا, ەل فۋتبولىندا ۇزدىك مەنەدجەر اتاناتىن دا ءجونى بار.
ەرمۇحامەد ماۋلەن,
«ەگەمەن قازاقستان»
