جۋىردا وسپانقوجا ءوز تۇرمىسىندا كادەگە جاراتقان اعاش تاباق تابىلدى. بۇل تۋرالى وسپانقوجا شوبەرەسى شوقان عازەز ۇلى قاجى شەشىلە سىر شەرتتى. ونىڭ ايتۋىنشا ايگىلى اۋليەنىڭ ءامىرحان, مۇحاممەدۋالي, حامزا اتتى ءۇش بالاسى بولىپتى. 1937 جىلى ساياسي قۋعىن-سۇرگىنگە ۇشىراۋىنا بايلانىستى حامزا وسپانوۆ بولىپ جازىلعان. ورتانشى ۇلى مۇحاممەدۋالي بەكەت اتا ەسىمىنە جازىلعان. مۇحاممەدۋاليدە پەرزەنت بولماعاندىقتان, ءامىرحاننىڭ عازەزى وعان مايراش ەسىمدى قىزىن بەرگەن.
مۇحاممەدۋالي ەكىنشى دۇنيەجۇزىلىك سوعىسقا قاتىسىپ, جارالانعان. ءدىن جولىن ۇستاپ, ءتاۋىش اۋىلىندا يمام بولعان. 1984 جىلى 78 جاسىندا باقيلىق بولعان مۇحاممەدۋاليدىڭ ۇيىندە اۋليە وسپانقوجا قولدانعان اعاش تاباق بولىپتى. اقساقال دۇنيەدەن وزار الدىندا تاباقتى ۇلكەن قىزى مايراشقا قالدىرىپتى. بىلتىر شىلدە ايىنىڭ اياعىندا قوستاناي قالاسى ماڭىنداعى اۋىلدا تۇراتىن مايراش تا اۋىر سىرقاتتان جارىق دۇنيەمەن قوش ايتىستى. ءبىرىنشى بەيسەنبى شايىندا جينالعان قاۋىم تاعىلىمى مول كورىنىستىڭ كۋاگەرى بولدى. مايراشتىڭ ۇلى ارمان, كەلىنى قىزعالداق اعاش تاباقتى اق داستارقانعا وراپ اكەلىپ تۇرىپ:
– انامىز وسى تاباقتىڭ وسپانقوجا نەمەرەسى, ءدىن جولىنداعى باۋىرى شوقاننىڭ ۇيىندە جاقسى ىرىم رەتىندە قالعانىن قالادى, – دەدى ەرلى-زايىپتىلار قاتارلاسا سويلەپ. بۇل وقيعاعا شوقان قاجى دا, ونىڭ زايىبى ساليحا دا ەرەكشە تەبىرەندى. شوقان عازەز ۇلىنىڭ شاڭىراعىندا جۋىردا مەيمان بولا وتىرىپ ءبىز دە عاجايىپ اسەرگە بولەندىك. قانشا دەگەنمەن عاسىردان استام ساقتالعان اعاش تاباق قوي. قازىر ءتۇرلى ۇلگىدە تاباق جاسايتىن قولونەر ششەبەرلەرى بارشىلىق. ءتىپتى كاسىپكە اينالىپ كەتتى. بىراق سولاردىڭ كوبى ەسكىنىڭ كوزى بولعان تاباقتاردى اۋىستىرا المايتىنداي. بالكىم, بۇكىل قاسيەتى, مىقتىلىعى تاڭداپ الىنعان اعاشىندا شىعار. ەڭ باستىسى, حالىققا قادىرمەندى تۇلعانىڭ تۇتىنعان دۇنيەسىندە عوي.
ناعاشىباي مۇقاتوۆ
قوستاناي
