اكادەميا قوناقتارى پارلامەنتتەگى الەۋمەتتىك-مادەني دامۋ كوميتەتىنىڭ جۇمىسىمەن تانىستىرۋدى جانە ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىنا بايلانىستى تۇسىندىرمە جۇمىستارىن جۇرگىزۋدى ماقسات تۇتقان كەزدەسۋ بارىسىندا سونداي-اق, جولداۋداعى كولىك-لوگيستيكا ينفراقۇرىلىمىنىڭ تيىمدىلىگىن ارتتىرۋعا, جاڭعىرۋ نەگىزى – ادامي كاپيتالعا جانە جەمقورلىقپەن كۇرەسكە قاتىستى بولىمدەرى ساراپتالدى.
«21 جىلدان بەرى جىل سايىن حالىققا جول تارتىپ كەلە جاتقان جولداۋلاردىڭ ەلىمىز دامۋىنداعى ۇلەسى ايرىقشا ەكەنىن بىلەسىزدەر. قىسقا جانە ۇزاق مەرزىمدى ستراتەگيالىق جوسپارلار مەن ماسەلەلەردى شەشۋدە, جۇزەگە اسىرۋدا ەلباسىمىزدىڭ جولداۋداعى ءار ءسوزى ايرىقشا ماڭىزعا يە بولىپ, قوعامنىڭ دامۋ تەتىگىنە اينالىپ جاتقانى اقيقات. 1997 جىلدان بەرگى جىل سايىنعى جولداۋىندا ەلباسىمىز ۇكىمەت پەن قاراپايىم حالىق الدىنا ناقتى ماقساتتار قويىپ, سودان تۋىندايتىن مىندەتتەردى جۇزەگە اسىرۋ جولدارىن كورسەتىپ كەلەدى. ەلباسىنىڭ ءار جولداۋى – بولاشاققا باعدار. بولاشاقتى باعدارلاپ, ەكونوميكالىق جانە مادەني دامۋدىڭ باستى باعىتتارىن ناقتىلاۋ ءۇشىن ەلباسى جولداۋلارىنىڭ ماڭىزى زور», – دەدى قر پارلامەنتى ءماجىلىسىنىڭ دەپۋتاتى بەيبىت بايماعامبەت ۇلى ءوز سوزىندە.
قازاق كولىك جانە كوممۋنيكاتسيالار اكادەمياسىنىڭ رەكتورى ب. قۋانىشەۆ, اكادەميا كافەدرالارىنىڭ مەڭگەرۋشىلەرى م. قۇلگەلدينوۆ, ا. مولعاجداروۆ, د. ەسكەندىروۆا وقۋ ورداسىنا ارنايى ات باسىن تىرەگەن حالىق قالاۋلىلارىنا جوعارى ءبىلىم بەرۋ سالاسىنا قاتىستى بىرقاتار ماڭىزدى ساۋالدارىن قويا وتىرىپ, اتالمىش اكادەمياداعى كولىكتىك-لوگيستيكالىق كەشەندى دامىتۋ, جۇك قوزعالىسىن دۇرىستاپ ۇيىمداستىرۋ, كەدەرگىسىز جۇك جانە جولاۋشى تاسىمالى, تاعى دا باسقا سالانى تەرەڭدەپ وقىتاتىن «قوزعالىستى جانە تاسىمالدى ۇيىمداستىرۋ لوگيستيكا» ماماندىعىن جاڭا ادىستەرمەن وقىتۋ, زەرتحانالاردى جانە وقۋ-تاجيىربەلىك دارىستەردىڭ سانىن كوبەيتۋ ماسەلەسى جايلى تىڭ وي-پىكىرلەرىن ورتاعا سالدى.
«باستى كاپيتال – ادام رەسۋرستارى» دەگەن قاعيداتتان شىعا وتىرىپ, بولاشاق تەمىر جول جانە اۆتوكولىك ماماندارىن دايىنداۋ بارىسىندا اكادەميادا تاربيە جانە وقۋ-عىلىمي جۇمىستارىنا دا كەڭىنەن كوڭىل بولىنۋدە. «رۋحاني جاڭعىرۋ» باعدارلاماسىن جۇزەگە اسىرۋ بارىسىندا جاسالىنىپ جاتقان ءىس-شارالار وسىنىڭ ايعاعى. تۇراقسىز الەمدىك ەكونوميكا مەن قارجى قيىنشىلىعى كەزىندە جولداۋدا ايتىلعان ىرگەلى ماسەلەلەردى شەشۋ, تەك ۇكىمەت الدىنداعى عانا ەمەس, جاستارعا ءبىلىم بەرىپ, تاربيەلەپ وتىرعان جوعارعى وقۋ ورىندارىنىڭ دا باستى مىندەت بولىپ تابىلادى», – دەپ اتاپ ءوتتى وقۋ ورنىنىڭ باسشىسى باقىتجان مۇحانبەت ۇلى.
كەزدەسۋدى قورىتىندىلاي كەلە, قوناقتار اكادەميا قابىرعاسىندا پارلامەنتتەگى الەۋمەتتىك-مادەني دامۋ كوميتەتىنىڭ كەڭەيتىلگەن وتىرىسىن وتكىزىپ, وقۋ ورنىمەن ىنتىماقتاستىقتى ودان ارى دامىتۋعا شەشىم قابىلدادى.
ميرا بايبەك,
«ەگەمەن قازاقستان»
الماتى
