نەگىزىنەن مۇنداي ەسەپ-قيساپپەن CIES Football Observatory دەگەن زەرتتەۋ كومپانياسى اينالىسادى. ولاردىڭ مالىمەتى بويىنشا 2018 جىلعى بىرىنشىلىكتەگى جاسى ۇلكەن كوماندا – پاناما. سوڭعى 32-ءشى جولدامانى اياقاستى جەڭىپ كەتكەن پاناما ويىنشىلارىنىڭ ورتاشا جاسى – 29,4. تۇڭعىش رەت عالامدىق دوداعا قاتىسقالى وتىرعان بۇل ۇجىم تاجىريبەسى تولىسقان فۋتبولشىلارعا, ازىلدەپ ايتقاندا «شالدارعا» سەنىم ارتادى ەكەن.
ال ودان كەيىنگى ورىنداردا يسلانديا (29,0) جانە كوستا-ريكا (29,0). ەڭ جاس قۇراما ساناتىنا نيگەريا (24,9), گەرمانيا (25,7) جانە انگليا (25,9) جاتادى. جەر شارىنىڭ چەمپيونىن انىقتاۋعا كەلگەن بارلىق 32 كوماندانىڭ ورتاشا جاسى بولسا 27,4-ءتى قۇرايدى.
ەندى وسى جاس ماسەلەسىن قۇرلىقتارعا ءبولىپ قارايتىن بولساق, وندا مىنانداي تىزبەك شىعادى: كونكاكاف – 28,6, وڭتۇستىك امەريكا – 27,8, ازيا – 27,2, ەۋروپا – 27,2, افريكا – 26,5.
2018 جىلدىڭ بىرىنشىلىگىندە فۋتبولشىلارى ەڭ ۇزىن قۇراما – سەربيا. بالقان تۇبەگىنىڭ اياقدوپشىلارىنىڭ ورتاشا بويى 185,6 سانتيمەتردى قۇرايدى. ولاردىڭ قاتارىندا كەزىندە «استانا» ساپىندا ويناعان نەمانيا ماكسيموۆيچتە بولىپ قالۋى ابدەن ىقتيمال. سەربيا ۇلتتىق قۇراماسىنىڭ باس باپكەرى سلاۆوليۋب مۋسلين «ۆالەنسيا» ساپىندا اراگىدىك الماسىپ الاڭعا شىعىپ جۇرگەن جاس ويىنشىنى قوسالقى قۇرامعا الۋى مۇمكىن. سەربيادان ءسال عانا قالىپ تۇرعان قۇرامالاردىڭ ۇشتىگىن تۇگەلىمەن سكانديناۆتار يەمدەندى. مىسالى, شۆەتسيا (185,2), يسلانديا
(185, 0) جانە دانيا (185,0). ال الەم بىرىنشىلىگىن قابىلدايتىن رەسەي بۇل تۇرعىدا 6-ورىندا (184,9). ەڭ ۇزىن قۇرامانى انىقتادىق, ال ەڭ قىسقالارى قايسى دەيسىز عوي؟ ول وڭتۇستىك امەريكا وكىلى – پەرۋ (178,3), ودان كەيىن جاپونيا (178,1) جانە ساۋد ارابياسى (176, 2).
ال ەندى مىنا قىزىققا قاراڭىز: افريكا قۇرلىعىنان شىققان ماروككو قۇراماسى فۋتبولشىلارىنىڭ 61,5 پايىزى ماروككودا تۋىلماعان ازاماتتار. بۇل جونىنەن ماروككوعا تەڭ كەلەر ەشكىم جوق. تەك سەنەگالدىڭ عانا 40 پايىزى وزگە ەلدە تۋىپ-وسكەندەر. سونىمەن قاتار ايتسا سەنگىسىز, دەگەنمەن پورتۋگاليا فۋتبولشىلارىنىڭ 32,1 پايىزىنىڭ كىندىگى پيرەنەي تۇبەگىندە كەسىلمەگەندەر. جارىس قوجايىنى رەسەي بۇل ەسەپتە 5 پايىزدىق كورسەتكىشپەن 12-ورىندا. ودان بولەك برازيليا, ساۋد ارابياسى, يران, گەرمانيا, كولۋمبيا, مەكسيكا جانە وڭتۇستىك كورەيا قۇرامالارىندا دا اراگىدىك وسىنداي ويىنشىلار بار.
ءسوز سوڭىندا كەيبىر قۇرامالار ويىنشىلارىنىڭ ونەر كورسەتەتىن بىرىنشىلىكتەرىنە دە توقتالىپ وتسەك. مىسالى, حورۆاتيا, شۆەتسيا, يسلانديا قۇرامالارىنىڭ 23 فۋتبولشىسى تۇگەلىمەن وزگە بىرىنشىلىكتەردە وينايدى. ياعني وزگە چەمپيوناتتاردا ويناپ, ناپاقا تاۋىپ جۇرگەن لەگيونەرلەر. ولاردان كەيىن سەنەگال (97 پايىز), سەربيا (92,3 پايىز). ال بۇل جاعىنان 0 پايىز كورسەتكىش تىركەپ وتىرعان ەكى كوماندا بار. ولار – ساۋد ارابياسى مەن انگليا. ساۋد ارابياسىندا وزدەرىڭىز بىلەتىندەي فۋتبولشىلارعا وزگە ەلدە ونەر كورسەتۋگە تىيىم سالىنعان. باتىستىڭ ازعىنداعان ءومىرىن كورىپ, ادام بۇزىلادى دەپ سانايدى. ال انگليانىڭ جاعدايى ايتپاسا دا تۇسىنىكتى. الەمدەگى ەڭ مىقتى فۋتبول ليگاسى انگليادا ەكەنى داۋ تۋدىرا قويماس.
ەرمۇحامەد ماۋلەن,
«ەگەمەن قازاقستان»
