جاڭا جىل يەك استىنا كەلىپ, قاربالاس كوبەيسە دە جاڭا ءۇي تۇرعىندارىنىڭ قۋانىشىن بولىسۋگە باتىس قازاقستان وبلىسىنىڭ اكىمى التاي كولگىنوۆ ارنايى كەلدى.
– وڭىرىمىزدە مەملەكەتتىك «نۇرلى جول» جəنە «نۇرلى جەر» باعدارلاماسى اياسىندا كوپ جۇمىس اتقارىلدى. سونىڭ ىشىندە وبلىستا 115 مىڭ شارشى مەتر تۇرعىن ءۇي سالىندى. بارلىق قارجى كوزدەرىن قوسساق, ءبىر جىل ىشىندە جالپى 380 مىڭ شارشى مەتر تۇرعىن ءۇي پايدالانۋعا بەرىلگەن ەكەن. مۇنىڭ بارلىعى حالىق يگىلىگى ءۇشىن اتقارىلىپ جاتقان جۇمىس. قونىستارىڭىز قۇتتى بولسىن! جاڭا جىل تەك بۇگىنگىدەي شاتتىق, قۋانىش əكەلە بەرسىن, – دەدى ءوڭىر باسشىسى.
2017 جىلى وبلىستا 14 كوپ قاباتتى, 188 ءبىر قاباتتى تۇرعىن ءۇي سالىنىپ, 1500 وتباسى باسپانالى بولدى. سونىڭ ىشىندە «نۇرلى جەر» باعدارلاماسى اياسىندا 985 پاتەردەن تۇراتىن 7 ءۇي سالىنعان. مەملەكەتتىك باعدارلامانىڭ «جەرگىلىكتى اتقارۋشى ورگاندار جەلىسى بويىنشا كرەديتتىك تۇرعىن ءۇي» باعىتى بويىنشا 481 پاتەرلى 4 ءۇي, «بايتەرەك دەۆەلوپمەنت» اق جەلىسى بويىنشا 504 پاتەرلى 3 ءۇي بوي كوتەردى. تۇرعىن ءۇي قۇرىلىس جيناق بانكى وبلىستىق فيليالىنىڭ ديرەكتورى ايگۇل ناۋرىزاليەۆانىڭ ايتۋىنشا, بانك قىزمەتى وڭىردە وتە تانىمال. تۇرعىن ءۇي قۇرىلىس جيناق بانكىنەن سالىم اشقان ايماق تۇرعىندارىنىڭ سانى 55 مىڭعا تاياعان. بانكتىڭ 18 722 كليەنتى كەلىسىمشارتتى 2017 جىلى رەسىمدەگەن.
2018 جىلى بانك «نۇرلى جەر» باعدارلاماسىن جۇزەگە اسىرۋدى جالعاستىرادى. «قۇرىلىستى جەكە قۇرىلىس جۇرگىزۋشىلەر ارقىلى ىنتالاندىرۋ» باعدارلاماسى اياسىندا وبلىستا 173 تۇرعىن قونىس تويىن تويلاماق. «قازاقستاننىڭ تۇرعىن ءۇي قۇرىلىس جيناق بانكى» اق مەن «قاز-حول» جشس جانە «كاراۆاننىي پۋت» جشس اراسىندا قول قويىلعان كەلىسىمدەرگە سايكەس, ورال قالاسىنداعى قۇرمانعازى كوشەسى, 198 مەكەنجايىندا 9 قاباتتى تۇرعىن ءۇيدىڭ جانە گاگارين كوشەسى, 2 مەكەنجايى بويىنشا 126 پاتەرلى ءۇيدىڭ قۇرىلىسى جۇرۋدە. ۇيلەر 2018 جىلدىڭ تامىزىندا پايدالانۋعا بەرىلەدى دەپ جوسپارلانىپ وتىر. بۇل – اپاتتى تۇرعىن ۇيلەردىڭ ورنىنا كوتەرىلىپ جاتقان جاڭا عيماراتتار.
قۇرىلىس تەك ورال قالاسىندا ءجۇرىپ جاتقان جوق. «نۇرلى جەر» باعدارلاماسى اياسىندا «جەكە تۇرعىن ءۇي قۇرىلىسىن دامىتۋ» باعىتىندا توقپاي, فەدوروۆكا, پەرەمەتنوە جانە داريان ەلدى مەكەندەرىندە جەر ۇيلەر سالىنادى. بۇل ەلدى مەكەندەر وبلىس ورتالىعىنا جاقىن ورنالاسقان.
تۇرعىن ءۇي قۇرىلىس جيناق بانكىنىڭ جەكە ءونىمى – ء«وز ءۇيىم» باعدارلاماسى دا ايماقتا ءساتتى ءجۇرىپ جاتىر. اتالعان جوبا اياسىندا 2018 جىلى بقو ءىىد قىزمەتكەرلەرى باسپانالى بولادى. سونىمەن قاتار ورالدىڭ سولتۇستىك-شىعىس بولىگىندە «باتىس قازاقستان ەلەكتر تاراتۋ جەلىسى كومپانياسى» اق پەن «جايىقجىلۋقۋات» اق قىزمەتكەرلەرى ءۇشىن 9 قاباتتى تۇرعىن ءۇي سالۋ جوسپارلانۋدا. بۇل ۇيىمداردا ىستەيتىن قىزمەتكەرلەردىڭ جالپى سانى 800-دەن اسادى. ولاردىڭ كوپشىلىگى باسپانالى بولامىن دەپ اقشا جيناپ جاتقان بانك سالىمشىلارى.
قازبەك قۇتتىمۇرات ۇلى,
«ەگەمەن قازاقستان»
ورال
