تەڭىز سۋىنىڭ قىزارۋىن ونشاقتى كۇن بۇرىن بايقاعان تۇرعىندار 6 قاڭتار كۇنى ونىڭ ناقتى قىزىل تۇسكە اينالعانىنا الاڭدادى. ۋاقىت وتە كەلە اقتاۋ قالاسىنىڭ «شاعالا» قوناق ءۇيى مەن «نۇر پلازا» جاعاجايىنا دەيىنگى ايماقتا سۋدىڭ قىزارۋى كۇشەيە تۇسكەن. تەڭىز جاعاسىندا سەرۋەندەگەندەر بۇل جاعدايدى ەكولوگيالىق احۋالمەن بايلانىستىرىپ, جاعادا قىدىرۋدىڭ, تەڭىز اۋاسىمەن دەمالۋدىڭ زياندىلىعى تۋرالى ويلانا باستادى, ءتىپتى تەڭىز جاعاسىنا كەلۋشىلەر قاتارى سيرەي باستادى.
الايدا, ماماندار تەڭىز سۋىنىڭ قىزارۋىنىڭ ەكولوگيالىق جاعدايمەن بايلانىسى جوق ەكەندىگىن ايتۋدا.
قىستىڭ جىلى بولۋى سالدارىنان سۋ استى وسىمدىكتەرى جاپپاي كوبەيىپ, ءوسىپ-ءونىپ, تەڭىزدەگى جەل, داۋىل كەزىندە جاعاعا قاتتى ۇرىلۋىنان قىزارعان, سونداي-اق ول ماڭدا ء وندىرىس ورىندارى جوق, ونىڭ ۇستىنە قۇستار ەمىن-ەركىن ءجۇزىپ ءجۇر, ولار سول بالدىرلارمەن قورەكتەنەدى, دەپ تۇسىندىرەدى. ماماندار جاعدايدى ودان ءارى زەرتتەي ءتۇسۋ ءۇشىن سۋى قىزارعان ايماقتان سۋ, اۋا جانە جەر سىنامالارىن الدى.
تۇرعىندار تەڭىز سۋىنىڭ قىزارۋىن تەگىننەن-تەگىن ەمەس دەپ وتىر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
