وندا ءتورتىنشى ونەركاسىپتىك رەۆوليۋتسيا داۋىرىندە قازىرگى زامانعى ترەندتەرمەن شارتتالعان تىنىس-تىرشىلىكتىڭ بارلىق سالالارىن دامىتۋدىڭ وزەكتى ماسەلەلەرى قامتىلعان.
جولداۋدىڭ كوپتەگەن يدەيالارى وتكەن جىلى وتكىزىلگەن كونستيتۋتسيالىق رەفورمانىڭ ەرەجەلەرىمەن ساباقتاسادى جانە ولاردىڭ ودان ءارى ىسكە اسىرىلۋى ءبىر-ءبىرىن ءوزارا تولىقتىرىپ وتىراتىن بولادى.
پرەزيدەنت مەملەكەتتىك جانە وزگە دە قۇرىلىمداردى شوعىرلاندىرۋى ءتيىس ون شەشۋشى مىندەتتى بەلگىلەدى. بۇل: اگروونەركاسىپ كەشەنىن, قۇرىلىس پەن كوممۋنالدىق سەكتوردى كەڭىنەن يندۋستريالاندىرۋ جانە جاڭعىرتۋ, كولىك-لوگيستيكالىق ينفراقۇرىلىمنىڭ, قارجى سەكتورىن «قايتا جۇكتەۋدىڭ» تيىمدىلىگىن ارتتىرۋ, ادام كاپيتالىن دامىتۋ, مەملەكەتتىك باسقارۋدىڭ تيىمدىلىگىن قامتاماسىز ەتۋ, اۋقىمدى تسيفرلاندىرۋ جۇمىستارى جانە ت.ب.
قۇقىق اياسىندا ازاماتتاردىڭ كونستيتۋتسيالىق قۇقىقتارى كەپىلدىكتەرىن ودان ءارى نىعايتۋ, جەر-جەرلەردە زاڭنىڭ ۇستەمدىگى قاعيداتتارىن بەكىتۋ بويىنشا جۇمىستاردى ودان ءارى جالعاستىرۋعا دەگەن مەملەكەت باسشىسىنىڭ تاپسىرماسىن ەرەكشە اتاپ وتكىم كەلەدى. سىبايلاس جەمقورلىققا قارسى كۇرەس اياسىندا پرەۆەنتيۆتى شارالار قابىلداۋ قاجەتتىگىنە نازار اۋدارىلدى, ول وتە ماڭىزدى. قۇقىق قورعاۋ قىزمەتى, ادەتتەگىدەي ىزگىلەندىرۋ, قوعامدىق ءتارتىپ پەن قاۋىپسىزدىكتى قامتاماسىز ەتۋدىڭ زياتكەرلىك جۇيەسىن ەنگىزۋ, اتاپ ايتقاندا, كوشەلەردە جانە ادامدار كوپ جينالاتىن ورىنداردا بەينەباقىلاۋ مەن تانۋ, جول قوزعالىسىن باقىلاۋ باعىتىندا دامي بەرەتىن بولادى.
مەملەكەت باسشىسىنىڭ جولداۋى بيىلعى 10 قاڭتاردا كونستيتۋتسيالىق كەڭەستىڭ ارنايى وتىرىسىندا تالقىلاندى. ءبىز ەلدەگى كونستيتۋتسيالىق زاڭدىلىقتىڭ جاي-كۇيى تۋرالى كونستيتۋتسيالىق كەڭەستىڭ جىل سايىنعى جولداۋىنىڭ جوباسىن دايىنداۋ جونىندەگى جۇمىستى باستادىق, ول ەكىنشى توقساننىڭ سوڭىندا پارلامەنت پالاتالارىنىڭ بىرلەسكەن وتىرىسىندا جاريالاناتىن بولادى. ءبىز وندا ەلباسى تاپسىرماسىن ىسكە اسىرۋ بويىنشا, اسىرەسە ادامنىڭ جانە ازاماتتىڭ كونستيتۋتسيالىق قۇقىقتارى مەن بوستاندىقتارىن قورعاۋ ماسەلەلەرى بويىنشا ناقتى ۇسىنىستار بەرەمىز.
بارشاڭىزدى قازاقستان پرەزيدەنتىنىڭ جولداۋىن ناسيحاتتاۋعا جانە ىسكە اسىرۋعا بەلسەندى تۇردە اتسالىسۋعا شاقىرامىز. كونستيتۋتسيالىق كەڭەس ءوز وكىلەتتىگى شەگىندە ونى ورىنداۋ ءۇشىن بار كۇشىن سالاتىن بولادى.
قايرات ءمامي,
كونستيتۋتسيالىق كەڭەس توراعاسى
