جولداۋدا ايقىندالعان ماقسات-مىندەتتەر سارالانعان باسقوسۋعا الماتى قالاسى اكىمدىگى, جوعارعى وقۋ ورىندارىنىڭ باسشىلارى مەن عىلىمي-زەرتتەۋ ينستيتۋتتارىنىڭ ماماندارى, سونداي-اق اتالعان ۋنيۆەرسيتەتتىڭ پروفەسسورلىق-وقىتۋشىلار قۇرامى قاتىستى.
جولداۋدا اگرووندىرىس كەشەنىنە جالپى اگرارلىق سەكتورعا ۇلكەن باسىمدىق بەرىلگەنىن ەسكەرسەك, بۇل باعىتتى دامىتۋ ەل ەكونوميكاسىنىڭ نەگىزگى قۋاتى ەكەنىن انىق تۇسىنەمىز. عالىمدار اۋىلشارۋاشىلىق ونىمدەرىن ۇلعايتۋ مەن ولاردىڭ ساپاسىن ارتتىرۋ نەگىزگى تالاپ ەكەنىن ايتا كەلە, ونى ىسكە اسىرۋ ءۇشىن اۋىلشارۋاشىلىعىن دامىتۋداعى جەكەلەگەن جۇمىستارعا سەرپىن بەرۋ كەرەك دەگەنگە توقتالدى. ول ءۇشىن باسەكەگە قابىلەتتى ماماندار دايىنداۋ قاشاندا ءبىرىنشى كەزەكتە تۇراتىنى, ەكسپورتقا قابىلەتتى اۋىل شارۋاشىلىعى ءونىمىنىڭ كولەمىن ەسەلەپ ۇلعايتۋ كەرەكتىگى باسا ايتىلدى. ء«بىزدىڭ اگرارلىق سەكتوردا جالپى شيكىزاتتىڭ كولەمى ءجۇز پايىز دەپ الاتىن بولساق, ەكسپورتقا شىعاتىن ءونىمنىڭ كولەمى 17-20 پايىزدى عانا قۇراپ وتىر. قايتا وڭدەيتىن جاڭا ونىمدەر قۋاتتىلىعى 25-30 پايىز عانا. جولداۋدا ناقتى ايتىلعان اقىلدى تەحنولوگيا, رەسۋرستى ۇنەمدەيتىن قۇرالدار, ساندىق تەحنولوگيالار بۇل سالانى دامىتۋعا كوپ سەپتىگىن تيگىزبەك» دەيدى قازاق ۇلتتىق اگرارلىق ۋنيۆەرسيتەتىنىڭ رەكتورى تىلەكتەس ەسپولوۆ.
جيىن بارىسىندا عالىمدار 2015 جىلى ۋنيۆەرسيتەتتە قۇرىلعان حالىقارالىق اگروتەحنولوگيالىق حاب شەتەلدىك ۋنيۆەرسيتەتتەرمەن عىلىمي بايلانىس ورناتۋعا زور مۇمكىندىك اشقانىن جانە ەلباسى ايقىنداپ بەرگەن مىندەتتەردى ىسكە اسىرۋدا ۋنيۆەرسيتەت ۇجىمى تاباندى تۇردە جۇمىس ىستەيتىنىن ايتتى. ول ءۇشىن اگروونەركاسىپ كەشەنىنىڭ بارلىق سالالارىنا يننوۆاتسيالىق تەحنولوگيالاردى ەنگىزۋ, ولاردى وندىرىستە كەڭىنەن پايدالانۋ ماسەلەلەرىنىڭ ماڭىزدى ەكەنى ءسوز بولدى.
ارمان وكتيابر,
«ەگەمەن قازاقستان»
الماتى
