- ءدال قازىر تۆۋماسي «استانا» فۋتبول كلۋبىنىڭ ويىنشىسى. ونىڭ ەلوردالىق كلۋبپەن كەلىسىمشارتى بار. ءبىز جەلىدە جازىلىپ جاتقان اقپاراتتاردى بارىنشا قاراپ وتىرامىز, الايدا, ولاردىڭ بارلىعى شىندىققا جاناسادى دەۋگە كەلمەيدى. ءبىزدىڭ تاراپقا ناقتى ەكى كلۋبتان رەسمي ۇسىنىس ءتۇستى. دەگەنمەن, ولار ءبىزدى قاناعاتتاندىراتىن قارجىنى تولەگىلەرى كەلمەدى. ال ءتۆۋماسيدى ءوز باعاسىنان تومەن باعاعا باسقا كلۋبقا جىبەرۋدىڭ ەشقانداي ماعىناسى جوق دەپ ويلايمىن. سوندىقتان, ءبىز پاتريكتى جانە ۇسىنىس تۇسكەن باسقا ويىنشىلاردى كوماندا قۇرامىندا قالدىرىپ, ۋەفا ەۋروپا ليگاسىنىڭ 1/16 كەزەڭىندە لايىقتى ونەر كورسەتىپ, الداعى جىلى تاعى دا ەۋروكۋبوكتەردىڭ توپتىق كەزەڭىنە شىققىمىز كەلەدى. بۇل ءبىرىنشى كەزەكتە كلۋبىمىزعا كوبىرەك قارجى اكەلەدى, ەكىنشىدەن قازاقستاننىڭ بارلىق وڭىرلەرىندەگى ءبىزدىڭ جانكۇيەرلەرىمىزگە ەرەكشە قۋانىش سىيلايتىن بولادى.
- ەگەر دە كلۋبتى قاناعاتتاندىراتىن لايىقتى ۇسىنىس تۇسسە, ول ويىنشىنىڭ ورنىن جوقتاتپايتىن فۋتبولشى تاۋىپ ۇلگەرەسىزدەر مە؟
- تاريح دالەلدەگەندەي, الماستىرىلمايتىن ويىنشى جوق. دەگەنمەن, پاتريك ءبىزدىڭ كلۋبتىڭ نەگىزگى ويىنشىلارىنىڭ ءبىرى ەكەندىگىن مويىنداۋىمىز كەرەك. سونىمەن بىرگە, بيۋدجەتتىڭ كىرىس بولىگى مەن كلۋبتىڭ الدىندا تۇرعان سپورتتىق ماقساتتار اراسىنداعى تەڭگەرىمدى ساقتاۋ قاجەت. ياعني, ويىنشىلاردى ساتىپ اقشا تابۋ, كلۋبىتىڭ سپورتتىق ماقساتتارعا جەتۋ جولىنا كەدەرگى بولماۋى ءتيىس. ەگەر ءبىز ءدال قازىر ءبىزدىڭ نەگىزگى ويىنشىلارىمىزدى ساتىپ جىبەرەتىن بولساق, سوڭعى ايدىڭ وزىندە 40 ميلليون ەۋرودان جوعارى باعاعا 4 ويىنشى ساتىپ الىپ, قاتارىن تولىقتىرعان «سپورتينگكە» قارسى تۇرا الامىز دەي المايمىن. ءبىز تەك ءبىزدىڭ كلۋبتىڭ عانا ەمەس, بۇكىل قازاقستان فۋتبولىنىڭ نامىسىن قورعايمىز. ءبىز بۇل تاريحي ويىن الدىندا ەشقانداي كادرلىق كەمشىلىكتەر بولعانىن قالامايمىز. سوندىقتان, ءبىز ويىنشىلاردى بىزگە قاجەت باعاعا, رەتى كەلگەن كەزدە عانا ساتامىز.
- جىل باسىندا ەلىمىزگە تانىمال سپورت سايتتارىنىڭ ءبىرى جانكۇيەرلەر اراسىندا ساۋالناما جۇرگىزىپ, ءسىزدى «جىلدىڭ ۇزدىك سپورت مەنەدجەرى» رەتىندە تاڭداعان بولاتىن. ءسىز بۇل مالىمدەمەگە كەلىسەسىز بە؟
- ءوزىمنىڭ جاساپ جاتقان جۇمىسىما ءوز تاراپىمنان باعا بەرۋ, مەنىڭ ويىمشا دۇرىس ەمەس. كوماندا وتكەن ماۋسىمدا قازاقستان چەمپيوناتىندا توپ جارىپ, ەۋروكۋبوكتەرگە قويعان جوسپارىن اسىرا ورىنداپ, ەل فۋتبولى تاريحىندا تۇڭعىش رەت ەۋروپا ليگاسىنىڭ 1/16 كەزەڭىنە جولداما العانىن ەسكەرەتىن بولساق, كلۋبىمىز دۇرىس باعىتتا كەلە جاتىر دەۋگە تولىق نەگىز بار.
